ராணுவ மோதல்கள் அமைதியான தீர்வை எட்ட உதவாது என்றும், மத்திய கிழக்கு மற்றும் ரஷ்யா-உக்ரைன் இடையிலான போர் உட்பட அனைத்துப் போர்களும் பேச்சுவார்த்தை மற்றும் இராஜதந்திரத்தின் மூலமே தீர்க்கப்பட வேண்டும் என்றும் பிரதமர் நரேந்திர மோடி இன்று மீண்டும் வலியுறுத்தினார்.
நார்வே பிரதமர் ஜோனாஸ் கார் ஸ்டோர் (Jonas Gahr Støre) உடன் நடத்திய கூட்டுப் பத்திரிகையாளர் சந்திப்பில், உலகளாவிய பயங்கரவாதத்திற்கு முற்றுப்புள்ளி வைக்க வேண்டும் என்று பிரதமர் அழைப்பு விடுத்தார்.. மேலும், பயங்கரவாதத்திற்கு எதிரான இந்தியாவின் போராட்டத்தில் துணையாக நின்றதற்காக நார்வேக்கு அவர் நன்றி தெரிவித்தார். இந்தியா மற்றும் நார்வே ஆகிய இரு நாடுகளும், விதிகளின் அடிப்படையில் அமைந்த உலகளாவிய ஒழுங்கில் நம்பிக்கை கொண்டுள்ளதாக அவர் குறிப்பிட்டார்.
“நண்பர்களே, இன்று உலகம் நிலையற்ற மற்றும் நிச்சயமற்ற ஒரு காலகட்டத்தைக் கடந்து கொண்டிருக்கிறது. உக்ரைனாக இருந்தாலும் சரி அல்லது மேற்கு ஆசியாவாக இருந்தாலும் சரி, உலகின் பல பிராந்தியங்கள் மோதல்களைச் சந்தித்து வருகின்றன. இத்தகைய ஒரு சூழலில், இந்தியாவும் ஐரோப்பாவும் தங்கள் உறவில் ஒரு புதிய பொற்காலத்திற்குள் அடியெடுத்து வைக்கின்றன,” என்று அவர் கூறினார்.
தனது உரையில், இந்தியாவுக்கும் ஐரோப்பாவுக்கும் இடையிலான தடையற்ற வர்த்தக ஒப்பந்தம் (FTA) குறித்தும் அவர் பேசினார்; இதனை ஒரு வரலாற்றுச் சிறப்புமிக்க ஒப்பந்தம் என்றும் அவர் வர்ணித்தார். இவ்விரு நாடுகளுக்கும் இடையே பரஸ்பர முன்னேற்றத்தையும் செழிப்பையும் உறுதி செய்வதற்கான ஒரு வரைபடமாக இந்த FTA திகழ்வதாக அவர் குறிப்பிட்டார்.
மேலும், இந்த FTA-ஆனது இந்தியாவுக்கு 100 பில்லியன் அமெரிக்க டாலர் அளவிலான முதலீட்டை ஈர்த்து, அடுத்த 15 ஆண்டுகளில் ஒரு மில்லியனுக்கும் அதிகமான வேலைவாய்ப்புகளை உருவாக்கும் என்றும் அவர் தெரிவித்தார்.
இயற்கைக்கும் மனித முன்னேற்றத்திற்கும் இடையிலான நல்லிணக்கத்திற்கு நார்வே ஒரு “அழகிய உதாரணம்” என்றும் பிரதமர் மோடி குறிப்பிட்டார். மேலும் “நாளை அனுசரிக்கப்படவுள்ள நார்வேயின் அரசியலமைப்பு தினத்தை முன்னிட்டு, உலகின் மிகப்பெரிய ஜனநாயக நாடான இந்தியாவின் சார்பில், வலிமையும் துடிப்பும் மிக்க ஜனநாயக நாடாகத் திகழும் நார்வே நாட்டு மக்களுக்கு எனது உளமார்ந்த வாழ்த்துகளைத் தெரிவித்துக்கொள்கிறேன்,” என்று கூறினார்.
