காலம் மாறுவதுடன், இளைஞர்களின் வாழ்க்கை குறித்த பார்வையும் வேகமாக மாறி வருகிறது. குறிப்பாக திருமணம், குடும்ப வாழ்க்கை மற்றும் குழந்தை பெற்றுக்கொள்வது போன்ற விஷயங்களில் இளம் பெண்களின் எண்ணங்களில் பெரிய மாற்றம் ஏற்பட்டுள்ளதாக பல ஆய்வுகள் சுட்டிக்காட்டுகின்றன. தனிப்பட்ட மகிழ்ச்சி, மனநிம்மதி மற்றும் சுயசார்பு வாழ்க்கைக்கு முக்கியத்துவம் கொடுக்கும் மனநிலை அதிகரித்து வருவது சமூக ஆர்வலர்களின் கவனத்தை ஈர்த்துள்ளது.
சமீபத்தில் உலகளவில் நடத்தப்பட்ட ஆய்வு ஒன்றில், வரும் ஆண்டுகளில் அதிகமான பெண்கள் திருமணம் செய்யாமல் வாழ விரும்பும் மனநிலையில் இருப்பதாக தெரியவந்துள்ளது. ஆய்வின்படி, சுமார் 45 சதவீத பெண்கள் திருமண வாழ்க்கையைத் தேர்வு செய்யாமல் இருக்கலாம் என்று கணிக்கப்பட்டுள்ளது. குடும்ப உறவுகளில் போதிய புரிதல் இல்லாதது, மனஅழுத்தம், தனிப்பட்ட சுதந்திரத்திற்கு அதிக முக்கியத்துவம் அளிப்பது போன்ற காரணங்கள் இந்த மாற்றத்திற்கு முக்கிய காரணங்களாக ஆய்வில் குறிப்பிடப்பட்டுள்ளன.
அதேபோல், குழந்தை பெற்றுக்கொள்வதிலும் பல பெண்களின் விருப்பம் மாறி வருவதாக ஆய்வு தெரிவிக்கிறது. சிலர் குழந்தை வேண்டாம் என்ற முடிவை எடுக்கின்றனர். சிலர் ஒரு குழந்தை இருந்தால் போதும் என்ற எண்ணத்துடன் இருப்பதாகவும் ஆய்வில் கூறப்பட்டுள்ளது. முன்னொரு காலத்தில் பெண்கள் பொருளாதார ரீதியாக குடும்பத்தை அதிகம் சார்ந்து இருந்தனர். அதனால் விருப்பமில்லாத சூழல்களிலும் குடும்ப வாழ்க்கையை தொடர வேண்டிய நிலை இருந்தது. ஆனால் தற்போது கல்வி, வேலைவாய்ப்பு மற்றும் பொருளாதார சுதந்திரம் அதிகரித்துள்ளதால், மனநிம்மதி இல்லாத உறவுகளில் வாழ விரும்பவில்லை என்ற எண்ணம் பல பெண்களிடம் உருவாகியுள்ளது.
மேலும், பாலின சமத்துவம், பரஸ்பர மரியாதை மற்றும் உணர்வுபூர்வமான புரிதல் குறைவாக இருப்பதும் உறவுகளில் விரிசல் ஏற்படுவதற்கான காரணங்களில் ஒன்றாக ஆய்வில் குறிப்பிடப்பட்டுள்ளது. இருப்பினும், இந்த ஆய்வு முடிவுகள் அனைத்து நாடுகளுக்கும், அனைத்து சமூகங்களுக்கும் ஒரே மாதிரியாக பொருந்தும் என்று கூற முடியாது. திருமணம் செய்வதா, குழந்தை பெற்றுக்கொள்வதா என்பது ஒவ்வொருவரின் தனிப்பட்ட விருப்பம், வாழ்க்கை சூழல் மற்றும் சமூகப் பின்னணியைப் பொறுத்து மாறுபடும் என்றும் ஆய்வாளர்கள் சுட்டிக்காட்டியுள்ளனர்.
Also Read: பெரிய முதலீடு தேவையில்லை… பெண்களுக்கு ஏற்ற சிறு தொழில்!
