வீட்டில் செய்யும் குழம்புக்கும், உணவகத்தில் பரிமாறப்படும் குழம்புக்கும் சுவையில் ஏன் இவ்வளவு வித்தியாசம் இருக்கிறது என்று யோசித்திருக்கிறீர்களா? அந்த சுவைக்கு எந்த ஒரு ரகசியப் பொருளும் காரணம் இல்லை. வெங்காயத்தை சரியாக வதக்குவது முதல் மசாலாவை பொறுமையாக சமைப்பது, தண்ணீரின் அளவை சரியாகக் கையாள்வது வரை ஒவ்வொரு சமையல் முறையும் முக்கியப் பங்கு வகிக்கிறது. இந்தச் சிறிய நுட்பங்களை சரியாகப் பின்பற்றினால், வீட்டிலேயே உணவக பாணியில் மணமும் சுவையும் நிறைந்த குழம்பைத் தயாரிக்கலாம்.
எண்ணெய் அல்லது நெய்யை சரியான அளவில் பயன்படுத்துங்கள்
குழம்பில் சேர்க்கும் மசாலாக்களின் நறுமணத்தையும் சுவையையும் வெளிக்கொண்டு வர எண்ணெய் அல்லது நெய் முக்கியப் பங்கு வகிக்கிறது. முதலில் எண்ணெய் அல்லது நெய்யை சரியாகச் சூடாக்கி, அதில் முழு மசாலாக்களைச் சேர்த்து தாளிக்க வேண்டும். இதன் மூலம் மசாலாக்களின் இயற்கையான நறுமணம் நன்றாக வெளிப்படும்.
மசாலாக்களை பச்சை வாசனை போகும் வரை சமைக்கவும்
சீரகம், பிரியாணி இலை, ஏலக்காய், பட்டை போன்ற முழு மசாலாக்களை சூடான எண்ணெயில் தாளித்த பிறகு, தேவையான தூள் மசாலாக்களைச் சேர்க்கலாம். மசாலாக்களை போதுமான நேரம் சமைக்காமல் அடுத்தடுத்த பொருட்களைச் சேர்த்தால் குழம்பின் சுவை மந்தமாகிவிடும். எனவே, மசாலாக்களின் பச்சை வாசனை நீங்கி நல்ல நறுமணம் வரும் வரை அவற்றைச் சமைப்பது அவசியம்.
வெங்காயத்தை அவசரமாக வதக்காதீர்கள்
உணவக பாணி குழம்பின் சுவையில் வெங்காயத்தின் பதம் முக்கியமானது. வெங்காயத்தை அதிக தீயில் அவசரமாக வதக்காமல், மிதமான தீயில் பொறுமையாக சமைக்க வேண்டும். வெங்காயம் நல்ல பொன்னிறத்தை அடையும் போது அதன் இயற்கையான இனிப்புச் சுவை வெளிப்பட்டு, குழம்புக்கு ஆழமான சுவையைத் தரும்.
இஞ்சி, பூண்டு மற்றும் தக்காளியை நன்றாக சமைக்கவும்
இஞ்சி, பூண்டு சேர்த்த பிறகு அவற்றின் பச்சை வாசனை முற்றிலும் நீங்கும் வரை வதக்க வேண்டும். தொடர்ந்து தக்காளி மற்றும் தூள் மசாலாக்களைச் சேர்த்து நன்றாகக் கிளறி சமைக்க வேண்டும். இந்தக் கலவை கெட்டியாகி, அதன் ஓரங்களில் எண்ணெய் பிரியும் நிலைக்கு வந்த பிறகே அடுத்த கட்டத்துக்குச் செல்ல வேண்டும்.
ஒரே ஒரு மசாலாவை மட்டும் நம்பாதீர்கள்
நல்ல குழம்பின் சுவை ஒரே ஒரு மசாலாவால் உருவாகாது. முழு மசாலாக்கள் நறுமணத்தை அதிகரிக்கவும், தூள் மசாலாக்கள் ஆழமான சுவையை உருவாக்கவும் உதவும். குழம்பு தயாரான பிறகு கொத்தமல்லி, கசூரி மேத்தி போன்றவற்றைச் சேர்ப்பது கூடுதல் மணத்தையும் சுவையையும் தரும்.
தண்ணீரை அளவாகச் சேர்க்க வேண்டும்
மசாலா நன்றாக வெந்த பிறகு தண்ணீர் அல்லது ஸ்டாக் சேர்க்க வேண்டும். ஒரே நேரத்தில் அதிக தண்ணீரை ஊற்றினால் மசாலாவின் சுவை நீர்த்துப்போகும். அதற்கு பதிலாக தேவையான அளவு சூடான தண்ணீரை கொஞ்சம் கொஞ்சமாகச் சேர்த்து, குறைந்த தீயில் குழம்பை வேகவைத்தால் நல்ல பதமும் செறிவான சுவையும் கிடைக்கும்.
உப்பு, புளிப்பு, இனிப்பு, காரம் சமநிலையில் இருக்கட்டும்
குழம்பு சுவையாக இருக்க காரம் மட்டும் அதிகமாக இருந்தால் போதாது. உப்பு, புளிப்பு, இனிப்பு மற்றும் காரம் ஆகியவை ஒன்றுக்கொன்று சரியான சமநிலையில் இருக்க வேண்டும். குழம்பு தயாராகும் இறுதிக்கட்டத்தில் சுவையை சரிபார்த்து தேவையான மாற்றங்களைச் செய்வது நல்லது.
இறுதியில் சிறிய தாளிப்பு கொடுத்துப் பாருங்கள்
குழம்பு அடுப்பிலிருந்து இறக்குவதற்கு முன் அல்லது பரிமாறுவதற்கு சற்று முன்பு சிறிதளவு நெய், கொத்தமல்லி, கசூரி மேத்தி அல்லது தாளிப்பு சேர்ப்பது சுவையையும் நறுமணத்தையும் மேலும் அதிகரிக்கும். குறிப்பாக நெய்யில் செய்யப்படும் இறுதி தாளிப்பு குழம்புக்கு தனித்துவமான மணத்தைத் தரும்.
எனவே, வீட்டில் செய்யும் குழம்பை உணவக பாணியில் மாற்ற அதிகளவு மசாலாக்களைச் சேர்ப்பது அவசியமில்லை. வெங்காயத்தை பொறுமையாக வதக்குவது, மசாலாக்களை நன்றாகச் சமைப்பது, தண்ணீரை சரியான அளவில் சேர்ப்பது மற்றும் இறுதியில் சுவையை சமநிலைப்படுத்துவது போன்ற சமையல் நுட்பங்கள்தான் சுவையான குழம்பின் முக்கிய ரகசியங்கள்.
Also Read: பிரிட்ஜில் இருந்த மனைவியின் தலை.. உடலை துண்டு துண்டாக வெட்டி கணவர் செய்த கொடூரம்!
