‘விநாயகர்’ என்ற சொல்லுக்கு ‘தனக்கு மேல் தலைவன் இல்லாதவர்’ அல்லது ‘மேலான தலைவர்’ என்பது பொருளாகும். எந்தவொரு சுப காரியத்தையும் தடையின்றி முடித்துக் கொடுக்கும் முழுமுதற் கடவுளான விநாயகப் பெருமான் அவதரித்த நன்னாளே ஆவணி மாத வளர்பிறை சதுர்த்தி திதியில் ‘விநாயகர் சதுர்த்தி’யாக நாடெங்கும் உற்சாகமாக கொண்டாடப்படுகிறது.
புராணங்களின்படி, பார்வதி தேவி நீராடச் செல்லும் போது தன் மேனி சந்தனப் பூச்சுகளால் ஒரு பாலகனை உருவாக்கி, அதற்கு உயிரூட்டிக் காவலுக்கு வைத்தார். கயிலாயம் திரும்பிய சிவபெருமானைத் தாயின் ஆணைப்படி அப்பாலகன் உள்ளே செல்ல அனுமதிக்காததால் ஏற்பட்ட மோதலில், ஈசனின் திரிசூலத்தால் பாலகனின் தலை துண்டிக்கப்பட்டது. இதைக் கண்டு உலகே நடுங்கும் அளவுக்குக் கோபமுற்ற பார்வதி தேவியைச் சாந்தப்படுத்த, வடதிசையில் தலைவைத்து படுத்திருந்த ஐராவதம் என்ற யானையின் தலையைக் கொண்டுவந்து பொருத்தி, சிவபெருமான் உயிரூட்டினார். அத்துடன் அவரைத் தனது சிவ கணங்களின் தலைவனாக நியமித்ததால் அவர் ‘கணபதி’ என்றும் போற்றப்படுகிறார்.
ஆரம்பத்தில் மராட்டிய மன்னர் சத்ரபதி சிவாஜியின் காலத்தில் அரச விழாவாகக் கொண்டாடப்பட்டு வந்த விநாயகர் சதுர்த்தியை, சுதந்திரப் போராட்டக் காலத்தில் விடுதலை வீரர் பாலகங்காதர திலகர் ஒரு மாபெரும் மக்கள் இயக்கமாக மாற்றியமைத்தார். ஆங்கிலேயரின் அடக்குமுறைகளை மீறி மக்களை ஒன்றிணைக்கவும், தேசிய உணர்வை ஊட்டவும் பொது இடங்களில் விநாயகர் சிலைகளை நிறுவி வழிபடும் வழக்கத்தை அவர் தீவிரப்படுத்தினார்.
சமூக ஒற்றுமையை வளர்க்கும் இவ்விழாவின் நிறைவில், களிமண் விநாயகர் சிலைகள் நீர்நிலைகளில் கரைக்கப்படுவது நம் கவலைகளும் வினைகளும் கரைந்து போவதைக் குறிக்கிறது. சதுர்த்தி நன்னாளில் அதிகாலை நீராடி, பிள்ளையாருக்குப் பிடித்த அருகம்புல், எருக்கம் பூ மாலை சார்த்தி, கொழுக்கட்டை, சுண்டல், அவல், பொரி படைத்து, விநாயகர் அகவல் பாடி வணங்குவோருக்குத் துன்பங்கள் யாவும் நீங்கி வாழ்வில் சகல ஐஸ்வர்யங்களும் கைகூடும்.
Read More : சென்னையில் எத்தனை விநாயகர் சிலைகள் வைத்து வழிபடலாம்..? காவல்துறை வெளியிட்ட முக்கிய அறிவிப்பு..!!
