ஜப்பானில் 100 வயது அல்லது அதற்கும் மேற்பட்ட வயதுடையவர்களின் எண்ணிக்கை 1,07,677 ஆக அதிகரித்துள்ளதாக அந்நாட்டின் சுகாதார அமைச்சகம் (செப்டம்பர் 1, 2026 நிலவரப்படி) அதிகாரப்பூர்வமாக அறிவித்துள்ளது. கடந்த ஆண்டை விட இந்த எண்ணிக்கை 7,914 அதிகரித்துள்ளது. இதில் 88 சதவீதம் பேர் பெண்கள் ஆவர். இதன் மூலம், உலகிலேயே அதிக அளவிலான நூறாண்டு முதியவர்கள் வாழும் நாடாக ஜப்பான் உருவெடுத்துள்ளது.
கடந்த ஆகஸ்ட் 27 அன்று நாரா மாகாணத்தைச் சேர்ந்த ஷிகேகோ ககாவா காலமானதை அடுத்து, கியோட்டோ மாகாணத்தைச் சேர்ந்த 114 வயது மற்றும் 250 நாட்களான ஃபியுயோ கிஷிமோடோ (Fuyo Kishimoto) தற்போது ஜப்பானின் மிக மூத்த குடிமகளாக அறியப்படுகிறார்.
மக்கள்தொகை நெருக்கடி மற்றும் வர்த்தக மாற்றம்: செப்டம்பர் மாதத்தின் மூன்றாவது திங்கட்கிழமையில் கொண்டாடப்படும் ‘முதியோர் மரியாதை தினத்தை’ முன்னிட்டு இந்தத் தரவுகள் வெளியிடப்பட்டுள்ளன. மக்கள் வயதான காலத்திலும் சுறுசுறுப்பாக இயங்குவது பெருமையளித்தாலும், மறுபுறம் ஜப்பானில் பிறப்பு விகிதம் கடுமையான வீழ்ச்சியைச் சந்தித்து வருவது கவலையளிப்பதாக சுகாதாரத்துறை அமைச்சர் கெனிச்சிரோ யுனோ தெரிவித்துள்ளார். 2025-ஆம் ஆண்டில் ஜப்பானியர்களின் பிறப்பு எண்ணிக்கை 671,236 ஆக வரலாற்றில் இல்லாத அளவிற்கு சரிந்துள்ளது.
வயதானவர்களின் எண்ணிக்கை அதிகரித்துள்ளதால் சமூகப் பாதுகாப்பு கட்டமைப்புகளில் அழுத்தம் ஏற்பட்டுள்ளது. இதன் தாக்கம் வர்த்தக ரீதியாகவும் எதிரொலிக்கிறது. முதியோர்களுக்கான ‘அடல்ட் டயப்பர்களின்’ விற்பனை பெரும் லாபம் தரும் தொழிலாக மாறியுள்ளது. முன்னணி உற்பத்தியாளரான ஓஜி ஹோல்டிங்ஸ், குழந்தைகளின் டயப்பர்களுக்குப் பதிலாக பெரியவர்களுக்கான டயப்பர் உற்பத்தியில் மட்டுமே கவனம் செலுத்தப் போவதாக 2024-லேயே அறிவித்திருந்தது குறிப்பிடத்தக்கது.
ஜப்பானியர்களின் நீண்ட ஆயுளுக்கான காரணங்கள்: ஜப்பானியப் பெண்களின் சராசரி ஆயுட்காலம் 87 ஆண்டுகளாகவும், ஆண்களின் ஆயுட்காலம் உலகளவில் முதல் 10 இடங்களுக்குள்ளும் உள்ளது. முகோகவா மகளிர் பல்கலைக்கழகத்தின் உலக சுகாதார மேம்பாட்டு நிறுவனத்தின் இயக்குநர் டாக்டர் யூக்கியோ யாமோரி, இந்த நீண்ட ஆயுளுக்கான காரணங்களை விளக்கியுள்ளார்.
கடல் உணவுகள் மற்றும் ஊட்டச்சத்து: ஜப்பான் ஒரு தீவு நாடு என்பதால், மக்கள் அதிகளவில் புதிய மீன்களை உணவில் சேர்த்துக் கொள்கின்றனர். இதனால் ஒமேகா-3, மக்னீசியம் மற்றும் டவுரின் போன்ற சத்துக்கள் தடையின்றிக் கிடைக்கின்றன.
அரிசி மற்றும் சோயா: இவர்களது உணவு முறையானது அரிசி மற்றும் சோயாவை அடிப்படையாகக் கொண்டது. இதில் கொலஸ்ட்ரால் அளவு குறைவாக இருப்பதால், இதய நோய் பாதிப்புகள் பெருமளவு குறைகின்றன.
‘த்ரீ எஸ்’ (Three S) கொள்கை: குறைவான உப்பு (Salt), அதிக கடல் உணவு (Seafood) மற்றும் அதிக சோயா (Soy) ஆகியவையே நீண்ட ஆயுளுக்கான ரகசியம் என அவர் குறிப்பிடுகிறார். சோயாவில் உள்ள ஐசோஃப்ளேவோன்கள் செல்களைப் புதுப்பிக்கவும், புற்றுநோயைத் தடுக்கவும் உதவுகின்றன.
உணவுமுறையில் உள்ள சவால்கள் சோயா சாஸ் மற்றும் மிசோ போன்றவற்றின் பயன்பாட்டால் ஜப்பானிய உணவுகளில் சோடியம் (உப்பு) அளவு அதிகமாக இருப்பதும், பால் நுகர்வு குறைவாக உள்ளதால் கால்சியம் பற்றாக்குறை ஏற்படுவதும் ஒரு குறையாகச் சுட்டிக்காட்டப்பட்டுள்ளது. அதிக உப்பு பயன்படுத்தும் அயோமோரி போன்ற பகுதிகளில் வசிப்பவர்களுக்கு, உப்பு குறைவாகப் பயன்படுத்தும் ஒகினாவா பகுதி மக்களை விட பக்கவாதம் மற்றும் வயிற்றுப் புற்றுநோய் ஆபத்து அதிகம் உள்ளதை ஆய்வுகள் காட்டுகின்றன.
ஜப்பானுக்கு அடுத்தபடியாக உலகிலேயே அதிக ஆயுட்காலம் கொண்ட இரண்டாவது நாடான ஹாங்காங்கிலும் இதே போன்ற உணவுப் பழக்கவழக்கங்கள் உள்ளதாக டாக்டர் யாமோரி குறிப்பிடுகிறார். ஊட்டச்சத்தான உணவு, மலைப்பகுதி வாழ்வியலால் கிடைக்கும் வழக்கமான உடற்பயிற்சி மற்றும் வலுவான குடும்ப உறவுகள் ஆகிய மூன்றுமே மனிதர்களின் நீண்ட ஆயுளுக்கு அடிப்படை என அவர் உறுதிபடத் தெரிவித்துள்ளார்.
