தமிழகத்தில் பள்ளி மாணவர்கள் பசியின்றி கல்வியில் கவனம் செலுத்த வேண்டும் என்ற நோக்கில் தொடங்கப்பட்ட காலை உணவுத் திட்டம் அடுத்தகட்ட விரிவாக்கத்தை எட்டியுள்ளது. இதன் தொடர்ச்சியாக, மாணவர்களுக்கு வழங்கப்படும் உணவுப் பட்டியலில் புதிய வகை உணவுகளைச் சேர்ப்பது குறித்தும் ஆலோசனை நடைபெற்று வருகிறது. அதில் சிக்கன் பிரியாணியை இடம்பெறச் செய்வது குறித்த பரிசீலனையும் கவனம் பெற்றுள்ளது.
மாணவர்களின் ஊட்டச்சத்தை மேம்படுத்தும் நோக்கில் செயல்படுத்தப்பட்டு வரும் பெருந்தலைவர் காமராஜர் காலை உணவுத் திட்டம், தற்போது 6 முதல் 8ஆம் வகுப்பு மாணவர்களுக்கும் விரிவுபடுத்தப்பட உள்ளது. இதன் மூலம் 15,454 அரசு மற்றும் அரசு உதவிபெறும் பள்ளிகளில் சுமார் 15.30 லட்சம் மாணவர்கள் கூடுதலாக பயன்பெற உள்ளனர். இதற்காக நடப்பு நிதியாண்டில் ரூ.217.63 கோடி கூடுதல் நிதி ஒதுக்கப்பட்டுள்ளது.
மாணவர்களுக்கு ஊட்டச்சத்து நிறைந்த உணவு வழங்குவதுடன், அவர்களின் விருப்பத்திற்கேற்ற உணவு வகைகளையும் அறிமுகப்படுத்த அரசு திட்டமிட்டு வருகிறது. இதற்காக புதிய உணவுப் பட்டியலை உருவாக்க சிறப்புக் குழு அமைக்கப்பட உள்ளது. மாணவர்களின் சுவை மற்றும் ஊட்டச்சத்து தேவைகளை கருத்தில் கொண்டு இந்தக் குழு பரிந்துரைகளை வழங்கும்.
இந்த நிலையில், அரசுப் பள்ளி மாணவர்களுக்கு வாரம் ஒருநாள் சிக்கன் பிரியாணி வழங்குவது குறித்த யோசனை ஏற்கெனவே முன்வைக்கப்பட்டுள்ளது. பள்ளிக் கல்வித் துறை அமைச்சர் ராஜ்மோகன், இந்தத் திட்டம் குறித்து முதலமைச்சரிடம் பரிந்துரை செய்திருந்தார். தற்போது இந்த யோசனை பரிசீலனையில் உள்ளது.
சிக்கன் பிரியாணியை பள்ளி மாணவர்களுக்கு வழங்கும் முன்பு, உணவு தயாரிப்பு, சுகாதாரம் மற்றும் பாதுகாப்பு உள்ளிட்ட அம்சங்களை ஆய்வு செய்ய வேண்டியுள்ளது. தேவையான ஆய்வுகள் மற்றும் சோதனைகள் முடிந்த பிறகே இதனை செயல்படுத்துவது குறித்து அடுத்தகட்ட முடிவு எடுக்கப்படும் என அமைச்சர் தெரிவித்துள்ளார்.
மாணவர்களுக்கு சத்தான உணவு கிடைப்பது அவர்களின் உடல் நலத்துடன் கல்வியிலும் கவனம் செலுத்த உதவும் என்ற அடிப்படையில், பள்ளி உணவுத் திட்டத்தில் பல்வேறு மாற்றங்கள் மேற்கொள்ளப்பட்டு வருகின்றன. சமையலறைகள், பாத்திரங்கள் மற்றும் பள்ளிகளுக்குத் தேவையான அடிப்படை கட்டமைப்பு வசதிகளை மேம்படுத்தும் பணிகளும் நடைபெற்று வருகின்றன.
இதனால், தற்போது பள்ளி உணவுத் திட்டத்தில் சிக்கன் பிரியாணி உடனடியாக வழங்கப்படவில்லை. அதற்கான சாத்தியக்கூறுகள், உணவு பாதுகாப்பு மற்றும் நடைமுறை அம்சங்களை ஆய்வு செய்த பிறகு அடுத்தகட்ட நடவடிக்கை எடுக்கப்படும்.
Also Read: “அம்மா வேணும்” கதறும் 3 குழந்தைகள்.. கள்ளக்காதலனுடன் உல்லாசமாக இருந்த தாய்.. இறுதியில் நேர்ந்த கொடூரம்!
