UPI பரிவர்த்தனைகளுக்கான புதிய கட்டண நடைமுறை அக்டோபர் 15 முதல் அமலுக்கு வர உள்ள நிலையில், நாடு முழுவதும் சில பெட்ரோல் நிலையங்கள் மற்றும் கடைகளில் டிஜிட்டல் பணப்பரிவர்த்தனைகளை ஏற்கும் நடைமுறையில் மாற்றங்கள் தென்படத் தொடங்கியுள்ளன.
₹2,000-க்கு மேற்பட்ட சில UPI merchant பரிவர்த்தனைகளுக்கு அக்டோபர் 15 முதல் 0.4 சதவீத Merchant Discount Rate (MDR) அமலாகிறது. இந்தக் கட்டணத்தை வணிகர்கள் செலுத்த வேண்டும்; வாடிக்கையாளர்களிடம் கூடுதல் கட்டணமாக வசூலிக்கக் கூடாது. ₹2,000 வரையிலான merchant UPI பரிவர்த்தனைகளுக்கு இந்த MDR பொருந்தாது.
இதனிடையே, மத்தியப் பிரதேசம் உள்ளிட்ட சில பகுதிகளில் ₹2,000-க்கு மேல் எரிபொருள் வாங்கும்போது UPI மூலம் பணம் செலுத்த வேண்டாம் என்றும், அதற்கு பதிலாக ரொக்கம் அல்லது கார்டு பயன்படுத்த வேண்டும் என்றும் சில பெட்ரோல் நிலையங்களில் அறிவிப்புகள் வைக்கப்பட்டுள்ள காட்சிகள் வெளியாகியுள்ளன. பெட்ரோல் பம்ப் டீலர்கள் புதிய MDR நடைமுறையில் இருந்து விலக்கு கோரி வருகின்றனர்.
மத்தியப் பிரதேசத்தின் குவாலியரில் உள்ள ஒரு பெட்ரோல் நிலையத்தில் ₹2,000-க்கு மேற்பட்ட UPI பரிவர்த்தனைகள் ஏற்கப்படாது என அறிவிப்பு வைக்கப்பட்டிருந்ததாக தகவல்கள் வெளியாகியுள்ளன. மாநிலத்தில் உள்ள பல பெட்ரோல் நிலையங்களிலும் இதுபோன்ற நடைமுறை அமல்படுத்தப்படலாம் என்ற கவலை டீலர்கள் தரப்பில் எழுந்துள்ளது.
பெட்ரோல் நிலையங்களைத் தாண்டி சில வர்த்தக நிறுவனங்களிலும் QR குறியீடுகளை அகற்றும் நடவடிக்கைகள் மேற்கொள்ளப்பட்டதாக தகவல்கள் வெளியாகியுள்ளன. பாட்னாவில் உள்ள சில கடைகளில் UPI QR குறியீடுகள் வாடிக்கையாளர்களின் பார்வையில் இருந்து அகற்றப்பட்டிருந்ததாக தகவல்கள் தெரிவிக்கின்றன.
இதனால், அன்றாட தேவைகளுக்குக் கூட UPI-ஐ அதிகம் பயன்படுத்தி வரும் வாடிக்கையாளர்களிடையே குழப்பம் ஏற்பட்டுள்ளது. குறிப்பாக கையில் ரொக்கம் வைத்திருக்கும் பழக்கம் குறைந்தவர்களுக்கு, சில இடங்களில் UPI ஏற்கப்படாத நிலை ஏற்பட்டால் மாற்று கட்டண முறையைப் பயன்படுத்த வேண்டிய சூழல் உருவாகலாம்.
கடந்த சில ஆண்டுகளில் இந்தியர்களின் அன்றாட பணப்பரிவர்த்தனையில் UPI முக்கிய இடத்தைப் பிடித்துள்ளது. குடும்பத்தினருக்கு பணம் அனுப்புவது முதல் கடைகளில் பொருட்கள் வாங்குவது வரை பல்வேறு தேவைகளுக்கும் மக்கள் UPI-ஐ பயன்படுத்தி வருகின்றனர். அதே நேரத்தில், புதிய MDR நடைமுறை வணிகர்களின் பரிவர்த்தனைச் செலவில் மாற்றத்தை ஏற்படுத்தும் சூழல் உருவாகியுள்ளது.
புதிய விதிகளின்படி, ₹75,000 மற்றும் அதற்கு மேற்பட்ட சில merchant UPI பரிவர்த்தனைகளுக்கு MDR அதிகபட்சமாக ₹300 ஆக நிர்ணயிக்கப்பட்டுள்ளது. அதேசமயம், நண்பர்கள் அல்லது குடும்பத்தினருக்கு பணம் அனுப்புவது போன்ற person-to-person UPI பரிவர்த்தனைகள் தொடர்ந்து இலவசமாக இருக்கும்.
சிறு வணிகர்களுக்காகவும் தனி விலக்கு நடைமுறை உள்ளது. UPI QR மூலம் மாதத்திற்கு ₹1 லட்சம் வரை பெறும் தகுதியான சிறு வணிகர்களுக்கு MDR விதிக்கப்படாது என அறிவிக்கப்பட்டுள்ளது.
இதற்கிடையே, எரிபொருள், ரயில்வே, காப்பீடு உள்ளிட்ட சில குறிப்பிட்ட பிரிவுகளுக்கு ₹2,000-க்கு மேற்பட்ட பரிவர்த்தனைகளில் 0.4 சதவீதத்துக்கு பதிலாக தனி கட்டண அமைப்பு நிர்ணயிக்கப்பட்டுள்ளது. எரிபொருள் பரிவர்த்தனைகளுக்கு ₹5 என்ற flat MDR நடைமுறை குறிப்பிடப்பட்டுள்ளது.
எனவே, அக்டோபர் 15 முதல் UPI முறையே முடிவுக்கு வருகிறது என்ற தகவல் சரியானதல்ல. சிறிய தொகை பரிவர்த்தனைகள் மற்றும் தனிநபர் பணப்பரிமாற்றங்கள் தொடர்ந்து UPI மூலம் மேற்கொள்ள முடியும். ஆனால் சில பெரிய merchant பரிவர்த்தனைகளில் வணிகர்களுக்கு புதிய MDR செலவு உருவாகிறது. இதன் காரணமாக சில வணிகர்கள் UPI ஏற்றுக்கொள்ளும் முறையில் மாற்றங்களைச் செய்யத் தொடங்கியுள்ளார்களா என்பது அடுத்தடுத்த நாட்களில் தெளிவாகும்.
Also Read: POCSO வழக்கில் கைதான 49 வயது ஆசிரியர்.. SP அலுவலக 3-வது மாடியில் இருந்து குதித்து உயிரிழப்பு!
