ரஷ்யாவில் நடைபெற்ற மூன்று நாள் நாடாளுமன்றத் தேர்தலில் அதிபர் விளாடிமிர் புடினின் ‘யுனைடெட் ரஷ்யா’ (United Russia) கட்சி அபார வெற்றி பெற்றுள்ளது. ரஷ்ய நாடாளுமன்றத்தின் கீழ் அவையான டூமாவில் மொத்தமுள்ள 450 இடங்களில் 355 இடங்களைக் கைப்பற்றி ‘சூப்பர் மெஜாரிட்டி’ பலத்தைப் பெற்றுள்ளதாகத் தேர்தல் ஆணையத் தலைவர் எலா பம்ஃபிலோவா திங்கள்கிழமை அதிகாரப்பூர்வமாக அறிவித்துள்ளார்.
கடந்த 2022-ஆம் ஆண்டு பிப்ரவரி மாதம் உக்ரைன் மீது போர் தொடங்கப்பட்ட பிறகு ரஷ்யாவில் நடைபெற்ற முதல் நாடாளுமன்றத் தேர்தல் இதுவாகும். நாட்டின் உளவியல் ரீதியான நெருக்கடிகளுக்கு மத்தியிலும் 59 சதவீதத்திற்கும் அதிகமான வாக்காளர்கள் தேர்தலில் பங்கேற்றுப் பாதுகாப்பான முறையில் தேர்தலை நடத்த உதவியுள்ளனர் என்று தேர்தல் ஆணையம் தெரிவித்துள்ளது.
இந்தத் தேர்தலில் புடினின் கட்சி 57.83 சதவீத வாக்குகளைப் பெற்றுள்ளது. கடந்த 2021-ஆம் ஆண்டு தேர்தலில் இக்கட்சி 49.8 சதவீத வாக்குகளை மட்டுமே பெற்றிருந்த நிலையில், தற்போது வாக்கு சதவீதம் கணிசமாக உயர்ந்துள்ளது. டூமாவில் மூன்றில் இரண்டு பங்குக்கும் அதிகமான இடங்கள் கிடைத்துள்ளதால், தேவைப்பட்டால் ரஷ்ய அரசியலமைப்பையே மாற்றியமைக்கும் அளவுக்கு அதிபர் புடினின் கை ஓங்கியுள்ளது.
நாட்டின் தலைவரைச் சுற்றி ரஷ்யச் சமூகம் எந்த அளவிற்கு வலுவாக ஒன்றிணைந்துள்ளது என்பதை இந்தத் தேர்தல் முடிவுகள் காட்டுவதாகக் கிரெம்ளின் மாளிகையின் செய்தித் தொடர்பாளர் டிமிட்ரி பெஸ்கோவ் தெரிவித்துள்ளார்.
இந்தத் தேர்தலில் ரஷ்யக் கம்யூனிஸ்ட் கட்சி (CPRF) 13.8 சதவீத வாக்குகளுடன் 40 இடங்களைக் கைப்பற்றி இரண்டாவது இடத்தைப் பிடித்துள்ளது. லிபரல் ஜனநாயகக் கட்சி (LDPR) 8.99 சதவீத வாக்குகளுடன் 25 இடங்களைப் பெற்று மூன்றாவது இடத்தையும், புதிய மக்கள் கட்சி (New People party) 7.96 சதவீத வாக்குகளுடன் 20 இடங்களையும் கைப்பற்றியுள்ளன.
ஒருபுறம் தேர்தல் முடிவுகள் வெளியாகி வந்த நிலையில், மறுபுறம் உக்ரைன் போர் தீவிரமடைந்துள்ளது. ரஷ்யாவை இலக்கு வைத்து உக்ரைன் இதுவரை இல்லாத அளவிலான மிகப்பெரிய ட்ரோன் தாக்குதலை ஞாயிற்றுக்கிழமை நடத்தியது. இதில் ஏவப்பட்ட 1,600-க்கும் மேற்பட்ட ட்ரோன்களை இடைமறித்து அழித்ததாகவும், அதில் 450 ட்ரோன்கள் தலைநகர் மாஸ்கோவை மட்டுமே இலக்காகக் கொண்டவை என்றும் ரஷ்யா கூறியுள்ளது.
உக்ரைனின் இந்தத் தாக்குதலுக்குப் பதிலடியாக, அந்நாட்டின் தெற்கு நகரமான ஜபோரிஷியாவில் (Zaporizhzhia) உள்ள போக்குவரத்து மையங்களைக் குறிவைத்து ரஷ்யா கடுமையான தாக்குதலை நடத்தியது.
இது குறித்துப் பேசிய உக்ரைன் அதிபர் வோலோடிமிர் ஜெலென்ஸ்கி, ரஷ்யா போரைக் குறைப்பதற்கான எந்த அறிகுறியையும் காட்டவில்லை என்றும், போரைப் பெரிய அளவில் விரிவுபடுத்தவே தயாராகி வருவதாகவும் குற்றம் சாட்டினார். மேலும், ஐ.நா. பொதுச் சபைக் கூட்டத்தில் சர்வதேச நாடுகளின் கூட்டு முயற்சியுடன் அமைதியை எப்படி ஏற்படுத்துவது என்பது குறித்துப் பேசவுள்ளதாகவும் அவர் கூறினார்
