ஐஐடி பாம்பேவில் 20 வயது பி.டெக் மாணவர் சாஹில் வகோடே தற்கொலை செய்து கொண்ட சம்பவத்தைத் தொடர்ந்து, பேராசிரியர் சூர்யநாராயணா தூல்லாவின் டீன் பதவி உடனடியாக இடைநீக்கம் செய்யப்பட்டுள்ளது. மாணவர்களின் தொடர் போராட்டம் நான்காவது நாளை எட்டிய நிலையில், சம்பவம் தொடர்பான முந்தைய அறிக்கைக்காக ஐஐடி பாம்பே நிர்வாகமும் மன்னிப்பு கோரியுள்ளது.
ஐஐடி பாம்பே இயக்குநர் பேராசிரியர் ஷிரீஷ் கேதாரே, திங்கள்கிழமை மதியம் மாணவர்களுக்கு அனுப்பிய மின்னஞ்சலில், பேராசிரியர் சூர்யநாராயணா தூல்லாவின் டீன் பதவி உடனடியாக இடைநீக்கம் செய்யப்படுவதாகவும், விசாரணைக்குப் பிறகு அடுத்தகட்ட நடவடிக்கை எடுக்கப்படும் என்றும் தெரிவித்தார்.
சூர்யநாராயணா தூல்லா ஏற்கனவே மாணவர் விவகாரங்களுக்கான டீனாக பணியாற்றியவர். தற்போது நிர்வாக விவகாரங்களுக்கான டீன் பதவியில் இருந்தார். சாஹில் வகோடே தேர்வு எழுதியபோது அவர் கண்காணிப்பாளராக இருந்ததாகவும், சாஹிலின் பெற்றோர் அளித்த புகாரின் அடிப்படையில் மும்பை போலீசார் பதிவு செய்த எஃப்ஐஆரில் அவரது பெயர் இடம்பெற்றுள்ளதாகவும் தகவல் வெளியாகியுள்ளது. சாஹிலுக்கு சாதி அடிப்படையிலான பாகுபாடு காட்டப்பட்டதாக அவரது பெற்றோர் குற்றம்சாட்டியுள்ளனர்.
பேராசிரியர் தூல்லாவின் டீன் பதவி இடைநீக்கம் செய்யப்பட வேண்டும் என்பது மாணவர்கள் முன்வைத்த 18 கோரிக்கைகளில் ஒன்றாக இருந்தது. ஞாயிற்றுக்கிழமை இரவு இயக்குநர் ஷிரீஷ் கேதாரேவுடன் சுமார் 3 மணி நேரம் நடைபெற்ற பேச்சுவார்த்தைக்குப் பிறகு, மாணவர்கள் தங்களது கோரிக்கைகள் அடங்கிய பட்டியலை நிர்வாகத்திடம் ஒப்படைத்தனர். அதில் பல்வேறு கோரிக்கைகளுக்கு நிர்வாகம் நடவடிக்கை எடுப்பதாக உறுதியளித்தது.
எனினும், டீன் பதவியில் இருந்து மட்டும் நீக்குவது போதாது என்றும், பேராசிரியர் பதவியிலிருந்தும் அவரை இடைநீக்கம் செய்ய வேண்டும் என்றும் போராட்டத்தில் ஈடுபட்ட மாணவர்கள் வலியுறுத்தினர். இதனால் மாணவர்களின் போராட்டம் தொடர்ந்தது.
இதற்கிடையில், சாஹிலின் மரணம் தொடர்பாக ஐஐடி பாம்பே வெளியிட்ட ஆரம்ப அறிக்கையிலும் மாணவர்கள் எதிர்ப்பு தெரிவித்தனர். தேர்வின்போது சாஹில் செயற்கை நுண்ணறிவு தளத்தைப் பயன்படுத்தியதாக அந்த அறிக்கையில் குறிப்பிடப்பட்டிருந்தது. ஆனால், ஒழுங்கு நடவடிக்கைக் குழுவின் விசாரணை முடிவடையும் முன்பே இது போன்ற தகவல்களை வெளியிடுவது முறையல்ல என்றும், தன்னுடைய தரப்பை விளக்க முடியாத நிலையில் இருக்கும் மாணவர் மீது குற்றச்சாட்டை பொதுவெளியில் வெளியிடுவது அவரது பெயருக்கு பாதிப்பை ஏற்படுத்தும் என்றும் மாணவர்கள் தெரிவித்தனர்.
இதையடுத்து, சாஹிலின் மரணம் தொடர்பாக வெளியிட்ட முந்தைய தகவல்களுக்கு ஐஐடி பாம்பே மன்னிப்பு கோரியது. சம்பவத்துக்கு முன் நடந்த நிகழ்வுகள் குறித்து உரிய விசாரணை நடைபெற்று வருவதால், அவை அதிகாரப்பூர்வமாக உறுதி செய்யப்படுவதற்கு முன்பே அவற்றை குறிப்பிட்டு விளக்கியது முறையற்றது என நிறுவனம் தனது விளக்கத்தில் தெரிவித்தது.
சாஹிலின் மரணத்துக்கான சூழ்நிலைகள், மாணவர்கள் முன்வைத்த குற்றச்சாட்டுகள் மற்றும் நிர்வாகத்தின் நடவடிக்கைகள் குறித்து விசாரணை தொடர்ந்து நடைபெற்று வருகிறது. மாணவர்கள் முன்வைத்த 18 கோரிக்கைகள் குறித்து ஐஐடி பாம்பே ஆளுநர் குழு ஆலோசனை நடத்த திட்டமிட்டிருந்த நிலையில், பின்னர் மாணவர்களுடன் திறந்த கலந்துரையாடலும் நடத்தப்பட்டது.
Also Read: ஊர்க்காவல் படை ஆட்சேர்ப்பு தேர்வில் இளைஞர் மரணம்.. பிரேதப் பரிசோதனையில் வெளியான அதிர்ச்சி தகவல்…
