தமிழகத்தில் நிலவி வரும் தீவிர பருவநிலை மாற்றத்தின் காரணமாக, டெங்கு காய்ச்சலுடன் இணைந்து பல்வேறு வகையான சுவாசப்பாதை வைரஸ் தொற்றுகளும் ஒரே நேரத்தில் அதிவேகமாகப் பரவி வருவது பொதுமக்களிடையே பெரும் அச்சத்தை ஏற்படுத்தியுள்ளது. குறிப்பாக ‘இன்ப்ளுயன்ஸா ஏ’, அடினோ, ஆர்.எஸ்.வி (சுவாச ஒத்திசைவு வைரஸ்), கொரோனா மற்றும் சின்னம்மை போன்ற காற்றுவழி பரவும் நோய்களுடன், ‘ஸ்கிரப் டைபஸ்’ எனப்படும் உண்ணி காய்ச்சலின் தாக்கமும் பல மாவட்டங்களில் தீவிரமடைந்துள்ளது.
இந்த தொற்றுகளால் பாதிக்கப்படுவோருக்கு உடனே 101 டிகிரி பாரன்ஹீட்டுக்கும் அதிகமான கடுமையான காய்ச்சல், தொடர் தசைவலி, கடுமையான உடல் சோர்வு, தொண்டை வலி, வறட்டு இருமல், மூக்கடைப்பு உள்ளிட்ட தீவிர அறிகுறிகள் காணப்படுகின்றன. இதனால் சென்னை உள்பட அனைத்து மாவட்டங்களிலும் உள்ள அரசு மற்றும் தனியார் மருத்துவமனைகளின் புறநோயாளிகள் பிரிவில் நாள்தோறும் நூற்றுக்கணக்கான பொதுமக்கள் சிகிச்சைக்கு படையெடுத்து வருகின்றனர்.
இச்சூழலில், மருத்துவமனைகளுக்கு வரும் நோயாளிகளும் அவர்களது உதவியாளர்களும் அடிப்படை பாதுகாப்பு நெறிமுறையான முகக்கவசத்தை முற்றிலும் புறக்கணிப்பதாகப் புகார்கள் எழுந்துள்ளன. இதுகுறித்து எச்சரிக்கை விடுத்துள்ள பொது சுகாதாரத்துறை அதிகாரிகள், தற்போது டெங்குவை விட சுவாசத் தொற்றுகளே சமூகத்தில் அதிவேகமாகப் பரவி வருவதாகவும், மருத்துவமனைகள் மூலம் பிறருக்குத் தொற்று பரவுவதைத் தவிர்க்க அனைவரும் கட்டாயம் முகக்கவசம் அணிய வேண்டும் எனவும் வலியுறுத்தியுள்ளனர். முகக்கவசம் கட்டாயமாக்கப்படவில்லை என்றாலும், முன்னெச்சரிக்கை உணர்வுடன் செயல்படாவிட்டால் குடும்பம் முழுவதும் பாதிக்கப்படும் அபாயம் உள்ளதாகவும் அவர்கள் சுட்டிக்காட்டுகின்றனர்.
