மதுராந்தகம், தாராபுரம் சட்டப்பேரவை தொகுதி இடைத்தேர்தலில் போட்டியிடும் திமுக தலைமையிலான மதச்சார்பற்ற முற்போக்குக் கூட்டணி வேட்பாளர்களுக்கு மேலும் ஒரு கட்சி ஆதரவு தெரிவித்துள்ளது.
மதுராந்தகம், தாராபுரம் ஆகிய இரண்டு சட்டமன்றத் தொகுதிகளுக்கும் அக்டோபர் 6-ஆம் தேதி வாக்குப்பதிவு நடைபெறவுள்ளது. பதிவான வாக்குகள் அக்டோபர் 9-ஆம் தேதி எண்ணப்பட்டு முடிவுகள் அறிவிக்கப்பட உள்ளன. இத்தேர்தலில் ஆளும் தவெக, பிரதான எதிர்க்கட்சியான அதிமுக, திமுக, நாம் தமிழர் கட்சி மற்றும் இடதுசாரிகள் தனித்தனியே களமிறங்குவதால் பலப்பரீட்சை 5 முனைப் போட்டியாக உருவெடுத்துள்ளது.
இச்சூழலில், சென்னை தேனாம்பேட்டையில் உள்ள அண்ணா அறிவாலயத்தில் திமுக தலைவர் மு.க.ஸ்டாலினை, இந்திய தேசிய லீக் கட்சியின் மாநில தலைவர் அல்ஹாஜ் எம். பஷீர் அஹமது தலைமையிலான நிர்வாகிகள் நேரில் சந்தித்தனர். அப்போது, இரண்டு தொகுதிகளிலும் திமுக கூட்டணி வேட்பாளர்களின் வெற்றிக்கு முழு ஆதரவு அளிப்பதாக கூறி அதற்கான ஆதரவு கடிதத்தை ஸ்டாலினிடம் முறைப்படி வழங்கினர். முன்னதாக, இரண்டு தினங்களுக்கு முன்பு புதிய புரட்சி கழகம் கட்சி திமுக கூட்டணிக்கு ஆதரவு தெரிவித்திருந்த நிலையில், தற்போது இந்திய தேசிய லீக்கும் ஆதரவு கரம் நீட்டியுள்ளது.
அதேவேளையில், ஆளும் தவெக தலைமையிலான கூட்டணிக்குத் தனது முழு ஆதரவை வழங்குவதாக தமிழ் மாநில காங்கிரஸ் தலைவர் ஜி.கே.வாசன் அறிவித்திருந்த நிலையில், தற்போது திமுக கூட்டணிக்கான ஆதரவும் அதிகரித்திருப்பது இடைத்தேர்தல் களத்தின் அரசியல் சூட்டை மேலும் எகிற வைத்துள்ளது.
