மேற்கு மியான்மரில் உள்ள ஒரு சந்தை பகுதியில் திங்கள்கிழமை ராணுவம் நடத்திய வான்வழித் தாக்குதலில் 33 பேர் கொல்லப்பட்டனர் மற்றும் 36 பேர் காயமடைந்தனர்.
ராகைன் (Rakhine) மாநிலத்தின் கியுக்டாவ் (Kyauktaw) நகரில் உள்ள சந்தை மற்றும் அருகிலுள்ள பாலத்தின் மீது நண்பகலில் இந்தத் தாக்குதல் நடந்ததாகவும், பலி எண்ணிக்கை “மேலும் அதிகரிக்க வாய்ப்புள்ளது” என்றும் அரக்கான் ராணுவம் (Arakan Army) தெரிவித்துள்ளது. பாதுகாப்பு காரணங்களுக்காக பெயரைக் கூற விரும்பாத ஒரு நபர், திங்கள்கிழமை மதியம் சம்பவ இடத்திலேயே 30க்கும் மேற்பட்ட உடல்களைப் பார்த்ததாகவும், சிதைந்த கட்டிடங்கள் மற்றும் பள்ளம் விழுந்த சாலைகளுக்கு இடையே மனித உடற்பாகங்கள் சிதறிக் கிடந்ததாகவும் தெரிவித்தார்.
இச்சம்பவம் குறித்து மியான்மர் ராணுவத்தின் கருத்தை உடனடியாகப் பெற முடியவில்லை. தீயணைப்பு வீரர்கள் தீயை அணைக்கும் பணியில் ஈடுபட்டதாகவும், மீட்கப்பட்ட உடல்கள் பச்சை நிற பிளாஸ்டிக் தார்பாய்களின் கீழ் வரிசையாக வைக்கப்பட்டிருந்ததாகவும் கூறப்படுகிறது.
2021 ஆம் ஆண்டு ராணுவ சதிப்புரட்சியால் கட்டவிழ்த்து விடப்பட்ட மியான்மர் உள்நாட்டுப் போரில், மேற்கு மாநிலமான ராகைன் மிக மோசமான பாதிப்புகளைச் சந்தித்து வருகிறது. திங்களன்று தாக்குதலுக்கு உள்ளான இந்தச் சந்தைப் பகுதி, மோதல் தொடங்கியதில் இருந்து முக்கிய வணிக மையமாக விளங்கி வந்தது.
இந்திய எல்லையை கடக்கும் நதிக்கரையில் அமைந்துள்ள இந்தச் சந்தை, மியான்மரின் பிற பகுதிகளில் இருந்து பெருமளவு துண்டிக்கப்பட்டு, பட்டினியாலும் வறுமையாலும் தவிக்கும் இம்மாநிலத்திற்கான ஒரு முக்கிய வர்த்தக பாதையாக இருந்து வருகிறது. முற்றுகையிடப்பட்ட ஆயுதப் படைகளால் ஆக்கிரமிக்கப்பட்டுள்ள ஒரு சில நகர்ப்புறங்களைத் தவிர, ராகைன் மாநிலத்தின் பெரும்பாலான பகுதிகளை அரக்கான் ராணுவம் (AA) தனது கட்டுப்பாட்டில் வைத்துள்ளது.
ஆனால், ரஷ்யா மற்றும் சீனா தயாரித்த போர் விமானங்களைக் கொண்டு ராணுவம் அவர்களைத் தடுத்து வருகிறது. பள்ளிகள், மடாலயங்கள் மற்றும் மத விழாக்களில் பொதுமக்களைக் குறிவைத்து ராணுவம் கொடூரத் தாக்குதல்களில் ஈடுபடுவதாகவும், இது போர்க்குற்றங்களாகக் கருதப்படலாம் எனவும் மனித உரிமை குழுக்கள் குற்றம் சாட்டுகின்றன.
ஐ.நா. தரவுகளின்படி, இந்த மோதலின் விளைவாக ராகைன் மாநிலத்தில் கிட்டத்தட்ட ஐந்து லட்சம் மக்கள் இடம்பெயர்ந்துள்ளனர். 2021 ஆம் ஆண்டு ஆங் சான் சூகியின் தேர்ந்தெடுக்கப்பட்ட அரசாங்கத்தை அகற்றிய ராணுவ சதிப்புரட்சிக்குப் பிறகு, மியான்மரில் நடந்த மோதல்களில் 1,00,000க்கும் மேற்பட்ட மக்கள் கொல்லப்பட்டுள்ளனர் என்று மோதல் கண்காணிப்பு அமைப்பான ஆக்லெட் (ACLED) தெரிவித்துள்ளது.
