தவெக அரசு அத்தியாவசியப் பொருட்களின் விலைவாசி உயர்வை முழுமையாகக் கட்டுப்படுத்தத் தவறிவிட்டதாகஅதிமுக பொதுச்செயலாளர் எடப்பாடி கே. பழனிசாமி கடுமையாக குற்றம் சாட்டியுள்ளார். அத்துடன், மேட்டூர் அணையைத் திறந்து வைப்பதற்காகச் செய்யப்பட்ட செலவுகள் குறித்தும் முதலமைச்சரை அவர் விமர்சித்துள்ளார்.
தாராபுரம் இடைத்தேர்தலில் அதிமுக சார்பில் போட்டியிடும் வேட்பாளர் கே. பானுமதியை ஆதரித்துப் பிரச்சாரம் மேற்கொண்ட பழனிசாமி, இந்த இடைத்தேர்தலை மக்கள் மீது “திணிக்கப்பட்ட தேர்தல்” என்று வர்ணித்தார். அதிமுக சார்பில் போட்டியிட்டு வெற்றி பெற்ற சத்யபாமா, தனது சட்டமன்ற உறுப்பினர் பதவியை ராஜினாமா செய்துவிட்டுத் தமிழக வெற்றிக் கழகத்தில் இணைந்ததால் இந்த இடைத்தேர்தல் வந்துள்ளதாக குறிப்பிட்ட அவர், அவருக்கு எதிராக வாக்காளர்கள் தகுந்த தீர்ப்பளிக்க வேண்டும் என்றும் கேட்டுக்கொண்டார்.
தாராபுரத்தில் கடந்த செப்டம்பர் 30 அன்று தவெக தலைவரும் முதலமைச்சருமான சி. ஜோசப் விஜய் மேற்கொண்ட பிரச்சாரத்தைக் குறிப்பிட்ட எடப்பாடி பழனிசாமி, அதிமுகவின் முன்னாள் எம்.எல்.ஏ ராஜினாமா செய்த பிறகு, அவரையே மீண்டும் வேட்பாளராக களமிறக்கியது எந்த விதத்தில் நியாயம் என்று கேள்வி எழுப்பினார். அதிமுக நிர்வாகிகள் மற்றும் தொண்டர்களின் உழைப்பால் கடந்த தேர்தலில் 16,000 வாக்குகள் வித்தியாசத்தில் வெற்றி பெற்ற சத்யபாமா, அவருக்கு வாக்களித்த மக்களையும் கட்சித் தொண்டர்களையும் மதிக்கத் தவறிவிட்டார் என்றும் சாடினார்.
தற்போதைய ஆட்சியில் சட்ட ஒழுங்கு சீர்குலைந்துள்ளதாகக் குற்றம் சாட்டிய பழனிசாமி, போதைப்பொருள் புழக்கம், கொலை, கொள்ளை, பெண்களுக்கு எதிரான குற்றங்கள் மற்றும் சங்கிலிப் பறிப்பு போன்ற சம்பவங்கள் அதிகரித்து வருவதாகக் குறிப்பிட்டார். மேலும், மின்வெட்டு அடிக்கடி ஏற்படுவதைச் சுட்டிக்காட்டிய அவர், அதிமுக ஆட்சிக் காலத்தில் தடையற்ற மின்சார விநியோகத்தை உறுதி செய்ய மாதந்தோறும் தேவைக்கு ஏற்ப மின் கொள்முதல் திட்டமிடப்பட்டதாகக் கூறினார். தொடர்ந்து தாராபுரத்தில் நடைபெற்ற ரோட்ஷோ நிகழ்ச்சியிலும் பங்கேற்ற அவர், அதிமுக வேட்பாளருக்கு வாக்களிக்குமாறு கேட்டுக்கொண்டார்.
