பலரது வீடுகளிலும் மதிய உணவுக்குச் சமைத்து மீதமான சாதத்தை இரவிலோ அல்லது மறுநாளோ சூடுபடுத்தி உண்பதும், எலுமிச்சை சாதம், ஃபிரைடு ரைஸ் எனப் புது உணவுகளாக மாற்றிச் சாப்பிடுவதும் வழக்கமாக உள்ளது. ஆனால், சமைத்த சாதத்தைச் சரியான முறையில் கையாளாவிட்டால் அது தீவிர உணவு நஞ்சாதலுக்கு (Food Poisoning) வழிவகுக்கும் என உணவுப் பாதுகாப்பு மற்றும் உணவியல் நிபுணர்கள் எச்சரிக்கின்றனர். சாதத்தைச் சூடுபடுத்துவது மட்டுமே ஆபத்தல்ல; சமைத்த பிறகு அதை எவ்வளவு நேரம் அறை வெப்பநிலையில் வைத்திருக்கிறோம், எவ்வாறு சேமிக்கிறோம் என்பதே உடலுக்கு ஏற்படும் ஆபத்தை நிர்ணயிக்கிறது.
சமைக்காத அரிசியில் இயற்கையாகவே ‘பேசில்லஸ் செரியஸ்’ (Bacillus cereus) என்ற பாக்டீரியா காணப்படுகிறது. அரிசியைச் சமைத்த பின்னும் இந்த பாக்டீரியாவின் சில வித்துக்கள் அழியாமல் உயிருடன் இருக்கும் தன்மை கொண்டவை. குறிப்பாக, சமைத்த சாதத்தை நீண்ட நேரம் 4°C முதல் 60°C வரையிலான அறை வெப்பநிலையில் அப்படியே விட்டுவைக்கும்போது, அந்த வித்துக்கள் மிக வேகமாகப் பல்கிப் பெருகி நச்சுப் பொருட்களை உருவாக்குகின்றன. இந்த நச்சுகள் அதிக வெப்பத்தைத் தாங்கும் திறன் கொண்டவை என்பதால், பின்னர் சாதத்தை எவ்வளவு நேரம் அதிக தீயில் சூடுபடுத்தினாலும் அல்லது மசாலா சேர்த்து வதக்கினாலும் அவை அழிவதில்லை. இதனை உண்பதால் தீவிர வயிற்றுப்போக்கு, வாந்தி, வயிற்றுப்பிடிப்பு போன்ற பாதிப்புகள் ஏற்படுகின்றன.
எனவே, சாதம் சமைத்த பிறகு மிதமிஞ்சிய வெப்பம் குறைந்த உடனேயே அதை நீண்ட நேரம் வெளியில் வைக்காமல் விரைவாக ஃபிரிட்ஜில் வைக்க வேண்டும். பெரிய பாத்திரத்தில் மொத்தமாக வைக்காமல், ஆழம் குறைந்த சிறிய பாத்திரங்களில் பிரித்து வைத்தால் உள்பகுதியும் விரைவில் குளிரும். மேலும், ஃபிரிட்ஜில் இருந்து தேவையான அளவை மட்டுமே வெளியே எடுத்து, சாதத்தின் அனைத்துப் பகுதிகளும் சமமாக ஆவி பறக்கும் அளவிற்கு ஒருமுறை மட்டுமே சூடுபடுத்திச் சாப்பிட வேண்டும். மாறாக, மொத்தப் பாத்திரத்தையும் பலமுறை வெளியில் எடுப்பது, மீண்டும் மீண்டும் சூடுபடுத்துவது சாதத்தின் சத்துக்களையும் சுவையையும் கெடுப்பதுடன் உடலுக்குப் பெரும் உபாதைகளையும் உருவாக்கும்.
Read More : வடகிழக்கு பருவமழை எதிரொலி..!! சென்னையில் உச்ச அலெர்ட்..!! அதிகாரிகளுக்கு பறந்த அதிரடி உத்தரவு..!!
