நடிகர் சிவகார்த்திகேயன் சமீபத்தில் நடத்திய நற்பணி இயக்க நிர்வாகிகள் சந்திப்பு, அவரது அரசியல் எதிர்காலம் குறித்து புதிய விவாதத்தை உருவாக்கியுள்ளது. அரசியலுக்கு வருவதற்கான முன்னோட்டமாகவே இந்த நடவடிக்கைகள் பார்க்கப்பட வேண்டுமா என்ற கேள்வி எழுந்துள்ள நிலையில், மூத்த பத்திரிகையாளர் சேகுவேராவின் பேட்டி அதற்கு மேலும் வலு சேர்த்துள்ளது.
சென்னை போரூரில் நடைபெற்ற இந்த சந்திப்பில் சிவகார்த்திகேயன் தனது நற்பணி இயக்க நிர்வாகிகள் மற்றும் ரசிகர்களை சந்தித்தார். சாதாரண ரசிகர்கள் சந்திப்பைத் தாண்டி, நிர்வாகிகளை ஒருங்கிணைக்கும் வகையில் நிகழ்ச்சி அமைந்திருந்ததாக சேகுவேரா தனது பேட்டியில் குறிப்பிட்டுள்ளார்.
இதற்கு முன்பாக நடிகர் தனுஷ் தனது ரசிகர் மன்ற நிர்வாகிகளை மாவட்ட வாரியாக சந்தித்ததும், நடிகர் சூர்யா தனது ரசிகர் மன்ற நிர்வாகிகளுடன் ஆலோசனை நடத்தியதும் கவனம் பெற்றிருந்தது. இதனால் முன்னணி நடிகர்கள் தங்களது ரசிகர் அமைப்புகளை அடுத்தகட்டத்திற்கு கொண்டு செல்லும் நடவடிக்கைகளில் ஈடுபடுகிறார்களா என்ற விவாதமும் தொடர்கிறது.
இந்தச் சூழலில், நடிகர் விஜய்யின் அரசியல் வருகையை முக்கிய காரணமாக சுட்டிக்காட்டிய சேகுவேரா, விஜய் அரசியலில் களமிறங்கியதைத் தொடர்ந்து திரைத்துறையைச் சேர்ந்த மற்ற நடிகர்களுக்கும் அரசியலுக்குள் வருவதற்கான நம்பிக்கை ஏற்பட்டுள்ளதாக தனது கருத்தை தெரிவித்துள்ளார்.
அரசியலுக்கு வருவதற்கு முன்பு ரசிகர் மன்றங்களை சமூகப் பணிகளில் ஈடுபடுத்துவது, நிர்வாகிகளை மாவட்ட அளவில் ஒருங்கிணைப்பது போன்ற நடவடிக்கைகள் முக்கியமானதாக இருக்கும் என்றும் அவர் குறிப்பிட்டுள்ளார்.
சிவகார்த்திகேயனின் சமீபத்திய நிகழ்வை பொறுத்தவரை, அவர் ரசிகர்களை சந்தித்தது மட்டுமின்றி நற்பணி இயக்க நிர்வாகிகளுடனும் நேரம் செலவிட்டது கவனத்தை ஈர்த்துள்ளதாக சேகுவேரா தெரிவித்துள்ளார். குறிப்பிட்ட அரசியல் அறிவிப்பு எதுவும் வெளியாகாத நிலையில், இந்த சந்திப்பை வைத்து அவரது அடுத்தகட்ட நகர்வு குறித்து பல்வேறு கேள்விகள் எழுந்துள்ளதாகவும் அவர் கூறியுள்ளார்.
மேலும், சிவகார்த்திகேயன் நிகழ்ச்சியில் பேசிய “நான் செல்ஃப் மேட் கிடையாது. பப்ளிக் மேட். பீப்பிள் மேட்” என்ற வார்த்தைகளையும் அரசியல் பார்வையில் அணுக வேண்டியிருக்கிறது என சேகுவேரா தெரிவித்துள்ளார்.
இதற்கிடையே, சிவகார்த்திகேயனை அரசியல் களத்தில் முன்னிறுத்துவதன் மூலம் விஜய்யின் அரசியல் பயணத்தில் தாக்கத்தை ஏற்படுத்தும் முயற்சி நடப்பதாகவும் சேகுவேரா குற்றம்சாட்டியுள்ளார். குறிப்பாக இடைத்தேர்தல் நடைபெறும் சூழலில் இந்த சந்திப்பு நடத்தப்பட்டிருப்பது தொடர்பாகவும் அவர் கேள்வி எழுப்பியுள்ளார்.
அதேநேரத்தில், சிவகார்த்திகேயன் அரசியலுக்கு வருவது குறித்து இதுவரை எந்த அதிகாரப்பூர்வ அறிவிப்பையும் வெளியிடவில்லை. எனவே, அவரது தற்போதைய நற்பணி இயக்க செயல்பாடுகள் அரசியல் பயணத்திற்கான தொடக்கமா அல்லது ரசிகர் அமைப்பை வலுப்படுத்தும் நடவடிக்கையா என்பது அவரது அடுத்தகட்ட அறிவிப்புகளில்தான் தெளிவாகும்.
Also Read: விசாரணைக்கு அழைத்த போலீசார்.. தீப்பற்றி எரிந்த நபர்.. காவல் நிலையத்தில் நடந்த அதிர்ச்சி சம்பவம்!
