அரசுத் தலைவராக தான் நிறைவு செய்துள்ள 25 ஆண்டுகாலப் பயணத்தைத் திரும்பிப் பார்த்த பிரதமர் நரேந்திர மோடி, 2047-க்குள் ‘விக்சித் பாரத்’ (வளர்ந்த இந்தியா) என்ற இலக்கை அடைவதில் தனது உறுதியை மீண்டும் புதுப்பித்துள்ளார். டெல்லியில் உள்ள இந்திரா காந்தி உள்விளையாட்டு அரங்கில் நடைபெற்ற ‘சேவா ஜோதி’ நிகழ்ச்சியில் உரையாற்றிய அவர், பொதுமக்களுக்கு நன்றி தெரிவித்ததுடன், கடந்த 25 ஆண்டுகளில் தன்னை செதுக்கிய அனுபவங்களைப் பகிர்ந்து கொண்டார்.
இந்நிகழ்ச்சியில் உரையாற்றிய பிரதமர் மோடி, “இன்று நான் திரும்பிப் பார்க்கும்போது, மனது முழுவதும் நன்றியுணர்வு மட்டுமே எஞ்சுகிறது. எனக்கு எதையாவது கற்றுக்கொடுத்த ஒவ்வொரு மனிதருக்கும், ஒவ்வொரு நிகழ்வுக்கும் நான் கடமைப்பட்டுள்ளேன்” என்று தெரிவித்தார். மேலும், “எனக்கு வெற்றியைத் தந்தவர்கள் பணிவோடு இருக்கக் கற்றுக் கொடுத்தார்கள்; என்னை வீழ்த்தியவர்கள் மீண்டும் எழுந்து நிற்கக் கற்றுக் கொடுத்தார்கள். நல்விரும்பிகள் என்னை ஊக்கப்படுத்தினர், விமர்சகர்களோ எனக்குள் ஆழமாகச் செல்ல வழிவகுத்தனர். என்னை ஆதரித்தவர்கள் நம்பிக்கையின் சக்தியையும், எதிர்த்தவர்கள் ஜனநாயகத்தின் சக்தியையும் புரியவைத்தனர்” என்றார்.
ஆர்எஸ்எஸ்ஸின் அர்ப்பணிப்பை நினைவு கூர்ந்த அவர், இந்தியாவின் கலாச்சார ஆன்மாவின் காவலர்களாக அவர்கள் விளங்குவதாகவும், மனிதாபிமானத்தின் சேவகர்களாக வாழ்வதாகவும் பெருமிதத்துடன் குறிப்பிட்டார். தமக்கு எப்போதும் தனிமை உணர்வு ஏற்பட்டதில்லை என்றும், தேசப் சேவைக்காகத் தங்களை அர்ப்பணித்துள்ள எண்ணற்ற சுயம்சேவகர்கள் தமக்கு உந்துதலாக இருப்பதாகவும் அவர் தெரிவித்தார்.
தனது வாழ்நாளில் எதிர்கொண்ட பல முக்கிய நிகழ்வுகள் தமக்கு வாழ்வியல் பாடங்களைக் கற்றுக்கொடுத்ததாக பிரதமர் குறிப்பிட்டார். அதன்படி, 2001 ஆம் ஆண்டு பூஜ் (Bhuj) நிலநடுக்கம் “மீட்டமைப்பில் உறுதியுடன் இருக்கக் கற்றுக் கொடுத்தது”, சந்திரயான் மிஷன் “தோல்வியிலிருந்து மீண்டு எழச் சொன்னது”, மற்றும் கோவிட்-19 பெருந்தொற்று “நாட்டின் கூட்டு நனவின் முக்கியத்துவத்தை உணரச் செய்தது” என்றும் அவர் விவரித்தார்.
இந்தியாவின் உன்னதமான நாகரிக பாரம்பரியம் மற்றும் வேதாந்த சிந்தனைகள் குறித்துப் பேசிய அவர், நாட்டின் கலாச்சாரம் மனிதாபிமானத்தின் மீதான நம்பிக்கையை எப்போதும் மீட்டெடுத்து வருவதாகக் கூறினார். ஊடகங்கள் தமக்கு வழங்கிய கசப்பான மற்றும் தித்திப்பான அனுபவங்கள் தம்மைக் முன்னோக்கி நகர்த்த உதவியதாகவும் அவர் நன்றியுடன் குறிப்பிட்டுக் கொண்டார்.
இந்த 25 ஆண்டு மைல்கல் என்பது கடந்த காலத்தை நினைவு கூர்வது மட்டுமல்ல, நாட்டின் எதிர்காலத்திற்கான உறுதிமொழியைப் புதுப்பிக்கும் தருணம் என்றும் அவர் தெரிவித்தார். “இந்த நாள் ஒரு உறுதியை வெளிப்படுத்தும் நாளாகும்; ‘நாங்கள் அதை நிச்சயம் அடைவோம். நாங்கள் அதைச் சாதிப்போம், சாதிப்போம், சாதிப்போம்’ என்ற லட்சியத்தை நிறைவேற்றும் நாளாகும்” என்று கூறி, 2047-க்குள் வளர்ந்த இந்தியாவை உருவாக்கும் தனது அசைக்க முடியாத இலக்கை பிரதமர் மோடி மீண்டும் உறுதிப்படுத்தினார்.
