ஜிபூட்டியில் இருந்து ஏமன் நோக்கிச் சென்ற படகு கடலில் கவிழ்ந்ததில் 15 குழந்தைகள் உட்பட 109 பேர் உயிரிழந்துள்ளனர். மேலும், 116 பேரைக் காணவில்லை. நூற்றுக்கணக்கானோர் பயணம் செய்த படகு விபத்துக்குள்ளான சம்பவம் பெரும் சோகத்தை ஏற்படுத்தியுள்ளது.
கிழக்கு ஆப்பிரிக்க நாடான ஜிபூட்டியின் ஓபோக் நகருக்கு வடக்கே அக்டோபர் 8ஆம் தேதி இரவுக்கும் 9ஆம் தேதிக்கும் இடைப்பட்ட நேரத்தில் இந்த விபத்து நிகழ்ந்துள்ளது. சுமார் 350 பேரை ஏற்றிச் சென்ற படகு கடலில் கவிழ்ந்ததாக உயிர் தப்பியவர்கள் தெரிவித்துள்ளனர்.
இந்த விபத்தில் உயிரிழந்தவர்களில் 15 குழந்தைகளும் அடங்குவர். படகில் பயணம் செய்தவர்களில் சிலர் உயிர் தப்பியுள்ள நிலையில், காணாமல் போனவர்களைத் தேடும் பணி தொடர்ந்து நடைபெற்று வருகிறது.
விபத்து நடந்த பகுதியிலுள்ள உள்ளூர் அதிகாரிகளுடன் இணைந்து சர்வதேச புலம்பெயர்ந்தோர் அமைப்பின் மீட்புக் குழுவினரும் பணியாற்றி வருகின்றனர். உயிர் பிழைத்தவர்களுக்கு அவசர உதவிகள் வழங்கப்பட்டு வருகின்றன. காணாமல் போனவர்களின் நிலை இன்னும் தெரியாததால், உயிரிழப்பு எண்ணிக்கை அதிகரிக்கக்கூடும் என்ற அச்சம் நிலவுகிறது.
எத்தியோப்பியா உள்ளிட்ட கிழக்கு ஆப்பிரிக்க நாடுகளைச் சேர்ந்த பலர் வேலைவாய்ப்பு மற்றும் சிறந்த வாழ்க்கையைத் தேடி ஜிபூட்டி வழியாக ஏமன் சென்றடைய முயற்சிக்கின்றனர். இத்தகைய பயணங்களில் அதிக எண்ணிக்கையிலானோர் சிறிய படகுகளில் பயணிப்பதால், கடலில் விபத்துகள் ஏற்படும் அபாயம் அதிகரிக்கிறது.
இந்த நிலையில், ஒரே படகு விபத்தில் நூற்றுக்கும் மேற்பட்டோர் உயிரிழந்துள்ளதுடன், பலர் மாயமாகியிருப்பது பெரும் அதிர்ச்சியை ஏற்படுத்தியுள்ளது. மீட்புப் பணிகள் தொடர்ந்து நடைபெற்று வரும் நிலையில், விபத்து தொடர்பான கூடுதல் விவரங்கள் பின்னர் தெரியவரும்.
Also Read: தங்கப் பதக்கம் வென்ற மகளின் கனவுக்காக நிலத்தையே விற்ற பெற்றோர்.. போலி சேர்க்கை ஆவணங்களால் நேர்ந்த துயரம்!
