ராகுல் காந்தி தலைமையில் அதிரடி.. தேர்தல் ஆணையர் விவகாரத்தில் புதிய திருப்பம்!

தலைமைத் தேர்தல் ஆணையர் ஞானேஷ் குமாரை பதவியில் இருந்து நீக்கக் கோரி, காங்கிரஸ் தலைமையிலான இந்தியா கூட்டணி கட்சிகள் டெல்லியில் திங்கள்கிழமை போராட்டத்தில் ஈடுபட்டன. தேர்தல் முறைகேடுகள் நடந்ததாகக் கூறப்படும் புகார்கள் குறித்து நீதித்துறை தலையிட்டு விசாரணை நடத்த வேண்டும் என்றும் எதிர்க்கட்சிகள் வலியுறுத்தியுள்ளன.

காங்கிரஸ் தலைவர் மல்லிகார்ஜுன கார்கே, மக்களவை எதிர்க்கட்சித் தலைவர் ராகுல் காந்தி, பிரியங்கா காந்தி, சமாஜ்வாதி கட்சித் தலைவர் அகிலேஷ் யாதவ் உள்ளிட்ட முக்கிய எதிர்க்கட்சித் தலைவர்கள் இந்தப் பேரணியில் பங்கேற்றனர். உச்ச நீதிமன்றத்தை நோக்கி அவர்கள் பேரணியாகச் சென்று, தேர்தல் முறைகேடு தொடர்பாகப் புதிய மனுவையும் தாக்கல் செய்தனர்.

இதற்கிடையே, செவ்வாய்க்கிழமையும் டெல்லியில் பெரிய அளவிலான போராட்டம் நடைபெறுமா என்ற கேள்வி எழுந்தது. உச்ச நீதிமன்றத்தில் மனு தாக்கல் செய்யப்பட்டுள்ளதால், மீண்டும் பேரணி அல்லது போராட்டம் நடத்த வேண்டிய அவசியமில்லை என காங்கிரஸ் கூட்டணிக் கட்சிகளிடம் தெரிவித்துள்ளதாக மார்க்சிஸ்ட் கம்யூனிஸ்ட் கட்சியின் பொதுச் செயலாளர் எம்.ஏ. பேபி கூறியுள்ளார்.

இதுதொடர்பாக காங்கிரஸ் தரப்பில் தமக்கு தொலைபேசி அழைப்பு வந்ததாகவும், உச்ச நீதிமன்றத்தை நோக்கிய பேரணி மற்றும் மனு தாக்கலுக்குப் பிறகு செவ்வாய்க்கிழமை மீண்டும் போராட்டம் நடத்தத் திட்டமில்லை எனத் தெரிவிக்கப்பட்டதாகவும் அவர் குறிப்பிட்டுள்ளார்.

மேலும், பண்டிகைக் காலத்தை முன்னிட்டு எதிர்க்கட்சித் தலைவர்களுக்கும் பல்வேறு நிகழ்ச்சிகள் இருப்பதாக திரிணாமூல் காங்கிரஸ் எம்.பி. டெரிக் ஓ பிரையன் தெரிவித்துள்ளார். இருப்பினும், இளைஞர் காங்கிரஸ் மற்றும் சேவா தளம் உள்ளிட்ட அமைப்புகள் பல்வேறு மாநிலங்களில் போராட்டங்களை நடத்த வாய்ப்புள்ளதாகத் தகவல்கள் வெளியாகியுள்ளன.

இந்த விவகாரத்தில் அடுத்தகட்ட நடவடிக்கைகளைத் தீர்மானிக்க, இந்தியா கூட்டணிக் கட்சிகளின் எம்.பி.க்கள், மாணவர் அமைப்புகள் மற்றும் சிவில் சமூகப் பிரதிநிதிகளுடன் ராகுல் காந்தி ஆலோசனை நடத்தத் திட்டமிட்டுள்ளார். இதற்காக, தனது இல்லத்தில் நடைபெறும் தேநீர் சந்திப்புக்கு அவர்களுக்கு அழைப்பு விடுத்துள்ளதாக இந்தியா டுடே செய்தி வெளியிட்டுள்ளது. இதற்கிடையே, தேர்தல் முறைகேடு தொடர்பாக எதிர்க்கட்சிகள் தாக்கல் செய்த மனு குறித்து காங்கிரஸ் மூத்த தலைவரும் வழக்கறிஞருமான அபிஷேக் மனு சிங்வி டெல்லியில் செய்தியாளர் சந்திப்பில் விளக்கம் அளிக்க உள்ளார்.

மறுபுறம், எதிர்க்கட்சிகளின் போராட்டத்துக்குப் பதிலளித்துள்ள பாஜக, காங்கிரஸ் நாட்டைச் சீர்குலைக்க முயற்சிப்பதாகக் குற்றம்சாட்டியுள்ளது. தேர்தல்களில் தோல்வியடையும் போதெல்லாம் ஜனநாயக அமைப்புகளைக் குறை கூறுவதை காங்கிரஸ் வழக்கமாகக் கொண்டுள்ளதாகவும் பாஜக விமர்சித்துள்ளது.

Also Read: கணவருடன் வாக்குவாதம்.. பூச்சிக்கொல்லி மருந்தைக் குடித்த மனைவி.. அடுத்தடுத்து நடந்த சோகம்!