பொங்கல் திருநாளை முன்னிட்டு பொதுமக்களுக்கு விநியோகிக்கப்படும் இலவச வேட்டி மற்றும் சேலைகளை உற்பத்தி செய்யும் நெசவாளர்களுக்கான நெசவுக் கூலியை கணிசமாக உயர்த்தி தமிழக அரசு புதிய அரசாணையை வெளியிட்டுள்ளது.
தமிழக கைத்தறி மற்றும் துணிநூல் துறை வாயிலாக ஆண்டுதோறும் பொங்கல் பண்டிகையை முன்னிட்டு ஏழை எளிய மக்களுக்கு விலையில்லா வேட்டி, சேலைகள் வழங்கப்பட்டு வருகின்றன. இந்த திட்டத்தில் நடப்பாண்டு புதிய ரக ஆடைகளை உற்பத்தி செய்ய திட்டமிடப்பட்ட நிலையில், அதற்கான நெசவுக் கூலியை திருத்தி அமைப்பது தொடர்பாக அரசுக்கு பரிந்துரை செய்ய 5 பேர் கொண்ட சிறப்பு வல்லுநர் குழு அமைக்கப்பட்டது.
இக்குழுவினர் பல்வேறு மாவட்டங்களுக்கும் நேரடியாகச் சென்று விசைத்தறி மற்றும் பெடல்தறி நெசவாளர்களை சந்தித்து, அவர்களின் பணிச்சூழல் மற்றும் நியாயமான கூலி உயர்வு தொடர்பான கோரிக்கைகளைக் கேட்டறிந்து அரசுக்கு விரிவான அறிக்கை சமர்ப்பித்தனர்.
அந்த பரிந்துரைகளை முழுமையாக ஏற்றுக்கொண்டுள்ள தமிழக அரசு, நெசவுக் கூலியை முறைப்படி உயர்த்தி உத்தரவிட்டுள்ளது. இதன்படி, பெடல்தறியில் உற்பத்தி செய்யப்படும் ஒரு சேலைக்கான கூலி ரூ.125.72 ஆகவும், வேட்டிக்கான கூலி ரூ.49.99 ஆகவும் நிர்ணயிக்கப்பட்டுள்ளது. அதேபோல, விசைத்தறியில் நெய்யப்படும் சேலை ஒன்றுக்கு ரூ.54.81 மற்றும் வேட்டிக்கு ரூ.23.34 வீதமும் கூலி உயர்த்தி வழங்கப்பட உள்ளது.
இந்த கூலி உயர்வு காரணமாக அரசுக்கு கூடுதலாக ரூ.13.66 கோடி நிதிச்சுமை ஏற்படும் என கணக்கிடப்பட்டுள்ளது. இந்த கூடுதல் செலவினத்தை, 2026-2027-ஆம் நிதியாண்டின் வரவு செலவுத் திட்டத்தில் வேட்டி சேலை வழங்கும் திட்டத்திற்காக ஏற்கனவே ஒதுக்கீடு செய்யப்பட்டுள்ள நிதியிலிருந்து பயன்படுத்தி மேற்கொள்ள கைத்தறி இயக்குநருக்கு அனுமதி வழங்கி தமிழக அரசு ஆணை பிறப்பித்துள்ளது. அரசின் இந்த முடிவால் தமிழகம் முழுவதும் உள்ள லட்சக்கணக்கான நெசவாளர் குடும்பங்கள் பெரும் மகிழ்ச்சி அடைந்துள்ளன.
