கால்பந்து ஜாம்பவான் லியோனல் மெஸ்ஸியின் பெயரில் பெரு நாட்டு மலைகளில் கண்டறியப்பட்ட புதிய வகை மூலிகைத் தாவரத்திற்கு ‘சால்வியா மெஸ்ஸி’ (Salvia messii) எனப் பெயரிடப்பட்டுள்ளது. இதன் மூலம் உலகிலேயே தன் பெயரில் அதிக உயிரினப் பெயர்களைக் கொண்ட கால்பந்து வீரர் என்ற கின்னஸ் சாதனையை மெஸ்ஸி மேலும் உயர்த்தியுள்ளார்.
பல்லி, சிலந்தி, தொல்லுயிர் பிராச்சியோபாட், காண்டூர் பறவை மற்றும் பூஞ்சை ஆகியவற்றைத் தொடர்ந்து, பெரு நாட்டு ஆண்டிஸ் மலைத்தொடரில் காணப்படும் இந்த சேஜ் (Sage) வகைத் தாவரம் மெஸ்ஸியின் பெயரிடப்பட்ட 6-வது உயிரினமாகும். இந்தத் தாவரத்தின் மலர்கள் அர்ஜென்டினா நாட்டின் நீல மற்றும் வெள்ளை நிறங்களை பிரதிபலிக்கும் வகையில் உள்ளன. தாவரவியல் பெயரிடும் முறைப்படி, மெஸ்ஸியின் குடும்பப் பெயர் இலத்தீன் மொழியில் ‘மெஸ்ஸிஸ்’ (Messi’s sage) என்று மாற்றப்பட்டுள்ளது. எனினும், இத்தாவரம் தற்போது ‘அழிந்துவரும் இனம்’ (Endangered) பட்டியலில் வைக்கப்பட்டுள்ளது குறிப்பிடத்தக்கது.
சான் மார்கோஸ் தேசிய பல்கலைக்கழகத்தின் ஆராய்ச்சியாளர் பால் கோன்சலஸ் தலைமையிலான குழுவினர் இந்த புதிய தாவர இனத்தைக் கண்டறிந்துள்ளனர். இவர்களின் ஆய்வு முடிவுகள் ‘பைட்டோடாக்சா’ (Phytotaxa) என்ற தாவரவியல் இதழில் அக்டோபர் மாதம் வெளியிடப்பட்டது.
முன்னதாக கடந்த 2024 மே மாதம், தனது பெயரில் 5 உயிரினங்களைக் கொண்டிருந்ததற்காக மெஸ்ஸி கின்னஸ் சாதனை படைத்திருந்தார். தற்போது இந்த புதிய தாவரத்துடன் சேர்த்து அந்த எண்ணிக்கை ஆறாக உயர்ந்துள்ளது. மற்றபடி, மறைந்த கால்பந்து ஜாம்பவான் மரடோனா பெயரில் 4 உயிரினங்கள் பெயரிடப்பட்டிருந்தாலும், அவற்றில் ஒன்று பின்னர் தகுதியிழந்துள்ளது குறிப்பிடத்தக்கது.
தற்போது 39 வயதாகும் லியோனல் மெஸ்ஸி, அமெரிக்காவின் இன்டர் மியாமி அணிக்காகத் தொடர்ந்து விளையாடி வருவதுடன், 2026 பாலன் டி ஆர் (Ballon d’Or) விருதுக்கான 30 பேர் கொண்ட பரிந்துரைப் பட்டியலிலும் இடம்பிடித்துள்ளார்.
