ஆப்பிளின் அடுத்த தலைமுறை ஐபோன் அறிமுக விழா இந்த ஆண்டு நிறுவனத்தின் மிக முக்கியமான நிகழ்வுகளில் ஒன்றாக அமைய உள்ளது. செப்டம்பர் 9-ம் தேதி நடைபெறும் நிகழ்வில், புதிய ஐபோன் 18 ப்ரோ, ஐபோன் 18 ப்ரோ மேக்ஸ் மாடல்களுடன், ஆப்பிளின் முதல் மடிக்கக்கூடிய ஐபோனும் அறிமுகமாகும் என எதிர்பார்க்கப்படுகிறது. இதுதவிர, புதிய ஆப்பிள் வாட்ச், ஏர்பாட்ஸ் உள்ளிட்ட சாதனங்களும் இடம்பெற உள்ளன.
“Surprise and Shine” என்ற பெயரில் நடைபெறும் இந்த நிகழ்வு, அமெரிக்க பசிபிக் நேரப்படி காலை 10 மணிக்கு தொடங்கும். இந்திய நேரப்படி இது செப்டம்பர் 9-ம் தேதி இரவு 10.30 மணிக்கு நடைபெறும். ஆப்பிளின் புதிய தலைமைச் செயல் அதிகாரியாக பொறுப்பேற்றுள்ள ஜான் டெர்னஸ் முதல் முறையாக ஐபோன் அறிமுக நிகழ்ச்சியை தலைமை தாங்க உள்ளதும் இந்த நிகழ்வுக்கு கூடுதல் முக்கியத்துவம் அளிக்கிறது. 15 ஆண்டுகள் ஆப்பிள் நிறுவனத்தை வழிநடத்திய டிம் குக் தற்போது நிர்வாகத் தலைவராக உள்ளார்.
இந்த ஆண்டு ஆப்பிள் அறிமுகப்படுத்தும் சாதனங்களில் மிகப்பெரிய எதிர்பார்ப்பை உருவாக்கியிருப்பது மடிக்கக்கூடிய ஐபோன். வதந்திகளில் “iPhone Ultra” என குறிப்பிடப்படும் இந்த சாதனம், புத்தகம் போல நடுவில் மடிக்கக்கூடிய வடிவமைப்பைக் கொண்டிருக்கும். வெளிப்புறத்தில் சுமார் 5.5 இன்ச் OLED திரையும், சாதனத்தைத் திறந்தவுடன் சுமார் 7.8 இன்ச் அளவிலான பெரிய OLED திரையும் கிடைக்கும் என எதிர்பார்க்கப்படுகிறது.
திறக்கப்பட்ட நிலையில் இந்த ஐபோன், ஐபேட் மினி அளவிலான அகலமான சாதனத்தைப் போல் தோற்றமளிக்கும். மடிக்கக்கூடிய போன்களில் முக்கியமான பிரச்சினையாக இருக்கும் திரை மடிப்பு மற்றும் hinge ஆகியவற்றில் ஆப்பிள் அதிக கவனம் செலுத்தியுள்ளது. முற்றிலும் crease இல்லாத திரையை உருவாக்கும் முயற்சி எதிர்பார்த்த அளவுக்கு சாத்தியமாகாத நிலையில், மிகக் குறைவாகத் தெரியும் மடிப்பு மற்றும் நீடித்து உழைக்கும் liquid metal hinge இடம்பெறலாம்.
தொடர்ந்து திறந்து மூடும் பயன்பாட்டால் திரையில் ஏற்படும் நுண்ணிய சேதங்களை குறைக்க சிறப்பு தொழில்நுட்பமும் பயன்படுத்தப்படலாம். மைக்ரோ கிராக்களை நிரப்பும் வகையிலான optically clear adhesive தொழில்நுட்பம் திரையின் நீடித்த பயன்பாட்டுக்கு உதவும் என எதிர்பார்க்கப்படுகிறது.
வடிவமைப்பில் மெல்லிய தன்மைக்கும் ஆப்பிள் அதிக முக்கியத்துவம் அளித்துள்ளது. திறந்த நிலையில் சுமார் 4.5 மி.மீ. தடிமன் கொண்டதாகவும், மடக்கிய நிலையில் சுமார் 9 மி.மீ. தடிமன் கொண்டதாகவும் இந்த சாதனம் இருக்கலாம். இதன் மூலம் ஆப்பிள் தயாரித்துள்ள மிக மெல்லிய ஐபோனாக இது மாறும் வாய்ப்புள்ளது.
இந்த மெல்லிய வடிவமைப்புக்காக சில முக்கிய அம்சங்களில் மாற்றம் செய்ய வேண்டிய சூழலும் ஏற்பட்டுள்ளது. குறிப்பாக Face ID-க்குத் தேவையான TrueDepth கேமரா அமைப்புக்கு போதுமான இடம் இல்லாததால், மடிக்கக்கூடிய ஐபோனில் Face ID-க்கு பதிலாக Touch ID பயன்படுத்தப்படலாம். இந்த Touch ID சென்சார் பக்கவாட்டில் உள்ள power button-ல் பொருத்தப்படலாம்.
அதே நேரத்தில், முன்பக்க கேமரா வசதி நீக்கப்படாது. சாதனம் மடிக்கப்பட்ட நிலையிலும் திறந்த நிலையிலும் selfie எடுக்கவும் வீடியோ அழைப்புகளை மேற்கொள்ளவும் ஏற்ற வகையில், உள் மற்றும் வெளிப்புறத் திரைகளுக்கான கேமரா அமைப்புகள் இடம்பெறலாம்.
பின்புற கேமரா அமைப்பிலும் வழக்கமான Pro மாடல்களிலிருந்து மாற்றம் இருக்கலாம். உட்புற இடவசதி குறைவாக இருப்பதால் மூன்று கேமராக்களுக்குப் பதிலாக Wide மற்றும் Ultra Wide என இரண்டு கேமராக்கள் இடம்பெறலாம். இதனால் சாதனம் மடிக்கப்பட்ட நிலையிலும் திறந்த நிலையிலும் கேமராவைப் பயன்படுத்த முடியும்.
MagSafe சார்ஜிங் வசதி குறித்தும் எதிர்பார்ப்பு நிலவுகிறது. கசிந்ததாக வெளியான dummy மாடல்களில் காந்த வளையம் வெளிப்படையாகத் தெரியாததால் சந்தேகம் எழுந்த நிலையில், MagSafe சார்ஜிங் வசதி மடிக்கக்கூடிய ஐபோனில் இடம்பெறும் என Bloomberg தகவல்களை மேற்கோள்காட்டி MacRumors குறிப்பிட்டுள்ளது.
செயல்திறனைப் பொறுத்தவரை, 2nm தொழில்நுட்பத்தில் உருவாகும் A20 Pro சிப் புதிய மடிக்கக்கூடிய ஐபோனில் இடம்பெறலாம். A19 Pro உடன் ஒப்பிடும்போது சுமார் 18 சதவீதம் கூடுதல் செயல்திறனும், 30 சதவீதம் வரை மேம்பட்ட மின்சார செயல்திறனும் கிடைக்கலாம். 12GB RAM, மேம்படுத்தப்பட்ட GPU மற்றும் அதிக L2 cache உள்ளிட்ட மாற்றங்களும் இடம்பெற வாய்ப்புள்ளது.
ஆப்பிளின் சொந்த C2 modem-ம் இந்த தலைமுறை ஐபோன்களில் முக்கிய பங்கு வகிக்கலாம். முந்தைய C1X modem-ஐவிட அதிக வேகம் மற்றும் மேம்பட்ட மின்சார செயல்திறனை வழங்கும் வகையில் இது உருவாக்கப்பட்டிருக்கலாம். எனினும், mmWave 5G ஆதரவு தொடர்பான விவரம் இன்னும் தெளிவாகவில்லை. குறிப்பாக அமெரிக்க சந்தைக்கான மாடல்களில் mmWave வசதி தேவைப்படும் நிலையில், C2 modem அதனை ஆதரிக்கவில்லை என்றால் Qualcomm modem பயன்படுத்தப்படலாம்.
பேட்டரியிலும் மடிக்கக்கூடிய ஐபோன் குறிப்பிடத்தக்க முன்னேற்றத்தைப் பெறலாம். சாதனத்தின் இரு பகுதிகளிலும் பேட்டரி பொருத்தப்படும் என்பதால், மொத்த பேட்டரி திறன் 5,400mAh முதல் 5,800mAh வரை இருக்கலாம். தற்போதைய iPhone 17 Pro Max மாடலில் 5,088mAh பேட்டரி இருப்பதால், புதிய மாடல் அதிக திறன் கொண்டதாக அமைய வாய்ப்புள்ளது.
நிறங்களைப் பொறுத்தவரை ஆப்பிள் அதிகமான தேர்வுகளை வழங்காமல், Silver/White மற்றும் கருப்பு நிறத்தை ஒட்டிய ஆழமான Indigo என இரண்டு நிறங்களில் மடிக்கக்கூடிய ஐபோனை அறிமுகப்படுத்தலாம்.
புதிய சாதனத்தின் மென்பொருள் அனுபவமும் முக்கியமான மாற்றத்தைப் பெறும். வெவ்வேறு திரை அளவு மற்றும் aspect ratio-வுக்கு ஏற்ப செயலிகளை உருவாக்க டெவலப்பர்களை ஆப்பிள் தயார்படுத்தி வருகிறது. திறந்த நிலையில் பெரிய திரையைப் பயன்படுத்தும் போது side-by-side apps, multitasking மற்றும் sidebar போன்ற iPad அனுபவத்தை ஒத்த வசதிகள் கிடைக்கலாம்.
விலையைப் பொறுத்தவரை, இது ஆப்பிளின் மிக உயர்ந்த விலை கொண்ட ஐபோன்களில் ஒன்றாக அமையலாம். தொடக்க விலை குறைந்தபட்சம் 2,000 அமெரிக்க டாலராகவும், அதிக storage கொண்ட மாடல்களின் விலை 2,500 டாலரைத் தாண்டவும் வாய்ப்புள்ளதாக MacRumors தகவல்கள் தெரிவிக்கின்றன.
இதனுடன் அறிமுகமாகும் iPhone 18 Pro மற்றும் iPhone 18 Pro Max மாடல்கள், தற்போதைய iPhone 17 Pro வரிசையின் வடிவமைப்பை பெரும்பாலும் தொடரலாம். வெளிப்புற வடிவமைப்பில் பெரிய மாற்றம் இல்லாவிட்டாலும், Pro Max மாடல் அதிக திறன் கொண்ட பேட்டரிக்காக சற்று தடிமனாகவும் கனமாகவும் இருக்கலாம்.
கேமரா பகுதியில் இந்த முறை முக்கியமான மாற்றம் வர உள்ளது. புதிய variable-aperture main camera மூலம் புகைப்படம் எடுக்கும்போது lens-க்குள் செல்லும் ஒளியின் அளவை பயனர்கள் கூடுதல் கட்டுப்பாட்டுடன் நிர்வகிக்க முடியும். அதிக வெளிச்சம் உள்ள சூழலில் சிறிய aperture-ம், குறைந்த வெளிச்சத்தில் பெரிய aperture-ம் பயன்படுத்தி புகைப்படத் தரத்தை மேம்படுத்த முடியும். பின்னணி blur-ஐ கட்டுப்படுத்துவதற்கும் இந்த வசதி கூடுதல் வாய்ப்பை வழங்கும்.
இந்த variable-aperture கேமரா iPhone 18 Pro மற்றும் Pro Max இரண்டிலும் இடம்பெறுமா அல்லது Pro Max மாடலுக்கு மட்டும் வழங்கப்படுமா என்பது இன்னும் தெளிவாகவில்லை. Samsung உருவாக்கிய மூன்று அடுக்கு stacked image sensor-ஐ ஆப்பிள் பயன்படுத்தலாம் என்ற தகவலும் வெளியாகியுள்ளது. இதன் மூலம் கேமராவின் response time மற்றும் low-light photography மேம்படலாம்.
Telephoto கேமராவிலும் அதிக aperture வழங்கப்படலாம். இதனால் அதிக வெளிச்சத்தை கேமரா சென்சார் பெற முடியும். Ultra Wide மற்றும் front camera-வில் பெரிய மாற்றம் இருக்காது என எதிர்பார்க்கப்படுகிறது. Camera Control button-லும் மாற்றம் வரலாம்; swipe மூலம் camera settings மாற்றும் capacitive layer-ஐ ஆப்பிள் நீக்கி எளிமைப்படுத்தலாம்.
iPhone 18 Pro மாடல்களின் பேட்டரி திறனிலும் முன்னேற்றம் எதிர்பார்க்கப்படுகிறது. குறிப்பாக iPhone 18 Pro Max-ல் சுமார் 5,567mAh பேட்டரி இடம்பெறலாம். அதனுடன் 2nm A20 Pro chip மற்றும் மேம்படுத்தப்பட்ட LTPO+ display இணைவதால் பேட்டரி பயன்பாட்டு நேரம் அதிகரிக்கலாம்.
விலை உயர்வும் இந்த தலைமுறையில் முக்கிய அம்சமாக இருக்கலாம். Memory மற்றும் storage உள்ளிட்ட உதிரிபாகங்களின் செலவு அதிகரிப்பு காரணமாக iPhone 18 Pro வரிசையின் விலை, முந்தைய Pro மாடல்களை விட சுமார் 100 முதல் 300 அமெரிக்க டாலர் வரை அதிகரிக்க வாய்ப்புள்ளது.
ஐபோன் மட்டுமின்றி ஆப்பிள் வாட்ச் வரிசையிலும் புதிய சாதனங்கள் இடம்பெறலாம். Apple Watch Series 12-ல் பெரிய வடிவமைப்பு மாற்றம் இல்லாவிட்டாலும், Ceramic case மீண்டும் அறிமுகமாகலாம். மேம்படுத்தப்பட்ட processor மற்றும் உடல்நலம், fitness tracking தொடர்பான புதிய வசதிகளும் கிடைக்கலாம்.
இதில் நாள் முழுவதும் heart-rate data சேகரிக்கும் புதிய வசதியை ஆப்பிள் பரிசோதித்து வருகிறது. இந்தத் தகவல்களை Health app-ல் பயன்படுத்தி, Oura Ring போன்ற சாதனங்கள் வழங்கும் wellness insights-க்கு இணையான தகவல்களை பயனர்களுக்கு வழங்கும் புதிய அம்சம் அறிமுகமாகலாம்.
Apple Watch Ultra 4-லும் தற்போதைய வடிவமைப்பு தொடரும் நிலையில், புதிய processor மற்றும் செயல்திறன் மேம்பாடுகள் இடம்பெறலாம். AirPods வரிசையிலும் புதுப்பிப்பு வருவதற்கான வாய்ப்பு உள்ளது. macOS 26.7 release candidate-ல் AirPods 5 தொடர்பான குறிப்புகள் கண்டறியப்பட்டதாக தகவல்கள் வெளியாகியுள்ளதால், புதிய earbuds ஐபோன் அறிமுகத்துடன் வெளியாகலாம் என்ற எதிர்பார்ப்பு உள்ளது.
AirPods 5-ல் மேம்படுத்தப்பட்ட H3 chip பயன்படுத்தப்பட்டால், ஒலி தரம் மற்றும் latency ஆகியவற்றில் முன்னேற்றம் கிடைக்கலாம். Active Noise Cancellation வசதி கொண்ட மாடலும், ANC இல்லாத மாடலும் தொடர்ந்து கிடைக்கலாம்.
ஆப்பிள் புதிய home hub சாதனத்தையும் அறிமுகப்படுத்தும் வாய்ப்பு உள்ளது. சுமார் 7 இன்ச் அளவிலான square display, camera மற்றும் presence-detection sensors கொண்ட இந்த சாதனம், smart-home பொருட்களைக் கட்டுப்படுத்துவதுடன், வீடியோ அழைப்புகள், உள்ளடக்கங்களைப் பார்ப்பது மற்றும் Siri AI உடன் தொடர்புகொள்வது போன்ற பணிகளுக்கும் பயன்படுத்தப்படலாம்.
புதிய Apple TV 4K-வும் இந்த நிகழ்வில் இடம்பெறலாம். வேகமான processor உடன் தற்போதைய வடிவமைப்பைத் தொடரும் புதிய Apple TV, Siri AI மற்றும் gaming வசதிகளுக்கு கூடுதல் ஆதரவை வழங்கலாம். புதிய remote ஒன்றையும் ஆப்பிள் அறிமுகப்படுத்தும் வாய்ப்பு உள்ளது.
HomePod mini-க்கும் புதுப்பிப்பு எதிர்பார்க்கப்படுகிறது. புதிய processor மற்றும் புதிய நிறத் தேர்வுகள் கிடைக்கலாம் என்றாலும், அதன் அடிப்படை வடிவமைப்பில் பெரிய மாற்றம் இருக்காது.
வன்பொருள் அறிவிப்புகளுடன் iOS 27, iPadOS 27, macOS Golden Gate, tvOS 27, watchOS 27 மற்றும் visionOS 27 ஆகிய புதிய operating system பதிப்புகளின் வெளியீட்டு தேதிகளையும் ஆப்பிள் அறிவிக்கலாம். செப்டம்பர் 14 முதல் இந்த software updates பொதுப் பயன்பாட்டுக்கு வர வாய்ப்புள்ளதாக எதிர்பார்க்கப்படுகிறது.
இந்த ஆண்டு செப்டம்பர் நிகழ்வில் வழக்கமான iPhone 18 இடம்பெறாமல் போகலாம் என்பதும் குறிப்பிடத்தக்கது. அந்த மாடல் iPhone 18e மற்றும் iPhone Air 2 உடன் 2027 வசந்த காலத்தில் அறிமுகமாகலாம். இதனால் செப்டம்பர் நிகழ்வின் முக்கிய கவனம் iPhone 18 Pro, iPhone 18 Pro Max மற்றும் முதல் மடிக்கக்கூடிய iPhone மீது இருக்கும்.
Apple Watch SE 4, M6 MacBook Pro, M6 iMac, OLED MacBook Pro மற்றும் OLED iPad mini உள்ளிட்ட சில சாதனங்கள் இந்த நிகழ்வில் இடம்பெறாமல், தனிப்பட்ட நிகழ்வுகளில் அல்லது பின்னர் அறிமுகமாகும் வாய்ப்புள்ளது.
செப்டம்பர் 9-ம் தேதி நடைபெறும் இந்த நிகழ்வு, புதிய தயாரிப்புகளை அறிமுகப்படுத்தும் வழக்கமான Apple event-ஐவிட அதிக முக்கியத்துவம் பெறுகிறது. ஒருபுறம் பல ஆண்டுகளுக்குப் பிறகு முற்றிலும் புதிய வடிவமைப்புடன் மடிக்கக்கூடிய ஐபோன் அறிமுகமாகிறது. மறுபுறம், புதிய தலைமைச் செயல் அதிகாரியான ஜான் டெர்னஸ் முதல் முறையாக ஐபோன் வெளியீட்டு நிகழ்வை வழிநடத்துகிறார்.
இதனால் 2026-ம் ஆண்டுக்கான Apple September Event, புதிய iPhone 18 Pro வரிசை மட்டுமின்றி, ஆப்பிளின் எதிர்கால ஸ்மார்ட்போன் வடிவமைப்பு மற்றும் புதிய தலைமையின் தொடக்கத்தை வெளிப்படுத்தும் முக்கிய நிகழ்வாக அமைய உள்ளது.
Also Read: சர்க்கரை நோயாளிகள் தினமும் எவ்வளவு சர்க்கரை எடுத்துக்கொள்ளலாம்? மருத்துவ நிபுணர்கள் கூறுவது என்ன?
