இந்திய உணவு பாதுகாப்பு மற்றும் தர நிர்ணய ஆணையம் (FSSAI), பாலுக்குப் பதிலாக பிற பொருட்களைக் கொண்டு தயாரிக்கப்படும் ‘அனலாக் பன்னீரை’ (Analogue Paneer) பன்னீர் என்ற பெயரில் விற்பனை செய்யத் தடை விதிப்பதற்கான வரைவு விதிமுறைகளை வெளியிட்டுள்ளது. உணவு பாதுகாப்பு மற்றும் தரநிலைகள் திருத்த விதிமுறைகள் 2026-ன் கீழ் இந்த புதிய வரைவு முன்மொழியப்பட்டுள்ளது.
உண்மையான பன்னீர் பாலில் இருந்து தயாரிக்கப்படும் நிலையில், இந்த அனலாக் பன்னீரானது பாலுக்குப் பதிலாக தாவர எண்ணெய்கள், சோயா, ஸ்டார்ச் போன்ற பால் அல்லாத பொருட்களைக் கொண்டு, உண்மையான பன்னீரின் சுவை மற்றும் தோற்றத்தை ஒத்திருக்கும் வகையில் செயற்கையாகத் தயாரிக்கப்படுகிறது. எனவே, ‘பால் சார்ந்த அனலாக்’ பிரிவின் கீழ் பதிவு செய்யப்பட்ட அல்லது உரிமம் பெற்ற பொருட்கள், இனிமேல் தங்களது லேபிள்களிலோ, விளம்பரங்களிலோ அல்லது தயாரிப்புப் பெயரிலோ ‘பன்னீர்’ என்ற வார்த்தையைப் பயன்படுத்தக் கூடாது என FSSAI தெரிவித்துள்ளது. ஏற்கனவே பல மாநிலங்களில் அனலாக் பன்னீர் உற்பத்தி மற்றும் விற்பனைக்குத் தடை விதிக்கப்பட்டுள்ளது.
நுகர்வோர் தவறாக வழிநடத்தப்படுவதைத் தடுப்பதும், தாங்கள் வாங்கும் உணவின் தன்மை மற்றும் கலவையை அவர்கள் சரியாக அறிந்துகொள்ள உதவுவதுமே இதன் முக்கிய நோக்கமாகும். இந்த நடவடிக்கைக்கு மத்திய சுகாதார அமைச்சகமும் தனது முழு ஆதரவைத் தெரிவித்துள்ளது. இந்த வரைவு விதிமுறைகள் குறித்து பொதுமக்கள், நுகர்வோர் மற்றும் தொடர்புடைய நிறுவனங்கள் தங்களது ஆட்சேபனைகள் அல்லது ஆலோசனைகளைத் தெரிவிக்க 60 நாட்கள் அவகாசம் வழங்கப்பட்டுள்ளது.
கடந்த ஆறு மாதங்களாக உணவுப் பாதுகாப்பு விதிமீறல்களில் ஈடுபடும் நிறுவனங்கள் மீது FSSAI தனது நடவடிக்கைகளைத் தீவிரப்படுத்தியுள்ளது. நுகர்வோரைத் தவறாக வழிநடத்தும் விளம்பரங்கள், சுகாதாரமற்ற உணவுப் பொருட்கள் மற்றும் தடை செய்யப்பட்ட பொருட்களை விற்றது போன்ற விதிமீறல்களுக்காக அமேசான், ஸ்விக்கி இன்ஸ்டாமார்ட், பிக்பாஸ்கெட், பிளிப்கார்ட் மற்றும் ஜெப்டோ போன்ற முன்னணி இ-காமர்ஸ் தளங்கள் மீது சமீபத்தில் FSSAI அபராத நடவடிக்கைகளைத் தொடங்கியுள்ளது குறிப்பிடத்தக்கது.
