ராமநாதபுரம் மாவட்ட பகுதியில் உள்ள கோனாகுளம் கிராமத்தில் வசித்து வருபவர் சுப்பிரமணி. இவரது மகன் பிரபாகரன் (27 வயது). இவருக்கும் பாலமுருகன் என்பரின் மகள் சூரிய பிரியதர்ஷினி (23) என்பவருக்கும் கடந்த சில மாதங்களுக்கு முன்பு திருமணம் நடைப்பெற்றது. தற்போது சூரிய பிரியதர்ஷினி 4 மாத கர்ப்பிணியாக இருந்துள்ளார்.
கடந்த 3ம் தேதி கணவண் – மனைவி இருவரும் இரவு நேரத்தில் மோட்டார் பைக்கில் அண்டக்குடி கிராமத்தில் இருந்து அவர்களுடைய வீட்டுக்குத் திரும்பி கொண்டிருந்தனர். அப்போது திடீரென சாலையின் குறுக்கே எதிர் பாராத விதமாக மாடு வந்ததால், மோட்டார் பைக் பிரபாகரனின் கட்டுப்பாட்டை இழந்து நிலை தடுமாறி அருகே இருந்த கால்வாய்க்குள் பாய்ந்து விட்டது.
இந்த நிலையில் 4 மாத கர்ப்பிணியான பிரியதர்ஷினி தண்ணீருக்குள் விழுந்து, மூழ்கி பரிதாபமாக உயிரிழந்தார். பிரபாகரன் பலத்த காயம் அடைந்து மயங்கிய நிலையில் கரையில் கிடந்தார்.
சிறிது நேரம் கழித்து மயக்கம் தெளிந்து பிரபாகரன் எழுந்து பார்த்துள்ள போது, மனைவியையும் மோட்டார் பைக்கையும், காணவில்லை. இதனையடுத்து அங்குள்ளவர்கள் கால்வாய்க்குள் இறங்கி சுமார் ஒரு மணி நேரம் தேடிய பிறகு சூரிய பிரியதர்ஷினியை சடலமாக மீட்டெடுத்தனர்.
பிரபாகரன் சிகிச்சைக்காக பரமக்குடி அரசு மருத்துவமனைக்கு அனுப்பி வைக்கப்பட்டுள்ளார். மேலும் தகவல் அறிந்து சம்பவ இடத்திற்கு விரைந்து சென்ற போலீசார், பிரியதர்ஷினியின் சடலத்தை கைப்பற்றினார். மேலும் விசாரணை மேற்கொண்டு வருகின்றனர்.
