உலகக்கோப்பை கால்பந்து போட்டியில் வெற்றி பெற்றதை சிறப்பாக கொண்டாடுவதற்காக அர்ஜென்டினாவில் இன்று தேசிய விடுமுறை அறிவிக்கப்பட்டுள்ளது.
புவெனஸ் ஐரிஸ்: உலகக்கோப்பை கால்பந்து போட்டியின் பரபரப்பான பைனலில், அசத்திய அர்ஜென்டினா அணி, பெனால்டி ஷூட் அவுட் முறையில் 4-2 என்ற கோல் கணக்கில் வெற்றி பெற்று, சாம்பியன் பட்டத்தை கைப்பற்றியது. பெனால்ட்டி ஷூட் அவுட் வெற்றியின் மூலம் 6 வெற்றிகளுடன் அதிகப்படியான பெனால்ட்டி ஷூட் அவுட்களில் வென்ற அணி என்ற பெருமையை அர்ஜென்டினா பெற்றது. உலகமெங்கும் உள்ள ரசிகர்கள் அர்ஜெண்டினா அணிக்கு தங்களது வாழ்த்துகளை தெரிவித்தனர். இந்தியாவில் அர்ஜெண்டினாவிற்கு என்று தனி ரசிகர் ஆர்மியே உள்ளது. கேரளா, புதுச்சேரி தமிழ்நாடு உள்ளிட்ட பகுதிகளில் நடந்த வெற்றிக்கொண்டாட்டங்களைசமூக வலைதளங்கள் மூலம் நாம் காணமுடிந்தது.
நம்ம ஊரிலேயே இவ்வளவு கொண்டாட்டம் , கும்மாளம் என்றால் கோப்பைக்கு சொந்தகார நாடான அர்ஜெண்டினாவில் சொல்லவா வேண்டும். அடேங்கப்பா என்று வாயை பிளக்கும் அளவுக்கு அந்த நாட்டின் ரசிகர்கள் மகிழ்ச்சியில் திளைத்துபோயுள்ளனர்.
வரலாற்று சிறப்புமிக்க உலகக் கோப்பை வெற்றியை கொண்டாட நினைத்த அர்ஜென்டினா கால்பந்து கூட்டமைப்பு, புவெனஸ் அயர்ஸில் உள்ள ஒபெலிஸ்க் வளாகத்தில் கொண்டாட்டங்களுக்கு ஏற்பாடு செய்துள்ளது. மேலும் இந்த மாபெரும் வெற்றியைக் கொண்டாட அர்ஜென்டினா அரசாங்கம், டிசம்பர் 20ஆம் தேதியான இன்று, பொதுவிடுமுறையாக அறிவித்தது. இதனால் முழு நாடும் “அர்ஜென்டினா அணிக்காக தங்களின் ஆழ்ந்த மகிழ்ச்சியை வெளிப்படுத்த முடியும்” என அரசின் சார்பில் தெரிவிக்கப்பட்டுள்ளது. இதனால் அங்கு லட்ச கணக்கில் பொதுமக்கள் குவிந்து வருகின்றனர். உலக சாம்பியன் பட்டத்தை வென்றதை ரசிகர்களுடன் கொண்டாட அர்ஜெண்டினா அணியினரும் ஒபெலிஸ்கிற்கு செல்கின்றனர்.
