திருவாரூர் மாவட்டம் நன்னிலம் அருகில் உள்ள ஆணைகுப்பம் கிராமத்தில் அரசு மேல்நிலைப்பள்ளி ஒன்று இயங்கி வருகிறது. இங்கு 200-க்கும் மேற்பட்ட மாணவ, மாணவிகள் படித்து வருகின்றனர். 7-ஆம் வகுப்பு மற்றும் 8-ஆம் வகுப்புக்கு கணக்கு ஆசிரியராக பணிபுரியும் கார்த்தியசாமி தங்களிடம் தவறாக நடந்து கொள்வதாக எட்டுக்கும் மேற்பட்ட மாணவிகள் கடந்த வாரம் தலைமை ஆசிரியர் குலசேகரனிடம் புகார் அளித்தனர்.
இதைத்தொடர்ந்து, மாவட்ட முதன்மை கல்வி அதிகாரி தியாகராஜன், மாவட்ட கல்வி அலுவலர் பார்த்தசாரதி முதலியோர், பள்ளிக்கு நேரில் சென்று விசாரணை நடத்தினர். மேலும் இந்த புகார் தொடர்பாக உடனடியாக உரிய நடவடிக்கை எடுக்கப்படும் என்று உறுதியளித்தனர்.
இதையடுத்து குழந்தைகள் உதவி மையத்தை சேர்ந்த அதிகாரிகள் விசாரணை நடத்தினர். பிறகு முதன்மை கல்வி அதிகாரிக்கு அறிக்கை அனுப்பி இருக்கின்றனர். இந்த நிலையில், மாணவிகளிடம் தகாத முறையில் நடந்துக் கொண்டதாக புகார் எழுந்த, கணக்கு ஆசிரியர் கார்த்தியசாமியை பணியிடை நீக்கம் செய்ய மாவட்ட முதன்மை கல்வி அலுவலர் தியாகராஜன் உத்தரவிட்டார்.
