இந்த காலத்தில் நீரிழிவு நோய் ஒரு பொதுவான உடல்நலப் பிரச்சினையாக மாறியுள்ளது. பலர் இதை வெறும் ‘சர்க்கரை நோய்’ என்று கருதி அலட்சியப்படுத்துகின்றனர். ஆனால், நிபுணர்களின் கூற்றுப்படி, இரத்தத்தில் சர்க்கரையின் அளவு நீண்ட காலத்திற்கு கட்டுப்பாடின்றி இருந்தால், அது உடலின் ஒவ்வொரு முக்கிய உறுப்பையும் கடுமையாகப் பாதிக்கக்கூடும். நீரிழிவு நோயாளிகளுக்கு வேறு என்னென்ன உடல்நலப் பிரச்சினைகள் மற்றும் உயிருக்கு ஆபத்தான நோய்கள் ஏற்படும் அபாயம் உள்ளது என்பதை இப்போது விரிவாகப் பார்ப்போம்.
இதயம் மற்றும் மூளைக்கு ஏற்படும் ஆபத்து: மற்றவர்களை விட நீரிழிவு நோயாளிகளுக்கு மாரடைப்பு மற்றும் கரோனரி தமனி நோய் (இதயத் தமனி நோய்) ஏற்படும் அபாயம் அதிகம். இரத்த நாளங்களின் ஆரோக்கியம் சீர்குலைவது மூளைக்குச் செல்லும் இரத்த ஓட்டத்தைப் பாதித்து, பக்கவாதம் ஏற்படும் அபாயத்தை அதிகரிக்கிறது. மேலும், நீரிழிவு நோயாளிகளுக்கு உயர் இரத்த அழுத்தம் ஏற்படும் வாய்ப்பும் அதிகம். இவ்விரு பிரச்சினைகளும் இணையும்போது, இதயம் மற்றும் சிறுநீரகங்களின் மீதான அழுத்தம் அதிகரிக்கிறது.
கண் மற்றும் சிறுநீரக பாதிப்பு: சர்க்கரை அளவு கட்டுப்படுத்தப்படாவிட்டால், சிறுநீரகங்களில் உள்ள சிறிய இரத்த நாளங்கள் சேதமடையக்கூடும். இது ‘நெஃப்ரோபதி’ (nephropathy) எனப்படும் தீவிர சிறுநீரக நோய்க்கு வழிவகுக்கும். மேலும், நீரிழிவு நோய் கண்ணின் விழித்திரையில் (retina) உள்ள இரத்த நாளங்களைப் பாதித்து, ‘டயாபெட்டிக் ரெட்டினோபதி’ (diabetic retinopathy) எனும் நிலையை ஏற்படுத்துகிறது. இது பார்வைக் குறைபாடு அல்லது முழுமையான பார்வையின்மைக்குக் கூட வழிவகுக்கலாம்.
நரம்பு பாதிப்பு மற்றும் பாதப் பிரச்சினைகள்: நீண்ட காலத்திற்கு இரத்தத்தில் சர்க்கரை அளவு அதிகமாக இருப்பது நரம்புகளைச் சேதப்படுத்தலாம் (டயாபெட்டிக் நியூரோபதி). இது பாதங்களில் ஊசி குத்துவது போன்ற உணர்வு, எரிச்சல் மற்றும் மரத்துப்போதல் போன்ற அறிகுறிகளை ஏற்படுத்தலாம். இரத்த ஓட்டம் குறைவாக இருப்பதால், பாதங்களில் ஏற்படும் சிறிய வெட்டுக்கள் மற்றும் காயங்கள் விரைவில் தொற்றுக்குள்ளாகி, உயிருக்கே ஆபத்தான நிலையை உருவாக்கலாம்.
பிற தொற்றுகள் மற்றும் கொழுப்பு கல்லீரல் (Fatty Liver): நீரிழிவு நோய் உடலின் நோய் எதிர்ப்பு சக்தியைக் குறைக்கிறது. இதனால் தோல், சிறுநீர்ப் பாதை (UTI) மற்றும் ஈறுகளில் அடிக்கடி தொற்றுகள் ஏற்படுகின்றன. வகை-2 நீரிழிவு நோயாளிகளுக்கு ‘ஆல்கஹால் அல்லாத கொழுப்பு கல்லீரல் நோய்’ (NAFLD) – அதாவது கல்லீரலில் கொழுப்பு படியும் நிலை – ஏற்படும் அபாயமும் அதிகம் என்று ஆய்வுகள் தெரிவிக்கின்றன. வாய்வழி ஆரோக்கியக் குறைபாடு மற்றும் ஈறு நோய்கள் போன்ற பிரச்சினைகளும் இவர்களுக்குப் பொதுவாகக் காணப்படுகின்றன.
ரத்த சர்க்கரை அளவு நீண்ட காலத்திற்குக் கட்டுப்படுத்தப்படாவிட்டால், உடலின் முக்கிய உறுப்புகள் சேதமடையும் அபாயம் உள்ளது. எனவே, சர்க்கரை அளவைக் கட்டுப்பாட்டில் வைத்திருப்பதும், வாய்வழி சுகாதாரத்தைப் பேணுவதும், மருந்துகளைத் தவறாமல் உட்கொள்வதும் மிக முக்கியம். இருப்பினும், நீரிழிவு நோய் உள்ள அனைவருக்கும் இந்தப் பிரச்சனைகள் ஏற்படும் என்று கூற முடியாது.
ரத்த சர்க்கரை அளவைத் தொடர்ந்து கண்காணித்தல், ஆரோக்கியமான உணவை உட்கொள்ளுதல், உடற்பயிற்சி செய்தல் மற்றும் மருத்துவரின் அறிவுரைப்படி மருந்துகளை உட்கொள்ளுதல் ஆகியவற்றின் மூலம் இந்த ஆபத்துகளிலிருந்து உங்களைப் பாதுகாத்துக்கொள்ளலாம்.
