ஈரானின் உயர்மட்டத் தலைவர்களில் ஒருவரான அதன் பாதுகாப்புத் தலைவர் அலி லாரிஜானி மற்றும் இஸ்லாமியப் புரட்சிகரக் காவலர் படையின் (IRCG) சக்திவாய்ந்த துணை ராணுவத் தன்னார்வப் படையின் தலைவர் குலாம்ரெசா சுலைமானி ஆகியோரை வான்வழித் தாக்குதல்களில் கொன்றதாக இஸ்ரேல் நேற்று தெரிவித்தது..
பிப்ரவரி 28-ம் தேதி அன்று அமெரிக்காவும் இஸ்ரேலும் இணைந்து ஈரான் மீது தாக்குதல் நடத்தி தொடங்கின.. ‘ஆபரேஷன் ரோரிங் லயன்’ என்று இஸ்ரேலும், ‘ஆபரேஷன் எபிக் ஃபியூரி’ என்று அமெரிக்காவும் பெயரிட்டுள்ளன.. இந்த தாக்குதல்களுக்கு ஈரான் தொடர்ந்து பதிலடி கொடுத்து வருகிறது.. இதனால் மேற்காசியவில் போர் பதற்றம் அதிகரித்துள்ளது.. இரு தரப்பினரும் பதற்றத்தைத் தணிக்காத நிலையில், இந்தத் தாக்குதல் இன்னும் முழு வளைகுடாப் பகுதியையும் தொடர்ந்து உலுக்கிக் கொண்டிருக்கிறது.
இஸ்ரேல் பிரதமர் பெஞ்சமின் நெதன்யாகுவின் மரணம் குறித்த வதந்திகளும் பரவி வரும் நிலையில், நேற்று ஒரு வீடியோவை அவர் வெளியிட்டிருந்தார்.. அந்த வீடியோவில் பேசிய அவர், தனது கார்டில் இருந்த இரண்டு பெயர்களை அழித்துவிட்டதாகக் கூறியிருந்தார். இந்நிலையில், ஈரானின் உயர்மட்ட அதிகாரிகளான அலி லாரிஜானி மற்றும் குலாம்ரெசா சுலைமானி ஆகியோரின் மரணத்திற்காக உறுதியான பதிலடி கொடுக்கப்படும் என்று ஈரான் சூளுரைத்தது.
பிப்ரவரி 28 அன்று, அமெரிக்க-இஸ்ரேல் உடனான தற்போதைய போரில், உச்ச தலைவர் அயதுல்லா அலி கமேனி மற்றும் பல உயர்மட்ட ஈரானிய அதிகாரிகள் கூட்டுத் தாக்குதல்களில் கொல்லப்பட்டபோது, ஏற்கனவே பலவீனமடைந்திருந்த ஈரானிய தலைமைக்கு இந்த படுகொலைகள் பேரிடிகளாக அமைந்துள்ளன.
அமெரிக்க-இஸ்ரேலிய தாக்குதல்களில் இதுவரை கொல்லப்பட்ட உயர்மட்ட ஈரானிய தலைவர்கள், அதிகாரிகள்
பிப்ரவரி 28 அன்று அமெரிக்க-இஸ்ரேல் நடத்திய தொடக்கத் தாக்குதல்களில் உச்ச தலைவர் அயதுல்லா அலி கமேனி, அவரது உயர்மட்ட பாதுகாப்பு ஆலோசகர் அலி ஷம்கானி, ஐ.ஆர்.ஜி.சி தளபதி முகமது பக்பூர், ஆயுதப் படைகளின் தலைமைத் தளபதி அப்துல்ரஹீம் மூசவி மற்றும் பாதுகாப்பு அமைச்சர் அஜீஸ் நசீர்சாதே ஆகியோர் கொல்லப்பட்டனர்.
பிப்ரவரி 28 தாக்குதல்களில் கொல்லப்பட்ட ஈரானியத் தலைவர்கள்
‘ஆபரேஷன் ரோரிங் லயன்’ (Operation Roaring Lion) குறித்த இஸ்ரேலியப் பாதுகாப்புப் படைகளின் இணையதளப் பக்கத்தில் உள்ள பட்டியலின்படி, பிப்ரவரி 28 தாக்குதல்களில் கொல்லப்பட்டவர்களில் பின்வருவோர் அடங்குவர்:
அயதுல்லா அலி கமேனி: ஈரானின் உச்சபட்சத் தலைவர்
முகமது ஷிராசி: கமேனியின் இராணுவப் பிரிவின் தலைவர்
ஜலாலி பூர் ஹொசைன்: ஈரானிய உளவுத்துறை அமைச்சகத்தின் உளவு இயக்குநரகத் தலைவர்
சையத் யஹ்யா ஹம்தி: இஸ்ரேல் தொடர்பான விவகாரங்களுக்கான உளவுத்துறை துணை அமைச்சர் மற்றும் ஈரானிய அமைச்சகத்தின் மூத்த அதிகாரி
ஹசன் அலி தாஜிப்: ஈரானிய ஆயுதப் படைகளின் விநியோகத் துறைத் தலைவர்
குலாம் ரெஸா ரெஸாயியன்: உள்நாட்டுப் பாதுகாப்புப் படைகளின் உளவு இயக்குநரகத் தலைவர்
மொஹ்சென் தர்ரே-பாகி: ஈரானிய ஆயுதப் படைகளின் விநியோகம், தளவாடங்கள் மற்றும் தொழில்துறை ஆராய்ச்சி இயக்குநரகத் தலைவர்
அக்ர் இப்ராஹிம் ஜாதே: உச்சபட்சத் தலைவரின் இராணுவப் பிரிவின் பொறுப்புத் தலைவர்
பஹ்ராம் ஹொசைனி மோத்லாக்: ஈரானிய ஆயுதப் படைகளின் செயல்பாடுகள் மற்றும் திட்டமிடல் துறைத் தலைவர்
அப்துல் ரஹீம் மௌசவி: ஈரானிய இராணுவத்தின் பொதுப் படைத் தளபதி
முகமது ஃபக்ஸ்பூர்: இஸ்லாமியப் புரட்சிகரப் பாதுகாப்புப் படையின் (IRGC) தளபதி
அலி ஷம்கானி: பாதுகாப்பு விவகாரங்களுக்கான உச்சபட்சத் தலைவரின் ஆலோசகர் மற்றும் பாதுகாப்பு சபையின் செயலாளர்
ரெஸா மதாஃபரி-னியா: தற்காப்புப் புத்தாக்கம் மற்றும் ஆராய்ச்சி அமைப்பின் (SPND) முன்னாள் தலைவர்
ஹொசைன் ஜபல் அமிலியன்: தற்காப்புப் புத்தாக்கம் மற்றும் ஆராய்ச்சி அமைப்பின் (SPND) தலைவர்
சயே அசாதி: “காதம் அல்-அன்பியா” அவசரக்காலக் கட்டளையகத்தின் உளவு இயக்குநரகத் தலைவர்
அஜிஸ் நசீர்-ஜாதே: பாதுகாப்புத் துறை அமைச்சர்
மார்ச் 8 :
பெய்ரூட்டில் நடத்தப்பட்ட துல்லியமான தாக்குதல் ஒன்றில், IRGC-யின் குட்ஸ் படையைச் சேர்ந்த லெபனான் பிரிவின் 5 மூத்த தளபதிகளைத் தாங்கள் கொன்றொழித்ததாக இஸ்ரேல் ராணுவம் அறிவித்தது..
தனது அதிகாரப்பூர்வ எக்ஸ் பக்கத்தில் பதிவிட்டிருந்த இஸ்ரேல் ராணுவம் “ கொல்லப்பட்டவர்களில் லெபனான் பிரிவின் தளபதியான தாவூத் அலி ஜாதே; லெபனானில் உள்ள ஈரானியப் பிரிவுகளுக்கு நிதி பரிமாற்றம் செய்யும் பொறுப்பிலிருந்த மஜித் ஹசினி; லெபனான் பிரிவின் உளவுத்துறைப் பிரிவின் தளபதி அலி ரெஸா பி-ஆஸார்; மற்றும் லெபனான் பிரிவின் உளவுத்துறைச் செயல்பாட்டாளர் ஹசன் அஹ்மத்லோ ஆகியோர் அடங்குவர் என்று குறிப்பிட்டது.
மார்ச் 12
மார்ச் 12 அன்று, பெய்ரூட்டில் உள்ள ஹிஸ்புல்லாவிற்குள் இருந்த ஐ.ஆர்.ஜி.சி-யின் ஏவுகணைப் பிரிவின் செயல்பாட்டுக் தளபதியான அபு தார் மொஹம்மதியை அது கொன்றது.
“மொஹம்மதி, ஹிஸ்புல்லாவிற்கும் ஈரானிய பயங்கரவாத ஆட்சிக்கும் இடையில் ஒருங்கிணைக்கும் ஒரு முக்கிய நபராக இருந்தார். மேலும், ‘ஆபரேஷன் நார்தர்ன் ஆரோஸ்’ நடவடிக்கையைத் தொடர்ந்து ஹிஸ்புல்லாவின் ஏவுகணைத் திட்டத்தை மறுசீரமைப்பதில் அவர் முக்கியப் பங்கு வகித்தார்,” என்று இஸ்ரேல் ராணுவம் தெரிவித்தது.
மார்ச் 17
அலி லாரிஜானி: ஈரானிய ஆட்சியின் தலைவராகச் செயல்பட்டு, இஸ்ரேல் மற்றும் பிராந்திய நாடுகளுக்கு எதிரான போரை வழிநடத்தி வந்த ஈரானிய பாதுகாப்புத் தலைவர் அலி லாரிஜானியை, தெஹ்ரானில் நடத்திய வான்வழித் தாக்குதலில் கொன்றதாக இஸ்ரேல் கூறியது.
“ஈரானிய ஆட்சியின் தலைமையில் மிகவும் மூத்த மற்றும் அனுபவமிக்க நபர்களில் ஒருவர்” என்று லாரிஜானியை இஸ்ரேல் பாதுகாப்புப் படை (IDF) விவரித்தது.
குலாம்ரெசா சுலைமானி: இஸ்ரேலியத் தாக்குதல்களில் பசிஜ் பிரிவின் தளபதி குலாம்ரெசா சுலைமானியும் கொல்லப்பட்டார். “அவரது தலைமையின் கீழ் பசிஜ் பிரிவு, ஆட்சியின் அடக்குமுறைக்கான முதன்மைக் கருவியாகச் செயல்பட்டது,” என்று இஸ்ரேலியப் பாதுகாப்புப் படை (IDF) கூறியது.
ஈரானில் நடந்த போராட்டங்களின் போது நடந்த வன்முறை அடக்குமுறையில் அவர் ஒரு முக்கியப் பங்கு வகித்ததாக இஸ்ரேல் ராணுவம் கூறியது.
கொலைகளுக்குப் பழிவாங்குவதாக ஈரான் சபதம்
தனது பாதுகாப்புத் தலைவர் அலி லாரிஜானியின் மரணத்திற்கு உறுதியான பதிலடி கொடுப்பதாக ஈரான் சபதம் செய்தது. வான்வழித் தாக்குதலில் அவரைக் கொன்றதாகக் கூறிய இஸ்ரேல் மீது, ஈரான் ஏவுகணைகளை வீசித் தாக்கியது.
இஸ்ரேலின் வர்த்தக மையமான டெல் அவிவ் அருகே ஈரான் ஏவுகணைகளை வீசியதில் இருவர் கொல்லப்பட்டனர். அதே நேரத்தில், அப்பகுதியில் உள்ள அமெரிக்கத் தளங்கள் உள்ளிட்ட இலக்குகளை நோக்கிச் சென்ற ராக்கெட்டுகள் மற்றும் ட்ரோன்களை வளைகுடா நாடுகள் இடைமறித்தன.
லாரிஜானி மற்றும் குலாம்ரெசா சுலைமானி ஆகியோருக்கு ஈரான் இன்று இறுதிச் சடங்குகளை நடத்த உள்ளது.. கொல்லப்பட்ட இஸ்லாமியக் குடியரசின் மிக முக்கியமான தலைவர் லாரிஜானி ஆவார்.
“உச்ச தேசிய பாதுகாப்பு கவுன்சிலின் செயலாளரின் படுகொலைக்கு ஈரானின் பதில் தீர்க்கமானதாகவும் வருந்தத்தக்கதாகவும் இருக்கும்,” என்று ஈரான் இராணுவத் தளபதி அமீர் ஹதாமி தெரிவித்துள்ளார்.
Read More : சூப்பர் நியூஸ்..! இந்த தேதி வரை ஆதார் விவரங்களை இலவசமாக அப்டேட் செய்யலாம்..! மத்திய அரசு அறிவிப்பு..!
