தேசிய நெடுஞ்சாலைகளில் உள்ள சுங்கச்சாவடிகளைக் கடந்து தினமும் பயணம் செய்பவர்களுக்கு, ஒவ்வொரு முறையும் கட்டணம் செலுத்துவதும் பாஸைப் புதுப்பிப்பதும் செலவையும் சிரமத்தையும் ஏற்படுத்துகிறது. குறிப்பாக, சுங்கச்சாவடிக்கு அருகில் வசிப்பவர்களின் இந்தப் பிரச்சினைக்குத் தீர்வாக வருடாந்திர ஃபாஸ்டேக் பாஸ் திட்டம் அறிமுகப்படுத்தப்பட்டுள்ளது. இந்தத் திட்டம் நவம்பர் 1 முதல் நடைமுறைக்கு வரவுள்ளதாக அறிவிக்கப்பட்டுள்ளது.
புதிய திட்டத்தின் கீழ், தகுதியுள்ள வாகன உரிமையாளர்கள் மாதந்தோறும் பாஸைப் புதுப்பிக்க வேண்டிய அவசியமில்லை. ஒரே முறை ஆண்டு கட்டணத்தைச் செலுத்தி, குறிப்பிட்ட சுங்கச்சாவடியில் இந்த வசதியைப் பயன்படுத்தலாம். இதற்கான அரசிதழ் அறிவிப்பை மத்திய சாலைப் போக்குவரத்து மற்றும் நெடுஞ்சாலைத் துறை அமைச்சகம் வெளியிட்டுள்ளது.
எவ்வளவு கட்டணம் செலுத்த வேண்டும்?
சுங்கச்சாவடி அமைந்துள்ள இடத்தைப் பொறுத்து ஆண்டு கட்டணம் நிர்ணயிக்கப்பட்டுள்ளது.
- நகராட்சி அல்லது நகர எல்லைக்கு வெளியே உள்ள சுங்கச்சாவடிகளுக்கு ₹1,500.
- நகராட்சி அல்லது நகர எல்லைக்குள் உள்ள சுங்கச்சாவடிகளுக்கு ₹3,000.
தற்போது உள்ள மாதாந்திர உள்ளூர் பாஸ் திட்டத்தில் மாதம் ₹350 செலுத்தும் வசதி உள்ளது. புதிய திட்டம் மூலம் தகுதியுள்ள வாகன ஓட்டிகள் ஆண்டு முழுவதற்குமான கட்டணத்தை ஒரே தவணையில் செலுத்தலாம்.
20 கி.மீ. சுற்றளவுக்குள் வசிப்பவர்களுக்கு மட்டும்தான்!
இந்தப் பாஸைப் பெறுவதற்கு சுங்கச்சாவடியிலிருந்து 20 கிலோமீட்டர் சுற்றளவுக்குள் வசிப்பவராக இருக்க வேண்டும். இருப்பிடத்தை உறுதிப்படுத்த ஆதார் அட்டை, வாக்காளர் அடையாள அட்டை அல்லது செல்லுபடியாகும் பிற முகவரிச் சான்றுகளைச் சமர்ப்பிக்க வேண்டும்.
மேலும், வாகனத்தின் பதிவுச் சான்றிதழ் (RC) விண்ணப்பதாரரின் பெயரிலும் அதே முகவரியிலும் இருக்க வேண்டும். வாகனத்தில் செயல்பாட்டில் உள்ள ஃபாஸ்டேக் இருப்பதும் அவசியம். விண்ணப்பத்தைச் சம்பந்தப்பட்ட சுங்கச்சாவடி அலுவலகம் அல்லது அதிகாரப்பூர்வ இணையவழி தளத்தில் சமர்ப்பிக்கலாம்.
எந்த வாகனங்களுக்கு இந்த வசதி கிடையாது?
கார்கள், ஜீப்புகள், வேன்கள் போன்ற தனிப்பட்ட பயன்பாட்டுக்கான வணிகமற்ற வாகனங்களுக்கு மட்டுமே இந்தத் திட்டம் பொருந்தும். டாக்ஸி, மேக்சி கேப் உள்ளிட்ட வணிக வாகனங்களுக்கு இந்தச் சலுகை வழங்கப்படாது.
மற்றொரு முக்கிய நிபந்தனையும் உள்ளது. சுங்கச்சாவடிக்கு அருகில் சர்வீஸ் சாலை அல்லது மாற்றுப் பாதை வசதி இருந்தால், உள்ளூர் மக்களுக்கான வருடாந்திர பாஸ் கிடைக்காது. அதேபோல், நுழைவு மற்றும் வெளியேறும் இடங்களுக்கு இடையிலான பயணத் தூரத்துக்கு ஏற்ப கட்டணம் வசூலிக்கும் மூடப்பட்ட சுங்கக் கட்டண முறையிலுள்ள எக்ஸ்பிரஸ்வேகளுக்கும் இந்தத் திட்டம் பொருந்தாது.
இந்தப் பாஸ் குறிப்பிட்ட ஒரு சுங்கச்சாவடியைக் கடப்பதற்காக மட்டுமே பயன்படுத்த முடியும். எனவே, ஒன்றுக்கும் மேற்பட்ட சுங்கச்சாவடிகளில் பயணம் செய்பவர்கள் ஒவ்வொரு இடத்திற்குமான விதிமுறைகளையும் தனித்தனியாகச் சரிபார்க்க வேண்டும். கட்டணங்களும் ஆண்டுதோறும் ஏப்ரல் 1ஆம் தேதி திருத்தப்பட வாய்ப்புள்ளது.
இந்தத் திட்டத்தில் சேர விரும்புபவர்கள் விண்ணப்பிப்பதற்கு முன்பு தங்களது இருப்பிடத் தகுதி, வாகனப் பதிவு விவரங்கள் மற்றும் சம்பந்தப்பட்ட சுங்கச்சாவடிக்கான நிபந்தனைகளை உறுதிப்படுத்திக்கொள்வது அவசியம்.
Also Read: யோகி பாபுவுக்கு பெண் கொடுக்க மறுத்த நடிகர்.. இன்று நடந்தது என்ன தெரியுமா?
