சந்தேகத்தால் மனைவியைத் தாக்கிவிட்டு, அவர் உயிரிழந்துவிட்டதாக நினைத்து காட்டுப்பகுதியில் விட்டுச் சென்ற கணவரின் செயல் சத்தீஸ்கரில் அதிர்ச்சியை ஏற்படுத்தியுள்ளது. பலத்த காயங்களுடன் உயிருக்கு ஆபத்தான நிலையில் கிடந்த பெண்ணை கிராம மக்கள் மீட்டு மருத்துவமனையில் சேர்த்தனர். தற்போது அவருக்குத் தீவிர சிகிச்சை அளிக்கப்பட்டு வருகிறது.
சத்தீஸ்கர் மாநிலம் சூரஜ்பூர் மாவட்டத்தில் இந்தச் சம்பவம் நடந்துள்ளது. கொரியா மாவட்டத்தைச் சேர்ந்த அந்தப் பெண், தனது முதல் கணவர் மற்றும் குழந்தையைப் பிரிந்து, ராகேஷ் சாகு என்பவரை ஆறு மாதங்களுக்கு முன்பு காதலித்து திருமணம் செய்துகொண்டார். திருமணத்துக்குப் பிறகு மனைவியின் நடத்தையில் சந்தேகம் கொண்ட ராகேஷ், அவருடன் அடிக்கடி தகராறில் ஈடுபட்டதாகத் தெரிகிறது.
இந்நிலையில், வெளியே அழைத்துச் செல்வதாகக் கூறி மனைவியைப் பத்ரா வனப்பகுதிக்கு ராகேஷ் அழைத்துச் சென்றுள்ளார். அங்கு இருவருக்கும் இடையே வாக்குவாதம் ஏற்பட்டுள்ளது. தகராறு முற்றிய நிலையில், அவர் மனைவியை உருட்டுக்கட்டையாலும் கைகளாலும் சரமாரியாகத் தாக்கியுள்ளார். இதில் பெண்ணின் தலையில் பலத்த காயம் ஏற்பட்டு ரத்த வெள்ளத்தில் சரிந்தார்.
மனைவி உயிரிழந்துவிட்டதாக நினைத்த ராகேஷ், அவரை வனப்பகுதியிலேயே விட்டுவிட்டு அங்கிருந்து தப்பிச் சென்றுள்ளார். அந்த வழியாகச் சென்ற கிராம மக்கள், ரத்தக் காயங்களுடன் பெண் கிடப்பதைக் கண்டு அவரை மீட்டு மருத்துவமனைக்குக் கொண்டு சென்றனர். அங்கு அவருக்குத் தொடர்ந்து சிகிச்சை அளிக்கப்பட்டு வருகிறது.
இந்தச் சம்பவம் குறித்து தகவல் அறிந்த முதல் கணவர், மருத்துவமனைக்குச் சென்று பாதிக்கப்பட்ட பெண்ணுக்கு ஆதரவாக இருந்துள்ளார். தனது மனைவி கடந்த ஆறு மாதங்களாகக் காணவில்லை என அவர் ஏற்கெனவே காவல் நிலையத்தில் புகார் அளித்திருந்ததும் தெரியவந்துள்ளது.
இதற்கிடையே, மனைவியைத் தாக்கிவிட்டு தலைமறைவான ராகேஷ் சாகுவைப் பிடிக்க போலீசார் தேடுதல் வேட்டையில் ஈடுபட்டுள்ளனர். சம்பவம் தொடர்பாக வழக்குப்பதிவு செய்து விசாரணை நடைபெற்று வருகிறது.
Also Read: 3 பேர் உயிரிழந்த விபத்து.. ஜாமீன் தீர்ப்புக்கு முன் வெளியான ஆடியோவால் பரபரப்பு!
