திரைப்படங்களிலும் அறிவியல் புனைகதைகளிலும் நாம் வியந்து பார்க்கும் ‘டைம் டிராவல்’ என்பது வெறும் பொழுதுபோக்கு கற்பனையா அல்லது நிஜமாகவே மனிதனால் காலத்தைக் கடந்து செல்ல முடியுமா என்ற விவாதம் மக்கள் மத்தியில் எப்போதும் சுவாரசியமானது. நிகழ்காலத்தில் நின்றுகொண்டு கடந்த காலத்தையோ எதிர்காலத்தையோ நேரில் காண முடியுமா என்ற கேள்விக்கு, அறிவியலும் நம்முடைய பிரபஞ்ச அமைப்பும் தரும் பதில்கள் மிகுந்த ஆச்சரியத்தை அளிக்கின்றன.
திரைப்பட எந்திரம் நிஜமாகுமா?
திரைப்படங்களில் காட்டுவது போல ஒரு குறிப்பிட்ட இயந்திரத்தில் அமர்ந்து, காலத்தையும் தேதியையும் பதிவு செய்து சுவிட்சை தட்டினால் நாம் விரும்பும் காலத்திற்குப் போய் இறங்கிவிட முடியுமா என்றால், அது தற்போதைய அறிவியல் விதிகளின்படி சாத்தியமற்றது. ஆனால், கடந்த காலத்தை நம் கண்களால் “பார்க்க முடியும்” என்பதற்கு இயற்கையிலேயே வலிமையான அறிவியல் சான்றுகள் உள்ளன.
சூரிய ஒளியில் புதைந்திருக்கும் அறிவியல் ஆதாரம்:
நாம் அன்றாடம் பார்க்கும் பல விஷயங்கள் கூட ஒரு வகையில் காலப் பயணம்தான். உதாரணமாக, சூரியனில் இருந்து புறப்படும் ஒளி பூமியை வந்தடைய சுமார் 8 நிமிடங்கள் 20 வினாடிகள் ஆகின்றன. அதாவது, நாம் இப்போது பார்க்கும் சூரிய ஒளி என்பது 8 நிமிடங்களுக்கு முந்தைய “கடந்த காலம்”. ஒருவேளை சூரியனில் திடீரென ஏதேனும் மாற்றம் நிகழ்ந்தால் கூட, அது நமக்கு 8 நிமிடங்கள் கழித்துத்தான் தெரியும்.
இதே கோட்பாட்டை பிரபஞ்ச அளவில் விரிவுபடுத்தினால், பல ஒளியாண்டுகள் தொலைவில் உள்ள ஒரு கிரகத்தில் சக்திவாய்ந்த தொலைநோக்கியை வைத்து இப்போது பூமியைப் பார்த்தால், அங்கே பூமி பல லட்சம் ஆண்டுகளுக்கு முன்பு எப்படி இருந்தது என்ற கடந்த காலக் காட்சிகளே தெரியும். இதை அறிவியல் நிரூபித்திருந்தாலும், அவ்வளவு தொலைவுக்குச் சென்று பார்க்கும் தொழில்நுட்பம் நம்மிடம் இன்னும் இல்லை என்பதே நிதர்சனம்.
பழங்கால சான்றுகளும் புதிர்களும்:
ஆன்மீக மற்றும் புராணக் குறிப்புகளிலும் காலத்தைக் கடக்கும் சில நிகழ்வுகள் மறைமுகமாகக் குறிப்பிடப்பட்டுள்ளன. உலகம் முழுவதும் உள்ள பழம்பெரும் சிலைகள், பாறை ஓவியங்கள் மற்றும் கல்வெட்டுகளில் இன்று நாம் பயன்படுத்தும் நவீன கருவிகள் போன்ற உருவங்கள் செதுக்கப்பட்டிருப்பது வியப்பை ஏற்படுத்துகிறது. பழங்கால மனிதர்கள் ஏதேனும் ஒரு வழியில் காலத்தைக் கடந்து இவற்றை உணர்ந்திருப்பார்களோ என்ற கேள்விகள் இன்றும் ஆராய்ச்சியாளர்களிடையே தொடர்கின்றன.
வருங்காலம் விடை சொல்லும்:
சில நூற்றாண்டுகளுக்கு முன்பு வாழ்ந்தவர்களிடம், “கையில் ஒரு சிறு கருவியை வைத்துக்கொண்டு உலகத்தின் எந்த மூலையில் இருப்பவருடனும் முகம் பார்த்துப் பேச முடியும்” (மொபைல் போன்) என்றோ, “இரும்பாலான வாகனங்கள் வானில் பறக்கும்” (விமானம்) என்றோ கூறியிருந்தால் அவர்கள் நம்பியிருக்க மாட்டார்கள். ஆனால், இன்றைய காலகட்டத்தில் அவை அன்றாடப் பழக்கமாகிவிட்டன.
அதேபோல்தான் கால பயணமும். தற்போதைய அறிவுக்கு இது சாத்தியமற்றதாகத் தோன்றினாலும், எதிர்கால அறிவியல் மற்றும் குவாண்டம் இயற்பியல் வளர்ச்சியில் இது சாத்தியமானாலும் வியப்பதற்கில்லை. காலத்தின் மர்மங்களுக்கு விடைகளை வருங்காலமே சொல்லும்.
