Rahul gandhi: கிரிக்கெட்டில் தோனியை போலவே ராகுல் காந்தியும் இந்திய அரசியலில் சிறந்த ‘பினிஷர் என்றும் இதனால்தான் பல தலைவர்கள் காங்கிரசை விட்டு சென்றுவிட்டனர் என்று ராஜ்நாத் சிங் பேச்சு சர்ச்சையை கிளப்பியுள்ளது.
மத்தியப் பிரதேசத்தின் சித்தி மாவட்டத்தில் நடைபெற்ற தேர்தல் பிரச்சாரக் கூட்டத்தில் பேசிய பாஜக மூத்த தலைவர் ராஜ்நாத் சிங், ஊழலுடன் காங்கிரஸுக்கு உடைக்க முடியாத உறவு இருப்பதாகவும் குற்றம் சாட்டினார். காங்கிரஸ் ஒரு காலத்தில் இந்திய அரசியலில் ஆதிக்கம் செலுத்தியது, ஆனால் இப்போது அது இரண்டு அல்லது மூன்று சிறிய மாநிலங்களில் மட்டுமே ஆட்சியைக் கொண்டுள்ளது, என்றார்.
“ஏன் இப்படி நடக்கிறது என்று சில சமயங்களில் யோசித்து, இந்த முடிவுக்கு வருகிறேன். கிரிக்கெட்டில் சிறந்த ஃபினிஷர் யார்? தோனி. இந்திய அரசியலில் யார் சிறந்த ஃபினிஷர் என்று என்னிடம் யாராவது கேட்டால், அது ராகுல் காந்தி என்று சொல்வேன். பல தலைவர்கள் காங்கிரசை விட்டு வெளியேறுவதற்கு இதுவே காரணம்” என்று ராஜ்நாத் சிங் கூறினார்.
காங்கிரஸும் ஊழலும் பிரிக்க முடியாத வகையில் இணைக்கப்பட்டுள்ளன, பெரும்பாலான காங்கிரஸ் அரசாங்கங்கள் ஊழல் குற்றச்சாட்டுகளை எதிர்கொண்டன, ஆனால் பிரதமர் நரேந்திர மோடியின் அரசாங்கத்தில் எந்த அமைச்சர் மீதும் இதுபோன்ற குற்றச்சாட்டுகள் எதுவும் கூறப்படவில்லை என்று சிங் கூறினார். பிரதமர் மோடி, நாட்டு மக்களை பல்வேறு இன்னல்களிலிருந்து பாதுகாப்பதற்காக உத்தரவாதங்களை தந்துகொண்டிருக்கும் வேளையில் எதற்கும் உதவாத எதிர்கட்சிகள் வெறுப்பை பரப்பி வருகின்றனர். பாஜக தனது தேர்தல் வாக்குறுதிகள் ஒவ்வொன்றையும் நிறைவேற்றி வருகிறது. நாங்கள் ராமர் கோயில் கட்டப்படும் என்று கூறியபோது எங்களை கிண்டலடித்தனர். ஆனால் அது கட்டப்பட்டது.
ஆட்சியில் இருக்கும்போது காங்கிரஸ் கட்சி பல்வேறு வாக்குறுதிகளை அளித்திருந்தது. அவற்றையெல்லாம் நிறைவேற்றி இருந்தாலே இந்தியா எப்போதோ வலிமையான நாடாக மாறியிருக்கும். ஆனால் இன்னொரு பக்கம் பாஜக பத்தே ஆண்டுகளில் அனைத்து வாக்குறுதிகளையும் நிறைவேற்றி உள்ளது” என்று ராஜ்நாத் சிங் தெரிவித்தார்.
