விழுப்புரம் மாவட்டத்தில் அமைந்துள்ள பனையபுரம் பனங்காட்டீஸ்வரர் கோவில், வரலாற்று முக்கியத்துவம் மற்றும் ஆன்மீக சிறப்புகளால் பக்தர்களிடையே பெரும் வரவேற்பைப் பெற்றுள்ளது. கண் நோய்களுக்கு பரிகாரத் தலமாகவும், சூரியன் இறைவனை வழிபடும் அபூர்வ தலமாகவும் இக்கோவில் சிறப்பாக விளங்குகிறது.
விழுப்புரம் அருகே பனையபுரம் கிராமத்தில் அமைந்துள்ள இந்த பழமையான திருக்கோவில், ஸ்ரீ சத்தியாம்பிகை சமேத நேத்ரோதாரனேஸ்வரர் ஆலயமாகவும் அறியப்படுகிறது. ஏழாம் நூற்றாண்டில் திருஞானசம்பந்தரால் தேவாரம் பாடப்பெற்ற நடுநாட்டு திருத்தலங்களில் ஒன்றாக இது குறிப்பிடப்படுகிறது. 274 தேவாரத் தலங்களில் 231வது தலமாகவும் இக்கோவில் இடம்பெற்றுள்ளது.
இந்த கோவிலின் முக்கிய சிறப்பாக, ஒவ்வொரு ஆண்டும் சித்திரை மாதத்தில் தொடர்ந்து ஏழு நாட்கள் சூரியக் கதிர்கள் முதலில் சிவபெருமானின் மீது விழுந்து பின்னர் அம்பிகையின் மீது விழும் அபூர்வ நிகழ்வு நடைபெறுகிறது. இது பக்தர்களை ஆச்சரியத்தில் ஆழ்த்தும் இயற்கை–ஆன்மீக இணைப்பு எனக் கருதப்படுகிறது.
கோவில் வளாகத்தில் விநாயகர் மற்றும் ஆறுமுகர் சன்னதிகள் அமைந்துள்ளன. பனைமரம் மற்றும் வில்வமரம் தலமரங்களாகக் கருதப்பட்டு கோவிலைச் சூழ்ந்து காணப்படுகின்றன. அம்பாள் சன்னதி கிழக்கு நோக்கி அமைந்துள்ளது. பண்டைய காலத்தில் இப்பகுதி முழுவதும் பனைமரக் காடாக இருந்ததாகவும், பின்னர் சிவபெருமான் இத்தலத்தில் அருள்பாலித்ததாகவும் வரலாற்று மற்றும் புராணக் கதைகள் கூறுகின்றன. இதன் காரணமாக பனைமரம் இன்றும் கோவிலின் அடையாளமாக விளங்குகிறது.
சிபிச் சக்கரவர்த்தி புறாவிற்காக தனது உடல் தசையை தானமாக அளித்ததாகக் கூறப்படும் தலமாகவும் இக்கோவில் அறியப்படுகிறது. இதன் காரணமாக கோவில் வளாகத்தில் அதிகளவில் புறாக்கள் காணப்படுவது சிறப்பாக பார்க்கப்படுகிறது. கண் கோளாறுகள் மற்றும் பார்வை தொடர்பான பிரச்சனைகளுக்கு நிவாரணம் கிடைக்கும் தலமாகவும் பக்தர்கள் நம்பிக்கை கொண்டுள்ளனர். இதனால் ஆண்டுதோறும் பல்வேறு பகுதிகளில் இருந்து ஆயிரக்கணக்கான பக்தர்கள் இக்கோவிலுக்கு வந்து வழிபட்டு செல்கின்றனர்.
Read more: Walking: தினமும் 30 நிமிடங்கள் மட்டும் நடந்தால் போதும்.. உங்களுக்கு எவ்வளவு நல்லது தெரியுமா..?
