நவம்பர் 1, 2026 முதல் ஜிஎஸ்டி (GST) வரி நடைமுறைகளில் பல்வேறு மாற்றங்களை மத்திய அரசு படிப்படியாக அறிமுகப்படுத்த உள்ளது. வரிக் கணக்கு தாக்கல் செய்வதை எளிமையாக்குவது, கணக்குகளில் ஏற்படும் முரண்பாடுகளைக் குறைப்பது, வரித் திரும்பப்பெறுதலை விரைவுபடுத்துவது ஆகிய நோக்கங்களுடன் இந்த நடவடிக்கைகள் மேற்கொள்ளப்படுகின்றன. இதற்கான சீர்திருத்தங்களுக்கு அக்டோபர் 8-ம் தேதி நடைபெற்ற 57-வது ஜிஎஸ்டி கவுன்சில் கூட்டத்தில் ஒப்புதல் அளிக்கப்பட்டது.
முதற்கட்டமாக, ஜிஎஸ்டி சட்டத்தில் திருத்தம் செய்ய வேண்டிய அவசியமில்லாத நடைமுறை மாற்றங்கள் நவம்பர் 1 முதல் செயல்படுத்தப்பட உள்ளன. இதன் ஒரு பகுதியாக, GSTR-1, GSTR-1A மற்றும் Invoice Furnishing Facility (IFF) ஆகிய படிவங்களின் வரைவு நகல்கள் நவம்பர் 1-ம் தேதி myGov இணையதளத்தில் வெளியிடப்படும். வணிக நிறுவனங்களும் சம்பந்தப்பட்ட தரப்பினரும் நவம்பர் 30-ம் தேதி வரை தங்களது கருத்துகளையும் பரிந்துரைகளையும் அளிக்கலாம். திருத்தப்பட்ட படிவங்கள் 2027 ஏப்ரல் 1 முதல் நடைமுறைக்கு வரும் என எதிர்பார்க்கப்படுகிறது.
ஜிஎஸ்டி கணக்குகளில் உள்ள விவரங்கள் ஒன்றுக்கொன்று பொருந்தாமல் இருப்பதே பல வரி நோட்டீஸ்களுக்குக் காரணமாக உள்ளது. குறிப்பாக, சுமார் 80 சதவீத ஜிஎஸ்டி நோட்டீஸ்கள் கணக்கு தாக்கல் விவரங்களில் ஏற்படும் முரண்பாடுகளால் உருவாகின்றன என மத்திய மறைமுக வரிகள் மற்றும் சுங்க வாரியத்தின் (CBIC) அதிகாரி கவுரவ் சிங் தெரிவித்துள்ளார். புதிய படிவங்கள் மூலம் GSTR-1 மற்றும் GSTR-3B ஆகியவற்றில் உள்ள விவரங்களைச் சீராகப் பொருத்தி, தவறுகளையும் தேவையற்ற நோட்டீஸ்களையும் குறைக்கத் திட்டமிடப்பட்டுள்ளது.
ஆண்டுக்கு ரூ.5 கோடிக்கும் குறைவான விற்றுமுதல் கொண்ட, வாடிக்கையாளர்களுக்கு நேரடியாகப் பொருட்களை விற்பனை செய்யும் (B2C) தகுதியுள்ள சிறு வணிகர்களுக்கு மாற்று வரிக் கணக்கு தாக்கல் முறை அறிமுகப்படுத்தப்பட உள்ளது. இதன்படி, தகுதி பெறும் நிறுவனங்கள் ஆண்டுக்கு ஒருமுறை வரிக் கணக்கைத் தாக்கல் செய்துவிட்டு, காலாண்டுக்கு ஒருமுறை ஜிஎஸ்டி செலுத்தும் வசதியைப் பெறலாம். மேலும், ரூ.5 கோடி வரை விற்றுமுதல் கொண்ட நிறுவனங்கள், தாமதமான கணக்குகளை அதே காலண்டர் மாதத்திற்குள் தாக்கல் செய்தால், தாமதக் கட்டணத்தில் நிவாரணம் பெறவும் வழிவகை செய்யப்பட்டுள்ளது.
ஜிஎஸ்டி வரித் திரும்பப்பெறுதலை விரைவுபடுத்தும் வகையில், தகுதி உள்ள விண்ணப்பங்களுக்கு தானியங்கி முறையில் ஒப்புதல் வழங்கும் வசதியும் நவம்பர் 1-க்குப் பிறகு அறிமுகப்படுத்தப்பட உள்ளது. இந்த வசதி புதியதாகச் சமர்ப்பிக்கப்படும் வரித் திரும்பப்பெறுதல் விண்ணப்பங்களுக்குப் பொருந்தும். ஏற்கெனவே நிலுவையில் உள்ள விண்ணப்பங்களுக்கு இது பொருந்தாது. இதன் மூலம் பணம் திரும்பக் கிடைப்பதில் ஏற்படும் தாமதத்தைக் குறைத்து, நிறுவனங்களின் பணப்புழக்கத்தை மேம்படுத்த முடியும் என எதிர்பார்க்கப்படுகிறது.
ஆன்லைன் வர்த்தகத்தில் ஈடுபடும் தகுதியுள்ள விற்பனையாளர்களுக்கும் புதிய சலுகை முன்மொழியப்பட்டுள்ளது. தங்களுக்கென நேரடி வணிக இடம் இல்லாத மாநிலங்களில், இ-காமர்ஸ் தளத்தின் கிடங்கையே தங்களது முதன்மை வணிக முகவரியாகப் பதிவு செய்யும் வசதியை அவர்கள் பெறலாம். இதற்கு மாதந்தோறும் ரூ.2.5 லட்சம் வரையிலான உள்ளீட்டு வரிக் கடன் (ITC) தொடர்பான வரம்பு நிர்ணயிக்கப்பட்டுள்ளது. குறிப்பிட்ட சில சரக்கு இடமாற்றங்களுக்கு இதில் விலக்கு அளிக்கப்படும். இருப்பினும், சம்பந்தப்பட்ட மாநிலங்களில் ஜிஎஸ்டி பதிவு, கணக்கு தாக்கல் மற்றும் வரி செலுத்துதல் தொடர்பான நடைமுறைகளைத் தொடர்ந்து பின்பற்ற வேண்டும்.
கைது நடவடிக்கைகள் தொடர்பான விதிகள், குற்றவியல் நடவடிக்கைக்கான வரம்புகள் மற்றும் இ-வே பில் நடைமுறைகளில் மாற்றங்கள் 2027 ஏப்ரல் 1 முதல் அமல்படுத்த இலக்கு நிர்ணயிக்கப்பட்டுள்ளது. மேலும், விளக்கம் கோரும் நோட்டீஸ்களை அனுப்புவதற்கு குறைந்தபட்சம் ரூ.10,000 என்ற வரம்பை நிர்ணயிக்கும் முன்மொழிவும் இடம்பெற்றுள்ளது. உள்ளீட்டு வரிக் கடன் கோரிக்கைகளை GSTR-2B விவரங்களுடன் ஒப்பிட்டு சரிபார்க்கவும், சந்தேகத்திற்குரிய ரசீதுகளைக் கண்டறியவும் கூடுதல் கண்காணிப்பு நடவடிக்கைகள் மேற்கொள்ளப்பட உள்ளன.
எனினும், அக்டோபர் 8-ம் தேதி நடைபெற்ற ஜிஎஸ்டி கவுன்சில் கூட்டத்தில் வரி விகிதங்களில் எந்த மாற்றமும் அறிவிக்கப்படவில்லை. வரி விகிதங்கள் தொடர்பான முடிவுகள் தனியாகப் பரிசீலிக்கப்படும். மேற்கண்ட சீர்திருத்தங்கள் அனைத்தும் ஒரே நேரத்தில் அமலுக்கு வராமல், வெவ்வேறு கட்டங்களாக நடைமுறைப்படுத்தப்பட உள்ளன.
Also Read: நியூசிலாந்துக்கு எதிரான 3-வது டி20 போட்டி.. இந்திய அணிக்கு பின்னடைவு! விலகிய இஷான் கிஷன்..
