13 வயதிலேயே தனது பெற்றோருக்காக ஒரு சொந்த வீடு வாங்க வேண்டும் என்று முடிவு செய்திருந்தார் இந்திய கிரிக்கெட் வீராங்கனை ஸ்மிருதி மந்தனா. அப்போது வாடகை வீட்டில் வசித்து வந்த தனது குடும்பத்திற்காக, எதிர்காலத்தில் சம்பாதிக்கும் பணத்தில் வீடு வாங்குவதை இலக்காக வைத்திருந்த அவர், அதற்காக ஒரு வித்தியாசமான முறையையும் பின்பற்றியுள்ளார். வெற்றுத் தொகையுடன் ஒரு காசோலையை எழுதி, அந்தக் கனவை தினமும் மனதில் காட்சிப்படுத்தி வந்துள்ளார்.
பாட்காஸ்டர் ராஜ் ஷமானியுடன் நடந்த சமீபத்திய உரையாடலில் தனது சிறுவயது அனுபவம் குறித்து மந்தனா பேசியுள்ளார். தனது பயிற்சியாளர் அறிமுகப்படுத்திய இலக்கு நிர்ணயிக்கும் பயிற்சியின் ஒரு பகுதியாக, தான் அடைய விரும்பிய விஷயங்களை எழுதி வைக்கத் தொடங்கியதாக அவர் கூறியுள்ளார்.
அப்போது அவர் எழுதிய இலக்குகளில் ஐசிசி தரவரிசையில் நம்பர் 1 பேட்ஸ்வுமனாக வேண்டும், உலகக் கோப்பையை வெல்ல வேண்டும் என்பதுடன், தனது பெற்றோருக்கு சொந்தமாக ஒரு வீடு வாங்க வேண்டும் என்பதும் இடம்பெற்றிருந்தது.
இதில் வீடு வாங்க வேண்டும் என்ற எண்ணம் அவருக்கு மிகவும் தனிப்பட்ட இலக்காக இருந்தது. மந்தனாவின் குடும்பம் அப்போது வாடகை வீட்டில் வசித்து வந்தது. தனது பெற்றோர் தனக்காக செய்த தியாகங்களை நினைத்து, அவர்களுக்கு சொந்தமான ஒரு வீட்டை வாங்க வேண்டும் என்பதையே தனது முக்கிய இலக்காக வைத்திருந்தார்.
அந்த இலக்கை வெறும் காகிதத்தில் எழுதி வைக்காமல், வீட்டை வாங்கிவிட்டதாக கற்பனை செய்து வந்தார். பணம் குறிப்பிடப்படாத ஒரு காசோலையையும் எழுதி வைத்திருந்தார். ஆரம்பத்தில் இதுபோன்ற பயிற்சிகளில் தனக்கு பெரிய நம்பிக்கை இல்லை என்றாலும், தொடர்ந்து அந்தப் பழக்கத்தை கடைப்பிடித்ததாக மந்தனா தெரிவித்துள்ளார்.
அந்த கனவு சில ஆண்டுகளிலேயே நனவானது. 18 வயதில் தனது பெற்றோருக்காக சொந்தமாக ஒரு வீட்டை வாங்கினார் மந்தனா.
ஆனால், 13 வயதில் இலக்கை எழுதிவைத்ததற்கும் 18 வயதில் அதை நிறைவேற்றியதற்கும் இடையில் இருந்தது கடுமையான கிரிக்கெட் பயணம். தொடர்ந்து பயிற்சி, உள்ளூர் போட்டிகள், பயணங்கள், தோல்விகள், அழுத்தம் என பல்வேறு சவால்களை எதிர்கொண்டே அவர் தனது கிரிக்கெட் வாழ்க்கையை வளர்த்துக் கொண்டார்.
2013ஆம் ஆண்டு இந்திய அணியில் அறிமுகமான மந்தனா, அடுத்தடுத்த ஆண்டுகளில் சர்வதேச கிரிக்கெட்டில் தனக்கென ஒரு முக்கிய இடத்தை உருவாக்கினார். உலகக் கோப்பை போட்டிகளில் இந்திய அணிக்காக விளையாடியதுடன், மகளிர் கிரிக்கெட்டின் முக்கியமான வீராங்கனைகளில் ஒருவராகவும் உயர்ந்தார்.
தனது உரையாடலில், போட்டிகளில் ஏற்படும் தவறுகள், தோல்விகள், அழுத்தம், தலைமைப் பொறுப்பு உள்ளிட்ட பல்வேறு விஷயங்கள் குறித்தும் மந்தனா பேசியுள்ளார். சிறுவயதில் எழுதிவைத்த இலக்குகளை நினைவுகூர்ந்த அவர், அவற்றை அடைய கடின உழைப்பும் தொடர்ந்து முயற்சியும் முக்கியமாக இருந்ததாக தனது பயணத்தின் மூலம் எடுத்துக்காட்டியுள்ளார்.
13 வயதில் பெற்றோருக்காக வீடு வாங்க வேண்டும் என்று நினைத்த மந்தனா, 18 வயதில் அதை நிஜமாக்கியுள்ளார். கிரிக்கெட் சாதனைகளுக்கு முன்பாகவே தனது வெற்றியின் முதல் பெரிய இலக்கை பெற்றோருக்காக நிர்ணயித்திருந்த அவரது இந்தப் பயணம் தற்போது கவனம் பெற்றுள்ளது.
Also Read: வீட்டில் தனியாக இருந்த பெண் கொடூரமாக கொலை.. கடைசியாக வந்த நபர் யார்? போலீசாரை அதிரவைத்த சம்பவம்!
