மறைந்த புகழ்பெற்ற இசையமைப்பாளர் ‘தேனிசை தென்றல்’ தேவாவின் உடலுக்கு தமிழக அரசின் சார்பில் முழு அரசு மரியாதையுடன் இறுதிச் சடங்குகள் நடைபெறும் என்று தமிழ்நாடு அரசு அதிகாரப்பூர்வமாக அறிவித்துள்ளது. தமிழ் இசை உலகிற்கு அவர் ஆற்றிய பொன்னான சேவையைப் போற்றும் வகையிலும், அவரது கலைப் பங்களிப்பைச் சிறப்பிக்கும் வகையிலும் இந்த உயரிய மரியாதை அளிக்கப்படுகிறது.
அரசியல் மற்றும் திரைத்துறை பிரபலங்கள் நேரில் அஞ்சலி:
சென்னை கோடம்பாக்கத்தில் உள்ள தேவாவின் இல்லத்தில் பொதுமக்களின் அஞ்சலிக்காக அவரது உடல் கண்ணாடிப் பேழையில் வைக்கப்பட்டுள்ளது. அங்கு வைக்கப்பட்டுள்ள அவரது உடலுக்கு அரசியல் தலைவர்கள், திரைத்துறை பிரபலங்கள் மற்றும் ரசிகர்கள் பலரும் நேரில் சென்று கண்ணீர் மல்க அஞ்சலி செலுத்தி வருகின்றனர்.
திமுக தலைவரும், முன்னாள் முதலமைச்சருமான மு.க.ஸ்டாலின், உதயநிதி ஸ்டாலின் மற்றும் தயாநிதி மாறன் உள்ளிட்டோர் நேரில் சென்று தேவாவின் உடலுக்கு மலர்வளையம் வைத்து அஞ்சலி செலுத்தினர். கண்ணாடிப் பேழையில் உறங்கிக் கொண்டிருக்கும் தேவாவின் உடலைக் கண்டு துயரத்தில் மூழ்கிய மு.க.ஸ்டாலின், அவரது குடும்பத்தினரை நேரில் சந்தித்து தனது ஆழ்ந்த ஆறுதலையும் இரங்கலையும் தெரிவித்தார். முன்னதாக, தேவா மறைவு தனக்கு மிகுந்த மனவேதனை அளிப்பதாக முதலமைச்சர் விஜய் தனது இரங்கலைத் தெரிவித்திருந்தது குறிப்பிடத்தக்கது.
ஐயப்பனுக்கே கானா பாடிய இசைச் சாதனையாளர்:
தேவாவின் பல கானா பாடல்கள் வெறும் பொழுதுபோக்குடன் நின்றுவிடாமல், தமிழ் இசை உலகில் எக்காலத்திலும் தனித்துவமான புதுமைகளைக் கொண்டவையாகத் திகழ்ந்தன. அந்த வகையில், 1998 ஆம் ஆண்டு நடிகர் சரவணன் நடிப்பில் வெளியான ‘சந்தோஷம்’ திரைப்படத்தில் இடம்பெற்ற ‘காலையில் எழுந்து’ பாடல் மிகவும் புகழ்பெற்றது.
இது வழக்கமான பக்திப் பாடல்கள் போலல்லாமல், ஐயப்பன் பஜனையில் பாடும் ஒரு அசல் கானா பாடலாக அமைக்கப்பட்டிருக்கும். ஒரு சாதாரண சாமானிய மனிதன், கடவுளான ஐயப்பனைப் பார்த்து உரிமையுடன் பேசுவது போலவும் பாடுவது போலவும் இந்தப்பாடல் உருவாக்கப்பட்டு இருந்தது தமிழ் இசை ரசிகர்களை வெகுவாகக் கவர்ந்தது.
முதல்வர் விஜய்யை முதன்முதலில் பாடகராக அறிமுகப்படுத்திய தேவா:
தமிழ் சினிமாவில் எத்தனையோ மாபெரும் வெற்றிகளைக் கொடுத்த தேவா, இன்றைய முதலமைச்சரும், அன்றைய நடிகருமான விஜய்யை முதன்முதலாகப் பாடகராகத் திரையுலகிற்கு அறிமுகப்படுத்திய பெருமைக்குரியவர்.
கடந்த 1994 ஆம் ஆண்டு வெளியான ‘ரசிகன்’ திரைப்படத்தில் இடம்பெற்ற ‘பாம்பே சிட்டி சுக்கா ரொட்டி’ எனும் சூப்பர் ஹிட் பாடல் மூலம் விஜய்யைப் பாடகராக மைக் பிடிக்கச் செய்தவர் தேவாதான். அதனைத் தொடர்ந்து, ‘ஒரு கடிதம்’, ‘அய்யய்யோ அலமேலு’, ‘தொட்டபேட்டா ரோட்டு மேல முட்டை பரோட்டா’, ‘தங்க நிறத்துக்கு’ என தேவா – விஜய் காம்பினேஷனில் வெளிவந்த அத்தனை பாடல்களும் பட்டிதொட்டியெங்கும் பிளாக்பஸ்டர் ஹிட் அடித்து சாதனை படைத்தது குறிப்பிடத்தக்கது.
