மேற்கு வங்கத்தில் இரண்டாம் கட்ட வாக்குப்பதிவுக்கு முன்னதாக, பிரதமர் நரேந்திர மோடி திங்களன்று பாஜகவுக்காக தீவிர பிரச்சாரம் செய்தார். பராக்பூரில் நடந்த ஒரு பொதுக்கூட்டத்தில் உரையாற்றிய அவர், மாநிலத்தில் இதுவே தனது இறுதிப் பிரச்சார நிகழ்வு என்று விவரித்ததோடு, கட்சியின் செயல்பாட்டில் நம்பிக்கை தெரிவித்தார். பாஜகவின் பதவியேற்பு விழாவில் கலந்துகொள்ள மீண்டும் திரும்புவதாகவும், இதன் மூலம் கட்சி ஆட்சி அமைக்கும் என்ற நம்பிக்கையை வெளிப்படுத்துவதாகவும் அவர் கூறினார்.
“இந்தத் தேர்தலில் இது எனது கடைசிப் பொதுக்கூட்டம். மே 4 தேர்தல் முடிவுகளுக்குப் பிறகு பாஜகவின் பதவியேற்பு விழாவில் நான் நிச்சயமாகக் கலந்துகொள்வேன் என்ற நம்பிக்கையுடன் திரும்பிச் செல்கிறேன். அது எனது உற்சாகத்தை மேலும் அதிகரிக்கிறது. நான் ஹெலிபேடில் இருந்து இங்கு வந்துகொண்டிருந்தேன். அது சுமார் இரண்டு கிலோமீட்டர் நீளமுள்ள பகுதி. இருபுறமும் மிகப்பெரிய கூட்டம் இருந்தது. அதிகாலையில் ஆயிரக்கணக்கான மக்கள் வந்து என்னை வாழ்த்துவதை என்னால் கற்பனை செய்துகூட பார்க்க முடியவில்லை,” என்று அவர் கூறினார்.
ஆளும் திரிணாமூல் காங்கிரஸ் (TMC) மீது பிரதமர் மோடி கடுமையான விமர்சனங்களை முன்வைத்தார்.. திரிணாமூல்ஆட்சியில் மாநிலத்தில் தொழில்துறை நடவடிக்கைகள் குறைந்துவிட்டதாகவும், தொழிற்சாலைகள் மூடப்பட்டுவிட்டதாகவும் அவர் குற்றம் சாட்டினார்.
மேற்கு வங்கத்தின் எதிர்கால வளர்ச்சிக்கு திரிணாமுல் காங்கிரஸ் அரசிடம் தெளிவான செயல் திட்டம் இல்லை என்று அவர் கூறினார். “இரட்டை எஞ்சின் அரசு” தேவை என்பதை வலியுறுத்திய மோடி, மாநில அரசும் மத்திய அரசும் ஒருங்கிணைந்து செயல்பட்டால் மட்டுமே விரைவான வளர்ச்சி சாத்தியமாகும் என்று வாதிட்டார்.
ஆளும் கட்சியை மேலும் குறிவைத்த அவர், திரிணாமுல் காங்கிரஸின் “சிண்டிகேட் அமைப்பு” கலைக்கப்பட வேண்டும் என்று குற்றம் சாட்டினார். ஆக்கப்பூர்வமான ஆட்சியை விட, அச்சுறுத்தல் மற்றும் வசைச் சொற்களைப் பயன்படுத்தும் அரசியலை அக்கட்சி நம்பியிருப்பதாகவும் அவர் குற்றம் சாட்டினார்.
பெண் வாக்காளர்கள் தங்கள் வாக்குகளைப் பதிவு செய்யும்போது திரிணாமுல் காங்கிரஸின் (TMC) செயல்பாடுகளைப் பற்றி சிந்திக்க வேண்டும் என்று பிரதமர் மோடி வலியுறுத்தினார். அக்கட்சி அவர்களின் நம்பிக்கையைக் காப்பாற்றத் தவறிவிட்டது என்றும் அவர் குற்றம் சாட்டினார்.
திரிணாமுல் காங்கிரஸ் மாநிலத்தை பெண்களுக்கு பாதுகாப்பற்றதாக ஆக்கியுள்ளது என்றும், மக்கள் அளித்த ஆணையை மதிக்கவில்லை என்றும் அவர் கூறினார். திரிணாமுல் காங்கிரஸின் பெயரில் நடந்ததாகக் கூறப்படும் முறைகேடுகள் மற்றும் அச்சுறுத்தல்களின் நிகழ்வுகளை வாக்காளர்கள் நினைவில் கொள்ள வேண்டும் என்றும் அவர் கேட்டுக்கொண்டார்.
கடந்தகால வாக்குறுதிகளைக் குறிப்பிட்ட அவர், லண்டனைப் போல கொல்கத்தாவை மேம்படுத்துவதாக திரிணாமுல் காங்கிரஸ் உறுதியளித்திருந்ததாகவும், ஆனால் கடந்த 15 ஆண்டுகளில் நகரத்தின் அடையாளம் எதிர்மறையாக மாறிவிட்டதாகவும் குறிப்பிட்டார். மேலும், சட்டவிரோத ஊடுருவல்கள் நகரில் குடியேற அனுமதிக்கப்பட்டுள்ளதாகவும் அவர் குற்றம் சாட்டினார்.
கொல்கத்தா நகரின் தனித்துவமான அடையாளத்தைப் பாதுகாப்பதற்காக, அந்நகர மக்கள் அனைவரும் ஒருங்கிணைந்து செயல்பட வேண்டும் என்று அவர் வேண்டுகோள் விடுத்தார்.
தனது கட்சிக்கு ஆதரவளிக்குமாறு வலியுறுத்திய அவர், வாக்காளர்கள் “தாமரைச் சின்னத்தை” தேர்வு செய்யுமாறு அழைப்பு விடுத்தார். இச்சின்னத்தைத் தேர்வுசெய்வது சிறந்த சட்டம்-ஒழுங்கு நிலையை உறுதி செய்யும் என்றும்; இதன் மூலம் பெண்கள் இரவில் கூட சுதந்திரமாகவும் பாதுகாப்பாகவும் நடமாட முடியும் என்றும்; மேலும் அநீதிக்கு ஆளான பெண்களுக்கு நீதி கிடைப்பது உறுதி செய்யப்படும் என்றும் அவர் குறிப்பிட்டார்.
மாநில இளைஞர்களை நோக்கிக் உரையாற்றிய மோடி, வேலைவாய்ப்பு மற்றும் நலத்திட்டங்களை மையமாகக் கொண்ட ஐந்து முக்கிய உத்தரவாதங்களை அறிவித்தார்:
மேற்கு வங்க இளைஞர்களுக்கான மோடியின் ஐந்து உத்தரவாதங்கள்:
சரியான நேரத்தில் அரசுப் பணி நியமனங்கள் – மாநில அரசின் அனைத்துப் பணி நியமன நடைமுறைகளும் திட்டமிட்ட கால அட்டவணைப்படி நிறைவு செய்யப்படும்.
காலியிடங்களை நிரப்புதல் – தற்போதுள்ள அனைத்து அரசுப் பணி காலியிடங்களும் எவ்விதத் தாமதமுமின்றி நிரப்பப்படும்.
திறன் மேம்பாட்டுடன் இணைந்த வேலைவாய்ப்புகள் – வேலைவாய்ப்பு ருவாக்கமானது, திறன் மேம்பாட்டுடன் ஒருங்கிணைந்த வகையில் அமையும்.
7-வது ஊதியக் குழுவின் பலன்கள் – மேற்கு வங்க அரசு ஊழியர்கள், 7-வது ஊதியக் குழுவின் பரிந்துரைகளின்படியான பலன்களைப் பெறுவார்கள்.
G-RAM-G கிராமப்புற வேலைவாய்ப்புத் திட்டம் – கிராமங்களில் வேலைவாய்ப்புகளைப் பெருக்கும் நோக்கில், இந்த கிராமப்புற வேலைவாய்ப்புத் திட்டம் செயல்படுத்தப்படும்.
மேற்கு வங்க சட்டமன்றத் தேர்தல் 2026
மேற்கு வங்க சட்டமன்றத் தேர்தலின் முதல் கட்ட வாக்குப் பதிவு ஏப்ரல் 23 அன்று நடைபெற்றது. இந்த தேர்தலில் இதுவரை இல்லாத அளவுக்கு 93.19 சதவீதம் என்ற மிக உயர்ந்த அளவிலான வாக்குப் பதிவு பதிவாகியுள்ளது என்றும், இதுவே அம்மாநில வரலாற்றிலேயே மிக அதிகமான வாக்குப் பதிவு என்றும் தேர்தல் ஆணையம் சனிக்கிழமையன்று தெரிவித்தது.
இரண்டாம் கட்ட வாக்குப் பதிவு ஏப்ரல் 29 அன்று நடைபெற உள்ளது; வாக்குகள் மே 4-ம் தேதி எண்ணப்பட்டு முடிவுகள் அறிவிக்கப்படும்..
Read More : கேஸ் பயனர்களுக்கு முக்கிய எச்சரிக்கை..! மே 1 முதல் புதிய விதிகள்.. முன்பதிவில் புதிய கட்டுப்பாடுகள்..!
