சொந்தமாக கட்டிய ரூ.75 லட்சம் மதிப்பிலான வீட்டை இழந்து, தற்போது சிறிய வாடகை அறையில் வாழ்க்கையை நகர்த்தி வருகின்றனர் வயதான தம்பதி. பெற்ற மகன் மற்றும் மருமகளால் ஏற்பட்ட பிரச்சினை காரணமாக இந்த நிலைக்கு வந்ததாக அவர்கள் கண்ணீருடன் பகிர்ந்துள்ள வீடியோ சமூக வலைத்தளங்களில் கவனம் பெற்றுள்ளது.
வயதான காலத்தில் தங்களுக்கென ஒரு பாதுகாப்பான வாழ்க்கையை அமைத்துக்கொள்ள வேண்டும் என்ற எண்ணத்தில், பல ஆண்டுகள் உழைத்து பணத்தை சேமித்துள்ளனர் அந்த தம்பதி. அந்த சேமிப்பை பயன்படுத்தி சுமார் ரூ.75 லட்சம் செலவில் அனைத்து வசதிகளும் கொண்ட பிரம்மாண்டமான வீட்டையும் கட்டியுள்ளனர்.
வீடு கட்டிய பிறகு குடும்பத்துடன் நிம்மதியாக வாழ வேண்டும் என்ற அவர்களின் எதிர்பார்ப்பு நீண்ட காலம் நீடிக்கவில்லை. மகன் மற்றும் மருமகளிடம் சொத்து தொடர்பான உரிமைகள் சென்ற பிறகு தங்களது வாழ்க்கையில் பல்வேறு பிரச்சினைகள் ஏற்பட்டதாக முதிய தம்பதி கூறியுள்ளனர். தங்களை கவனிப்பதுடன், மனரீதியாகவும் உடல்ரீதியாகவும் துன்புறுத்தியதாகவும் அவர்கள் குற்றம்சாட்டியுள்ளனர்.
இதன் முடிவில், தாங்கள் பல ஆண்டுகள் கஷ்டப்பட்டு உருவாக்கிய வீட்டிலிருந்து வெளியேற வேண்டிய கட்டாயம் ஏற்பட்டதாக அந்த தம்பதி தெரிவித்துள்ளனர். தற்போது வசதிகள் குறைந்த சிறிய வாடகை அறையில் வசித்து வரும் அவர்கள், தங்களது சொந்த வீட்டில் மகனும் மருமகளும் வசிப்பதை நினைத்து வேதனைப்படுவதாக தெரிவித்துள்ளனர்.
இந்த சம்பவம் தொடர்பாக அவர்கள் கண்ணீருடன் பேசிய வீடியோ இணையத்தில் பரவியதை அடுத்து, பலரும் தங்களது அதிருப்தியை பதிவு செய்து வருகின்றனர். பெற்றோர்களை வயதான காலத்தில் கைவிடுவது மனிதநேயமற்ற செயல் என நெட்டிசன்கள் விமர்சித்து வருகின்றனர்.
மேலும், தங்களது பிள்ளைகளுக்காக வாழ்நாள் முழுவதும் உழைக்கும் பெற்றோர்கள் வயதான பிறகு ஆதரவின்றி தவிக்கும் நிலை ஏற்படக்கூடாது என்றும், மூத்த குடிமக்களை கவனிக்கத் தவறும் வாரிசுகள் மீது சட்டரீதியான நடவடிக்கைகள் கடுமையாக்கப்பட வேண்டும் என்றும் பலர் வலியுறுத்தி வருகின்றனர்.
Also Read: ‘வெற்றிப் பயணம்’ திட்டம்.. பெண்கள் பயணிக்கும் முன் இதை கட்டாயம் தெரிஞ்சுக்கோங்க!
