ஐபிஎல் கிரிக்கெட் தொடரில் சென்னை சூப்பர் கிங்ஸ் அணியின் தலைமைப் பயிற்சியாளராக நீண்டகாலம் பணியாற்றிய ஸ்டீபன் பிளெமிங் சமீபத்தில் விலகியதை தொடர்ந்து, அந்த இடத்தை நிரப்புவது குறித்த விவாதங்கள் தீவிரமடைந்துள்ளன. கடந்த மூன்று ஆண்டுகளாக அணி பிளே-ஆஃப் சுற்றுக்குத் தகுதிபெற தவறியதை அடுத்து, சிஎஸ்கே அணியில் மிகப்பெரிய மாற்றங்கள் செய்யப்படவுள்ளன.
புதிய பயிற்சியாளரைத் தேர்வு செய்யும் பணியில் வெளிநாட்டு நபர் ஒருவரை நியமிக்க அணி நிர்வாகம் சில திட்டங்களை வகுத்திருந்தாலும், அணியின் மூத்த வீரரான எம்.எஸ். தோனியின் ஆலோசனையே இதில் திருப்புமுனையாக இருக்கும் என்று எதிர்பார்க்கப்படுகிறது. அணியின் வெற்றிக்குத் தொடர்ந்து பக்கபலமாக இருக்கும் தோனி, அமெரிக்கப் பயணத்தை முடித்துவிட்டு இந்த மாதம் சென்னை திரும்பியதும் நிர்வாகத்துடன் நேரடியாகப் பேச்சுவார்த்தை நடத்தவுள்ளார்.
வெளிநாட்டுப் பயிற்சியாளர் ஒருவரை நியமிக்க தொடக்கத்தில் சில யோசனைகள் இருந்தபோதிலும், அணியின் உள்நாட்டு வீரர்களைச் சிறப்பாகக் கையாளவும், முழுமையான கவனத்தை சிஎஸ்கே மீது செலுத்தவும் ஓர் இந்தியப் பயிற்சியாளர் நியமிக்கப்பட வேண்டும் என்பதே தோனியின் விருப்பமாக உள்ளதாகத் தகவல்கள் தெரிவிக்கின்றன. இதன் காரணமாக, முன்னாள் இந்திய வீரரும் டெல்லி கேபிடல்ஸ் அணியின் முன்னாள் பயிற்சியாளருமான ஹேமங் பதானி உள்ளிட்ட சில பெயர்கள் பரிசீலனையில் உள்ளதாகவும், விரைவில் இது குறித்த அதிகாரப்பூர்வ அறிவிப்பு வெளியாகும் என்றும் எதிர்பார்க்கப்படுகிறது.
