நடிகர் ரவிமோகனின் தனிப்பட்ட வாழ்க்கை தொடர்பான சர்ச்சைகள் தொடர்ந்து பேசுபொருளாகி வரும் நிலையில், பாடகி கெனிஷாவுடன் அவர் மீண்டும் ஒன்றாக இருக்கும் காட்சிகள் வெளியாகி புதிய பரபரப்பை ஏற்படுத்தியுள்ளன. இருவரும் கோவாவில் ஒன்றாக இருந்தபோது எடுக்கப்பட்ட வீடியோ சமூக வலைதளங்களில் தற்போது கவனம் பெற்று வருகிறது.
தமிழ் சினிமாவில் முன்னணி நடிகராக வலம் வரும் ரவிமோகன், தனது குடும்ப வாழ்க்கை தொடர்பான பிரச்சினைகளால் கடந்த சில காலமாக செய்திகளில் இடம்பெற்று வருகிறார். மனைவியுடனான உறவில் ஏற்பட்ட கருத்து வேறுபாடு தொடர்பான விவகாரம் பொதுவெளிக்கு வந்த நிலையில், பாடகி கெனிஷாவுடன் அவருக்கு இருந்த நெருக்கம் குறித்தும் பல்வேறு சர்ச்சைகள் எழுந்தன.
இதற்கிடையே, ரவிமோகனுடனான உறவில் இருந்து விலகுவதாக கெனிஷா வெளிப்படையாக அறிவித்தார். இதுகுறித்து பின்னர் பேசிய ரவிமோகன், கெனிஷாவின் முடிவு குறித்து தனது வேதனையை வெளிப்படுத்தியிருந்தார். இதனால் இருவரும் பிரிந்துவிட்டதாகவே ரசிகர்கள் கருதினர்.
ஆனால், தற்போது வெளியாகியுள்ள கோவா வீடியோ இந்த விவகாரத்தில் மீண்டும் திருப்பத்தை ஏற்படுத்தியுள்ளது. வீடியோவில் ரவிமோகனும் கெனிஷாவும் ஒன்றாக சுற்றுலா சென்ற காட்சிகள் இடம்பெற்றுள்ளன. மேலும், இருவரும் ஒரே சிகரெட்டை மாறி மாறி புகைக்கும் காட்சியும் அதில் காணப்படுகிறது.
இந்த வீடியோ எப்போது பதிவு செய்யப்பட்டது என்ற தகவல் தற்போது தெளிவாக இல்லை. கெனிஷா பிரிவை அறிவிப்பதற்கு முன்பு எடுக்கப்பட்டதா அல்லது அதற்குப் பின்னர் இருவரும் மீண்டும் சந்தித்தபோது பதிவு செய்யப்பட்டதா என்பதும் உறுதி செய்யப்படவில்லை.
இதனால் ரவிமோகன் – கெனிஷா மீண்டும் இணைந்துவிட்டார்களா என்ற கேள்வி ரசிகர்கள் மத்தியில் எழுந்துள்ளது. இருவரும் தங்களது தற்போதைய உறவு நிலை குறித்து இதுவரை எந்த புதிய விளக்கத்தையும் வெளியிடாத நிலையில், கோவா வீடியோ சமூக வலைதளங்களில் விவாதத்தை அதிகரித்துள்ளது.
Also Read: “சோம்பேறிகள்… தகுதியற்றவர்கள்!” அதிகாரிகளை விளாசிய கங்கனா ரனாவத்… ரூ.11 கோடி நிதி விவகாரத்தில் கடும் கோபம்!
