மனிதர்கள் ஏன் நீண்ட ஆயுளுடன் வாழ முடியவில்லை என்ற கேள்வி பல ஆண்டுகளாக விஞ்ஞானிகளை குழப்பி வருகிறது. இதற்கான ஒரு அதிர்ச்சிகரமான விளக்கத்தை தற்போது புதிய ஆய்வு ஒன்று முன்வைத்துள்ளது. அதன்படி, கோடிக்கணக்கான ஆண்டுகளுக்கு முன் பூமியை ஆட்சி செய்த டைனோசர்கள் தான் மனிதர்களின் குறுகிய ஆயுளுக்குப் பின்னணி காரணமாக இருக்கலாம் என கூறப்படுகிறது.
இங்கிலாந்தின் பர்மிங்காம் பல்கலைக்கழகம் சார்ந்த நுண்ணுயிரியலாளர் ஜோவோ பெட்ரோ டி மாகல்ஹேஸ் இந்த கருத்தை முன்வைத்துள்ளார். அவர் 2023-ஆம் ஆண்டு BioEssays இதழில் வெளியிட்ட கட்டுரையில், “நீண்ட ஆயுள் முட்டுக்கட்டை கருதுகோள்” (Longevity bottleneck hypothesis) என்ற புதிய கோட்பாட்டை விளக்குகிறார்.
இந்தக் கோட்பாட்டின்படி, டைனோசர்கள் பூமியில் ஆதிக்கம் செலுத்திய காலத்தில், ஆரம்பகால பாலூட்டிகள் உயிர்வாழ கடுமையான அழுத்தத்தை எதிர்கொண்டன. அப்போது அவை பெரும்பாலும் சிறியவையாகவும், இரவில் மட்டுமே இயங்குபவையாகவும் இருந்தன. டைனோசர்களின் வேட்டையிலிருந்து தப்பிக்க, அவை விரைவாக இனப்பெருக்கம் செய்யும் வழியைத் தேர்ந்தெடுத்தன.
இந்த “விரைவு இனப்பெருக்கம்” தான் முக்கிய மாற்றத்தை ஏற்படுத்தியது என ஆய்வு கூறுகிறது. அதாவது, உயிர்வாழ்வதற்கான அவசரத்தில், நீண்ட ஆயுளுக்குத் தேவையான மரபணுக்கள் மெதுவாக செயலிழந்தன அல்லது முற்றிலும் இழக்கப்பட்டன. இதுவே இன்று மனிதர்களின் குறுகிய ஆயுளுக்குக் காரணமாக இருக்கலாம் என விஞ்ஞானிகள் கருதுகின்றனர்.
மேலும், பாலூட்டிகளுக்கு உடலில் ஏற்பட்ட சேதங்களை முழுமையாக சரிசெய்யும் திறன் குறைவாக இருப்பதும் இந்த கோட்பாட்டை வலுப்படுத்துகிறது. உதாரணமாக, சில ஊர்வன விலங்குகளைப் போல உடல் உறுப்புகளை மீண்டும் வளர்க்கும் திறன் பாலூட்டிகளில் இல்லை. அதேபோல், மனிதர்களின் பற்கள் வாழ்நாள் முழுவதும் வளராது; புற ஊதாக் கதிர்கள் (UV rays) காரணமாக ஏற்பட்ட சேதங்களையும் முழுமையாக சரிசெய்ய முடியாது.
ஆய்வாளர் டி மாகல்ஹேஸ் கூறுவதாவது, “டைனோசர்களின் காலத்தில் பாலூட்டிகள் சுமார் 100 மில்லியன் ஆண்டுகள் உயிர்வாழ்வதற்காக போராடின. அந்த நீண்ட பரிணாம அழுத்தம், நீண்ட ஆயுளுக்கான இயற்கை அமைப்புகளை தளர்த்தியது” என்பதாகும்.
இந்த ஆய்வு இன்னும் விவாதத்திற்குட்பட்டதாக இருந்தாலும், மனிதர்களின் முதுமை மற்றும் ஆயுள் குறித்து புதிய கோணத்தில் சிந்திக்க வைக்கிறது. “நாம் இன்று வாழும் வாழ்க்கை முறை மட்டும் அல்ல, கோடிக்கணக்கான ஆண்டுகளுக்கு முன் நடந்த பரிணாம மாற்றங்களும் நமது ஆயுளை நிர்ணயிக்கின்றன” என்பதே இந்த ஆய்வின் மைய கருத்தாகும்.
Read more: Heat Stroke: ஹீட் ஸ்ட்ரோக் வந்தால் முதலில் என்ன செய்ய வேண்டும்..? அறிகுறிகள் எப்படி இருக்கும்..?
