இன்றைய சமூகத்தில், வயது வரம்பின்றி பலரும் மாரடைப்பால் பாதிக்கப்படுகின்றனர். குறிப்பாக 20 முதல் 40 வயதுக்குட்பட்ட இளைஞர்களிடையே மாரடைப்பு ஏற்படும் விகிதம் கவலைக்குரிய வகையில் அதிகரித்துள்ளது. “நான் இன்னும் இளமையாகத்தான் இருக்கிறேன், அதனால் ஒன்றும் ஆகாது.. எனக்கு மாரடைப்பு வராது” என்று நினைத்து பலர் ஆரம்பக்கட்ட அறிகுறிகளைப் புறக்கணிக்கின்றனர். இத்தகைய அலட்சியப் போக்கு மிகவும் ஆபத்தானது என்று நிபுணர்கள் எச்சரிக்கிறார். இளைஞர்களிடையே இதய நோய்கள் அதிகரிப்பதற்கான முக்கிய காரணங்களை இப்போது பார்க்கலாம்..
தீய பழக்கவழக்கங்கள் – போதைப் பழக்கங்கள் : இன்றைய இளைஞர்களிடையே புகைப்பிடித்தல் மற்றும் புகையிலை பயன்பாடு ஆகியவை பெருமளவு அதிகரித்துள்ளன; இவை இதயத்தின் முதன்மை எதிரிகளாக மாறிவிட்டன. இவை ரத்த நாளங்களில் அடைப்பை ஏற்படுத்தி, திடீர் மாரடைப்புக்கு வழிவகுக்கின்றன.
மன அழுத்தம் – தூக்கமின்மை: வேலை மற்றும் தனிப்பட்ட வாழ்க்கைச் சூழலால் இளைஞர்கள் கடுமையான மன அழுத்தத்தை எதிர்கொள்கின்றனர். மேலும், இரவு நேரங்களில் தாமதமாகத் தூங்குவதும், போதுமான அளவு தூங்காததும் உடலில் ஹார்மோன் சமநிலையைப் பாதித்து, இதயத்தின் செயல்பாட்டை மந்தமாக்குகிறது.
ஒரே இடத்தில் அமர்ந்து செய்யும் வேலைகள்: தகவல் தொழில்நுட்பம் (IT) மற்றும் அலுவலகப் பணிகளில் நீண்ட நேரம் ஒரே இடத்தில் அமர்ந்து பணியாற்றும் வாழ்க்கை முறை இளைஞர்களிடையே பரவலாகிவிட்டது. உடல் உழைப்பு மற்றும் உடற்பயிற்சி இல்லாததால், இதயத்திற்குச் செல்லும் இரத்த நாளங்கள் மெல்ல மெல்ல பலவீனமடைந்து சேதமடைகின்றன.
துரித உணவு (Fast food) கலாச்சாரம் : பாக்கெட்டுகளில் அடைக்கப்பட்ட துரித உணவுகள் மற்றும் எண்ணெயில் பொரித்த உணவுகளை அதிகமாக உட்கொள்வது உடல் பருமன் மற்றும் உடலில் கெட்ட கொழுப்பின் அளவை அதிகரிக்கச் செய்கிறது. இது இளம் வயதிலேயே இதயத்திற்கு ரத்தம் கொண்டு செல்லும் தமனிகளில் அடைப்பை ஏற்படுத்துகிறது.
உயர் இரத்த அழுத்தம், நீரிழிவு : மாறிவரும் வாழ்க்கை முறையால், 30 வயதுக்கு முன்பே பலர் நீரிழிவு நோய் மற்றும் உயர் இரத்த அழுத்தத்தால் பாதிக்கப்படுகின்றனர். இவை உடலில் ‘அமைதியான கொலையாளிகளாக’ (silent killers) செயல்பட்டு, மாரடைப்பு ஏற்படும் அபாயத்தை இருமடங்காக்குகின்றன.
மரபியல் காரணங்கள்: குடும்பத்தில் உள்ள பெற்றோர் அல்லது உடன்பிறந்தவர்களுக்கு இளம் வயதிலேயே இதய நோய் இருந்திருந்தால், குடும்பத்தின் மற்ற உறுப்பினர்களுக்கும் மாரடைப்பு ஏற்படும் அபாயம் அதிகம். அத்தகையவர்கள் கூடுதல் விழிப்புடன் இருக்க வேண்டும்
நிபுணர்களின் ஆலோசனை : உங்கள் வாழ்க்கை முறையை மாற்றிக்கொள்ளுங்கள். தினமும் குறைந்தது 30 நிமிடங்களாவது உடற்பயிற்சி செய்வது, சரியான நேரத்தில் சத்தான உணவை உட்கொள்வது மற்றும் மன அழுத்தத்தைக் குறைப்பது ஆகியவை மிகவும் அவசியம். நெஞ்சில் ஏதேனும் புதிய அசௌகரியம் அல்லது மூச்சுத்திணறல் ஏற்பட்டால், உயிரைக் காக்க உடனடியாக ஒரு அடிப்படை இதயப் பரிசோதனையைச் செய்துகொள்வது சிறந்தது என்று இதய நோய் நிபுணர்கள் அறிவுறுத்துகின்றனர்.
Read More : நீரிழிவு நோயாளிகளே எச்சரிக்கை.. சர்க்கரை அளவு கட்டுப்பாட்டில் இல்லையென்றால், இந்த மோசமான நோய்கள் ஏற்படும்..!
