டேட்டிங் செயலிகள் மற்றும் சமூக வலைதளங்கள் மூலம் அறிமுகமாகும் நபர்களை குறிவைத்து, அவர்களை மிரட்டி பெருமளவில் பணம் பறித்ததாக கூறப்படும் பெண் மற்றும் அவரது கூட்டாளிகள் தொடர்பான புகார் உத்தரப்பிரதேசத்தில் பரபரப்பை ஏற்படுத்தியுள்ளது. பிரயாக்ராஜ் பகுதியில் செயல்பட்டதாக கூறப்படும் இந்தக் குழு, பல ஆண்களை தங்கள் வலையில் சிக்க வைத்து லட்சக்கணக்கில் பணம் பறித்ததாக குற்றச்சாட்டு எழுந்துள்ளது.
இந்த விவகாரம் தொடர்பாக உயர்நீதிமன்ற வழக்கறிஞர் ஒருவர் காவல்துறையில் புகார் அளித்துள்ளார். அதில், பல்லவி சிங் ராஜ்புத் என்ற பெண், தனது கூட்டாளிகளுடன் இணைந்து டிண்டர் உள்ளிட்ட டேட்டிங் செயலிகள் மற்றும் சமூக வலைதளங்களை பயன்படுத்தி ஆண்களுடன் பழகியதாக கூறப்பட்டுள்ளது. முதலில் நட்பாகப் பேசி நெருக்கத்தை ஏற்படுத்திய பின்னர், அந்த நபர்களை ரகசியமாக புகைப்படம் மற்றும் வீடியோ எடுத்ததாகவும் புகாரில் தெரிவிக்கப்பட்டுள்ளது.
பின்னர் அவற்றை பயன்படுத்தி பணம் கேட்டு மிரட்டியதாகவும், பணம் கொடுக்க மறுத்தால் பாலியல் வன்கொடுமை மற்றும் கொலை முயற்சி உள்ளிட்ட கடுமையான குற்றச்சாட்டுகளில் பொய் வழக்கு தொடர்ந்துவிடுவதாக மிரட்டியதாகவும் கூறப்படுகிறது. இந்த முறையில் பலரிடம் இருந்து மொத்தமாக ரூ.6 கோடிக்கும் அதிகமான பணம் பறிக்கப்பட்டிருக்கலாம் என தகவல் வெளியாகியுள்ளது. இந்த மோசடி தொடர்பான வழக்குகளில் ஏற்கனவே 5 பேர் சிறைக்கு சென்றுள்ளதாகவும் கூறப்படுகிறது.
மேலும், சமூக வலைதளங்களில் இந்தக் குழுவுடன் தொடர்புடையதாக கூறப்படும் சில புகைப்படங்கள் பரவி வருகின்றன. அதில் பணக்கட்டுகளுடன் இருக்கும் காட்சிகளும், பெண் ஒருவர் ஆயுதம் வைத்திருப்பது போன்ற புகைப்படமும் இடம்பெற்றுள்ளதாக தகவல்கள் தெரிவிக்கின்றன. இந்தக் குழுவினர் ‘ஸ்வீட்டி திவாரி’ உள்ளிட்ட பல்வேறு பெயர்களில் போலியான சமூக வலைதள கணக்குகளை உருவாக்கி, அதன் மூலம் நபர்களை தொடர்புகொண்டதாக காவல்துறையினரிடம் புகார் அளிக்கப்பட்டுள்ளது.
இந்தச் செயல்பாட்டில் மேலும் இரண்டு பெண்கள் மற்றும் இரண்டு ஆண்கள் உடந்தையாக இருந்ததாகவும் சந்தேகிக்கப்படுகிறது. வழக்கறிஞர் அளித்த புகாரின் அடிப்படையில், இந்த மோசடி தொடர்பான குற்றச்சாட்டுகளை காவல்துறையினர் தீவிரமாக விசாரித்து வருகின்றனர். விசாரணை முடிவில் இந்த நெட்வொர்க்கில் இன்னும் எத்தனை பேர் சிக்கியுள்ளனர், எவ்வளவு பணம் பறிக்கப்பட்டுள்ளது என்பது குறித்த கூடுதல் தகவல்கள் வெளியாகும் என எதிர்பார்க்கப்படுகிறது.
