நடிகை அனுபமா பரமேஸ்வரன் தனது கடந்தகால உறவில் இரண்டு ஆண்டுகளாக உடல் மற்றும் மனரீதியான துன்பங்களை அனுபவித்ததாக முதன்முறையாக வெளிப்படையாக தெரிவித்துள்ளார். சமீபத்தில் அவர் வெளியிட்ட மறைமுகமான சமூக வலைதளப் பதிவு, நடிகர் துருவ் விக்ரமுடனான காதல் முறிவு குறித்த பேச்சை ஏற்படுத்தியிருந்த நிலையில், தற்போது தனது அனுபவம் குறித்து அவர் விரிவாகப் பேசியுள்ளார்.
தனது முன்னாள் துணையின் பெயரை குறிப்பிடாமல் பேசிய அனுபமா, அந்த உறவு தனது உடல்நலம் மற்றும் மனநிலையில் மிகப்பெரிய தாக்கத்தை ஏற்படுத்தியதாக தெரிவித்துள்ளார். “ஒரு பதிவின் பின்னால் இரண்டு ஆண்டுகளின் வலி, உடல் மற்றும் மனரீதியான அழிவு இருந்தது” என்று அவர் கூறியுள்ளார்.
சமூக வலைதளத்தில் “முடிவில்லாத பாதையை விட்டுவிட்டால்தான் நிம்மதியை கண்டடைய முடியும்” என்ற கருத்துடன் அவர் பதிவிட்டிருந்தார். அந்தப் பதிவை திடீரென வெளியிடவில்லை என்றும், உண்மையாகவே அதிலிருந்து மீண்டு, மனதளவில் தயாரான பிறகே அதை பகிர்ந்ததாகவும் அனுபமா தெரிவித்துள்ளார்.
தனது முன்னாள் துணையின் நடத்தையை விளக்குவதற்காக தமிழ் திரைப்பட கதாபாத்திரங்களையும் அவர் உதாரணமாக குறிப்பிட்டுள்ளார். ஒருநாள் அதிக அன்பையும் அக்கறையையும் வெளிப்படுத்தும் நிலையில் இருப்பவர், மறுநாள் மிகவும் கடுமையாக நடந்துகொள்வார் என்றும், பின்னர் தனது தவறுகளுக்கு மன்னிப்பு கேட்டு மீண்டும் அன்பை வெளிப்படுத்துவார் என்றும் அவர் கூறியுள்ளார். இந்த மாறுபட்ட நடத்தை தொடர்ச்சியாக நீடித்ததாகவும் அனுபமா தெரிவித்துள்ளார்.
“நார்சிசிஸ்டிக் அப்யூஸ்” குறித்து பலருக்கும் போதிய புரிதல் இல்லை என்றும் அவர் குறிப்பிட்டுள்ளார். அந்த இரண்டு ஆண்டுகளில் தான் வளர்வதற்கு பதிலாக தன்னையே இழந்துவிட்டதாகவும், கணிசமான அளவில் உடல் எடை குறைந்ததாகவும், எந்த நேரத்தில் என்ன நடக்கும் என்ற அச்சத்திலேயே வாழ்ந்ததாகவும் அவர் தெரிவித்துள்ளார்.
மேலும், நார்சிசிஸ்டிக் அப்யூஸ் குறித்து சமூக வலைதளங்களில் வெளியாகும் கருத்துகளை நான்கு வகையாகப் பார்ப்பதாக அனுபமா கூறியுள்ளார். இதுபோன்ற அனுபவங்களை ஏற்கெனவே சந்தித்தவர்கள் ஒரு தரப்பினர் என்றும், இந்த பிரச்சினை குறித்து அறிமுகம் மட்டுமே உள்ளவர்கள் மற்றொரு தரப்பினர் என்றும் அவர் தெரிவித்துள்ளார். மேலும், முழுமையாக புரிந்துகொள்ளாமல் பாலின அடிப்படையில் கருத்து தெரிவித்து எதிர்மறையான விமர்சனங்களை முன்வைப்பவர்களும் இருப்பதாக கூறியுள்ளார்.
இதில், இதுபோன்ற துன்புறுத்தலை அனுபவித்துக் கொண்டிருந்தும், அது என்ன என்பதை இன்னும் அடையாளம் காணாதவர்களே தாம் அதிகம் கவலைப்படும் பிரிவினர் என்றும் அனுபமா தெரிவித்துள்ளார். அவர்கள் தங்களது நிலையை புரிந்துகொள்வது மிகவும் முக்கியம் என்றும் அவர் குறிப்பிட்டுள்ளார்.
துருவ் விக்ரமுடன் காதல் முறிவு?
அனுபமா பரமேஸ்வரனும் நடிகர் துருவ் விக்ரமும் கடந்த 2025-ம் ஆண்டு வெளியான ‘பைசன் காளமாடன்’ திரைப்படத்தில் இணைந்து நடித்தனர். மாரி செல்வராஜ் இயக்கிய இந்தப் படத்தின் படப்பிடிப்பு மற்றும் விளம்பர நிகழ்ச்சிகளின்போது இருவரும் நெருக்கமாக இருந்ததாக தகவல்கள் வெளியாகின.
இதையடுத்து, இருவரும் காதலிப்பதாக சமூக வலைதளங்களில் செய்திகள் பரவின. இருவரும் முத்தமிடுவது போன்றதாகக் கூறப்பட்ட சரிபார்க்கப்படாத புகைப்படம் ஒன்று வைரலானதைத் தொடர்ந்து இந்தப் பேச்சு மேலும் அதிகரித்தது. எனினும், அனுபமா அல்லது துருவ் விக்ரம் இருவருமே தங்களது உறவு குறித்து இதுவரை அதிகாரப்பூர்வமாக உறுதிப்படுத்தவோ, மறுக்கவோ இல்லை.
மலையாளத்தில் வெளியான ‘பிரேமம்’ திரைப்படம் மூலம் 2015-ம் ஆண்டு திரையுலகில் அறிமுகமான அனுபமா, தொடர்ந்து தமிழ், தெலுங்கு, கன்னடம் உள்ளிட்ட பல்வேறு மொழிப் படங்களில் நடித்துள்ளார். ‘கொடி’, ‘கார்த்திகேயா 2’, ‘டில்லு ஸ்கொயர்’ உள்ளிட்ட படங்கள் அவருக்கு கவனம் பெற்றுத் தந்தன. சமீபத்தில் ‘டிராகன்’, ‘பரதா’ உள்ளிட்ட படங்களிலும் நடித்துள்ள அவர், மேலும் சில புதிய படங்களில் நடித்து வருகிறார்.
