ஆண்களுக்கும் இலவச பேருந்து பயணத் திட்டமா? அமைச்சர் தமிழன் பார்த்திபன் சொன்ன பதில்!

தமிழகத்தில் பெண்களுக்கான இலவச பேருந்து பயணத் திட்டம் தொடர்ந்து பேசுபொருளாக இருந்து வரும் நிலையில், ஆண்களுக்கும் இதேபோன்ற இலவச பயணத் திட்டம் கொண்டுவரப்படுமா என்ற கேள்விக்கு அமைச்சர் தமிழன் பார்த்திபன் அளித்த நகைச்சுவையான பதில் தற்போது சமூக வலைதளங்களில் கவனம் பெற்றுள்ளது.

நாமக்கல்லில் நடைபெற்ற நிகழ்ச்சி ஒன்றில் அமைச்சர் தமிழன் பார்த்திபன் பங்கேற்றிருந்தார். அப்போது அவரிடம் பல்வேறு கேள்விகள் முன்வைக்கப்பட்டன. அதில், பெண்களுக்கு அரசு நகரப் பேருந்துகளில் இலவசமாக பயணம் செய்யும் வசதி வழங்கப்பட்டு வரும் நிலையில், ஆண்களுக்கும் இலவச பேருந்து பயணத் திட்டம் அறிவிக்கப்படுமா என ஒருவர் கேள்வி எழுப்பினார்.

இதற்கு நேரடியாக அரசுத் திட்டம் குறித்து பதிலளிப்பதற்குப் பதிலாக, அமைச்சர் தமிழன் பார்த்திபன் நகைச்சுவையாக பதில் அளித்தார். “எனது தங்கையை உங்களுக்கு திருமணம் செய்து வைத்துள்ளோம். அப்போது பேருந்துக் கட்டணத்தை எனது மச்சானாகிய உங்களிடம் கேட்டு தொந்தரவு செய்யக்கூடாது என்பதற்காகத்தான் பெண்களுக்கு இலவசப் பயணத் திட்டம்” என்று சிரித்துக்கொண்டே அவர் பதிலளித்தார்.

அமைச்சரின் இந்தப் பதிலை கேட்டு அங்கிருந்தவர்கள் சிரித்தனர். நிகழ்ச்சியில் நடைபெற்ற இந்த உரையாடல் தொடர்பான வீடியோ தற்போது சமூக வலைதளங்களில் வேகமாகப் பகிரப்பட்டு வருகிறது. தமிழகத்தில் பெண்களின் வேலைவாய்ப்பு மற்றும் பொருளாதார பங்களிப்பை அதிகரிக்கும் நோக்கில், அரசு நகரப் பேருந்துகளில் பெண்கள் இலவசமாக பயணம் செய்யும் திட்டம் செயல்படுத்தப்பட்டு வருகிறது. இதன் மூலம் தினசரி வேலை, கல்வி உள்ளிட்ட தேவைகளுக்காக பேருந்துகளில் பயணிக்கும் பெண்களுக்கு பயணச் செலவு குறைகிறது.

மேலும், இந்தத் திட்டம் பெண்களின் அன்றாட செலவினத்தில் முக்கியமான சேமிப்பை ஏற்படுத்துவதாகவும் அரசு தரப்பில் தெரிவிக்கப்பட்டுள்ளது. இந்நிலையில், ஆண்களுக்கும் இதேபோன்ற இலவசப் பேருந்து பயணம் வழங்கப்படுமா என்ற கேள்விக்கு அமைச்சர் அளித்த இந்த வித்தியாசமான பதில் தற்போது பேசுபொருளாகியுள்ளது.

Also Read: “அம்மா.. எனக்கு பயமா இருக்கு!” கதறிய 3 வயது குழந்தை.. நள்ளிரவில் தனியாக விட்டுச் சென்ற பெற்றோர் செய்த காரியம்!