ஆயுர்வேத மருத்துவ முறையில் உடலையும் மனதையும் ஆரோக்கியமாகப் பேண ‘அபியங்கா’ எனப்படும் தினசரி எண்ணெய் மசாஜ் மிக முக்கிய வாழ்வியல் முறையாகக் கருதப்படுகிறது. உடலின் தன்மைக்கேற்ப சரியான இயற்கை எண்ணெயைத் தேர்ந்தெடுத்துத் தடவி வருவதன் மூலம், சரும வறட்சி நீங்கி பளபளப்பு கூடுவதோடு, தசை இறுக்கம் தளர்ந்து மன அழுத்தம் குறையும் என ஆயுர்வேதம் கூறுகிறது.
நவீன அவசர காலகட்டத்தில் தினமும் உடல் முழுவதும் எண்ணெய் தேய்த்துக் குளிப்பது பலருக்கும் சாத்தியப்படுவதில்லை. இத்தகைய சூழலில், உடல் முழுமைக்கும் செய்ய முடியாவிட்டாலும் தலை, பாதங்கள் மற்றும் காதுகள் ஆகிய மூன்று முக்கியப் பாகங்களுக்கு மட்டும் எண்ணெய் தடவி வந்தால், முழு உடல் மசாஜ் செய்த பலனை ஓரளவுக்குப் பெற முடியும்.
உச்சந்தலை :
உடலின் பிரதானப் பகுதியாகக் கருதப்படும் உச்சந்தலையில் எண்ணெய் தடவுவது முடி வேர்களுக்கு ஊட்டச்சத்தை அளிக்கும். தலையில் மென்மையாக மசாஜ் செய்வது நரம்புகளைத் தளர்த்தி மன அமைதியைத் தருவதுடன், இரவில் நல்ல ஆழ்ந்த தூக்கத்திற்கும் வழிவகுக்கும்.
பாதங்கள் :
நாள் முழுவதும் உடலின் மொத்த எடையையும் தாங்கி நிற்கும் பாதங்கள் எளிதில் சோர்வும் வறட்சியும் அடைகின்றன. எனவே, இரவு தூங்கச் செல்வதற்கு முன் பாதங்களில் சிறிது எள் எண்ணெய் அல்லது சுத்தமான நெய் தடவி மெதுவாக மசாஜ் செய்வது ஒட்டுமொத்த உடலையும் ரிலாக்ஸ் செய்யும். இது உடலைத் தளர்த்தி தூக்கத்தின் தரத்தை மேம்படுத்துகிறது என்பதை நவீன அறிவியல் ஆய்வுகளும் (Journal of Ayurveda and Integrative Medicine) உறுதிப்படுத்தியுள்ளன.
காதுகள் :
காதுகளின் வெளிப்புறப் பகுதிகளில் லேசாக எண்ணெய் தடவுவது சரும வறட்சியைத் தடுக்கும்.
முக்கிய எச்சரிக்கை : காது வலி, செவிப்பறை பாதிப்பு அல்லது நோய்த்தொற்று உள்ளவர்கள், மருத்துவரின் பரிந்துரையின்றி ஒருபோதும் காதுக்குள் நேரடியாக எண்ணெய் விடக்கூடாது.
அறிவியல் பூர்வ நன்மைகள்:
Sage Journals இதழில் வெளியான ஆய்வின்படி, ஒரு மணி நேர அபியங்கா மசாஜ் செய்து கொண்டவர்களுக்கு மன அழுத்தம் கணிசமாகக் குறைந்ததும், அவர்களின் இதயத் துடிப்பு மற்றும் ரத்த அழுத்த அளவுகளில் ஆரோக்கியமான மாற்றங்கள் ஏற்பட்டதும் கண்டறியப்பட்டுள்ளது.
பயன்படுத்த வேண்டிய எண்ணெய்கள்:
எள் எண்ணெய் (நல்லெண்ணெய்): ஆயுர்வேதத்தில் தினசரி மசாஜுக்கு மிகவும் பரிந்துரைக்கப்படும் முதன்மை எண்ணெய்.
தேங்காய் எண்ணெய்: அதிக உடல் சூடு கொண்டவர்களுக்கும், வெப்ப மண்டலப் பகுதிகளில் வசிப்பவர்களுக்கும் ஏற்றது.
மூலிகை எண்ணெய்கள்: தனிநபரின் வாத, பித்த, கப நிலைகளுக்கு ஏற்ப மருத்துவர் ஆலோசனையுடன் பயன்படுத்தலாம்.
எப்போது எண்ணெய் தடவலாம்?
குளிப்பதற்கு முன்போ அல்லது இரவு தூங்கச் செல்வதற்கு முன்போ செய்யலாம். குறிப்பாகப் பாத மசாஜை இரவில் செய்வது சிறந்தது.
எண்ணெய் தேய்த்தவுடன் குளிக்காமல், சருமம் எண்ணெயை உறிஞ்சும் வகையில் குறைந்தது 20 முதல் 30 நிமிடங்கள் கழித்து வெதுவெதுப்பான நீரில் குளிக்க வேண்டும்.
குழந்தைகள், முதியவர்களும் தாராளமாகச் செய்யலாம். ஆனால், அவர்களின் வயது மற்றும் உடல்நிலைக்குப் பொருத்தமான எண்ணெயைப் பயன்படுத்த வேண்டும்.
தீவிர தோல் வியாதிகள் அல்லது நாள்பட்ட பாதிப்புகள் உள்ளவர்கள் ஆயுர்வேத மருத்துவரின் முறையான ஆலோசனையைப் பெற்ற பிறகே மசாஜ் முறைகளை கடைப்பிடிக்க வேண்டும்.
