உடல் எடையை குறைக்க வேண்டும் என்றவுடன் பலரும் செய்யும் முதல் தவறு உணவைத் தவிர்ப்பது அல்லது பட்டினி கிடப்பதுதான். ஆனால், உடலுக்குத் தேவையான உணவை உட்கொள்ளாமல் பட்டினி கிடப்பதால் உடல் எடை குறைவதற்குப் பதிலாக, தசை இழப்பு, ஊட்டச்சத்துக் குறைபாடு மற்றும் அதீத சோர்வு மட்டுமே ஏற்படும். பசியை அடக்காமல் ஆரோக்கியமான முறையில் எடையைக் குறைப்பதற்கான மிகச்சிறந்த வழிதான் ‘கலோரி மேனேஜ்மென்ட்’ (Calorie Management). அதாவது, நாம் அன்றாடம் சாப்பிடும் உணவிலிருந்து கிடைக்கும் கலோரி அளவை விட, உடல் இயக்கம் மூலம் செலவழிக்கும் கலோரி அளவைச் சற்று அதிகமாக வைத்திருப்பதே இதன் அடிப்படை விதியாகும்.
கலோரி மேனேஜ்மென்ட்டில் மிக முக்கியமானது ‘கலோரி டெபிசிட்’ (Calorie Deficit) முறை. ஒரு நாளில் நம் உடலுக்குத் தேவைப்படும் கலோரி அளவை விட 300 முதல் 500 கலோரிகள் வரை குறைவாக எடுத்துக்கொள்ள வேண்டும். இதற்கு உணவின் அளவைக் குறைக்கத் தேவையில்லை; நாம் தேர்ந்தெடுக்கும் உணவின் வகையை மாற்றினாலே போதுமானது. உதாரணமாக, ஒரு சிறிய சமோசாவில் கிடைக்கும் அதே அளவு கலோரிகள் ஒரு பெரிய கிண்ணம் நிறைய காய்கறி சாலட்டிலும் கிடைக்கும். சமோசா சாப்பிட்டால் சில நிமிடங்களிலேயே மீண்டும் பசி எடுக்கும், ஆனால் நார்ச்சத்து மிகுந்த சாலட் நீண்ட நேரத்திற்கு வயிற்றை நிறைவாக வைத்திருக்கும்.
தினசரி உணவில் மைதா, வெள்ளைச் சர்க்கரை, எண்ணெயில் பொரித்த உணவுகள் மற்றும் குளிர்பானங்கள் போன்ற குறைந்த சத்துக்களும் அதிக கலோரிகளும் கொண்ட உணவுகளைத் தவிர்ப்பது அவசியம். அதற்குப் பதிலாக முட்டை, பயறு வகைகள், சுண்டல் போன்ற புரதச்சத்து நிறைந்த உணவுகளையும், காய்கறிகள் மற்றும் பழங்கள் போன்ற நார்ச்சத்து நிறைந்த உணவுகளையும் தட்டில் அதிக அளவில் சேர்த்துக்கொள்ள வேண்டும். புரதமும் நார்ச்சத்தும் செரிமானத்தை மெதுவாக்கி, தேவையின்றி அடிக்கடி பசி எடுப்பதைத் தடுக்கும்.
அத்துடன் உணவுக் கட்டுப்பாட்டுடன் தினமும் போதுமான அளவு தண்ணீர் குடிப்பது உடலின் வளர்சிதை மாற்றத்தை சீராக வைத்திருக்க உதவும். நாள் ஒன்றுக்குக் குறைந்தது 30 முதல் 40 நிமிடங்கள் நடைப்பயிற்சி அல்லது உடற்பயிற்சி மேற்கொள்வதும், 7 முதல் 8 மணி நேர ஆழ்ந்த தூக்கமும் மிக அவசியம். உணவை ரசித்து, மென்று சாப்பிடும் எளிய பழக்கவழக்கமும், சரியான கலோரி சமநிலையும் எந்தவித பக்கவிளைவுகளும் இன்றி உடல் எடையைப் படிப்படியாகவும் நிலையான முறையிலும் குறைக்க உதவும்.
Read More : போதைப்பொருள் பழக்கத்தை தடுக்க.. இளைஞர்களுக்கு பிரதமர் மோடி சொன்ன அந்த மெசேஜ்..!!
