இந்திய அணியின் முதன்மைத் தேர்வாளர் அஜித் அகர்கருக்கும் பிசிசிஐ-க்கும் இடையே நிலவி வந்த கருத்து வேறுபாடுகள் குறித்த புதிய விவரங்கள் வெளியாகியுள்ளன. 2023-ஆம் ஆண்டு அயர்லாந்திற்கு எதிரான T20 தொடரில் ஜஸ்பிரித் பும்ராவிற்குப் பதிலாக ருதுராஜ் கெய்க்வாட்டை கேப்டனாக்க அகர்கர் விரும்பியதாக ‘தி டெலிகிராப்’ இதழ் செய்தி வெளியிட்டுள்ளது.
2023 ஆசிய விளையாட்டுப் போட்டிக்கான இந்திய அணிக்கு ருதுராஜ் கெய்க்வாட் ஏற்கனவே கேப்டனாக நியமிக்கப்பட்டிருந்தார். மற்றொரு சர்வதேசத் தொடரில் கேப்டனாகச் செயல்படுவது அவரது தலைமை பண்பை மேலும் வளர்க்க உதவும் என அகர்கர் கருதினார். மேலும் அப்போது, முதுகுக்காயத்திலிருந்து மீண்டு 10 மாதங்களுக்குப் பிறகு பும்ரா சர்வதேச போட்டிக்குத் திரும்பிக் கொண்டிருந்தார். அதனால் அவருக்கு உடனடியாக கேப்டன் பொறுப்பு வழங்குவது பணிச்சுமையை அதிகரிக்கும் என்பது அகர்கரின் கருத்தாக இருந்தது.
ஆனால், பிசிசிஐ நிர்வாகம் அகர்கரின் இந்த யோசனையை ஏற்கவில்லை. காயத்திலிருந்து மீண்டு வரும் பும்ரா, அணிக்குத் தலைமை தாங்க விருப்பம் தெரிவித்ததால் அவரை கேப்டனாக்கவே பிசிசிஐ முடிவு செய்தது. இதன் தொடர்ச்சியாக, அயர்லாந்து தொடருக்கான இந்திய அணிக்கு பும்ரா கேப்டனாகவும், ருதுராஜ் கெய்க்வாட் துணை கேப்டனாகவும் அறிவிக்கப்பட்டனர்.
பும்ரா தலைமையிலான இந்திய அணி அயர்லாந்துக்கு எதிரான T20 தொடரை 2-0 என்ற கணக்கில் கைப்பற்றியது. பும்ரா தொடர் நாயகன் விருதையும் வென்றார். பின்னர் ருதுராஜ் கெய்க்வாட் தலைமையிலான இந்திய அணி 2023 ஆசிய விளையாட்டுப் போட்டியில் வரலாற்று சிறப்புமிக்க தங்கம் வென்று சாதனை படைத்தது.
அகர்கருக்கும் பிசிசிஐ-க்கும் இடையே தேர்வு முடிவுகளில் இருந்த கருத்து வேறுபாடுகள் இதன் மூலம் வெளிச்சத்திற்கு வந்துள்ளன. இதனிடையே, பிசிசிஐ முதன்மைத் தேர்வாளராக உள்ள அஜித் அகர்கரின் பதவிக்காலம் அக்டோபருடன் முடிவடைகிறது. தனது ஒப்பந்தத்தை மேலும் நீட்டிக்க அகர்கர் விரும்பாததால், புதிய முதன்மைத் தேர்வாளரைத் தேடும் பணியை பிசிசிஐ விரைவில் தொடங்கவுள்ளது.
