முருகப்பெருமானின் தீவிர பக்தரான அருணகிரிநாத சுவாமிகள் அருளிச்செய்த கந்தர் அநுபூதி பாடல்கள், மனித வாழ்க்கையில் எதிர்கொள்ளும் எத்தகைய துன்ப துயரங்களையும் அடியோடு தகர்க்கும் அற்புத ஆன்மீக பொக்கிஷமாக போற்றப்படுகிறது. குறிப்பாக, குடும்பத்தை வாட்டி வதைக்கும் கடுமையான நிதி நெருக்கடிகள், தீராத கடன்கள் மற்றும் வறுமையின் கோரப்பிடியிலிருந்து விடுபடுவதற்கு கந்தர் அநுபூதியின் 19-வது பாடல் ஒரு கண்கண்ட நிவாரணமாக திகழ்கிறது.
“வடிவும் தனமும் மனமும் குணமும்,
குடியும் குலமும் குடிபோ கியவா,
அடி அந்தம் இலா அயில் வேல் அரசே,
மிடி என்று ஒரு பாவி வெளிப்படினே.”
இப்பாடலில் வறுமையின் கொடூர தன்மையை அருணகிரிநாதர் மிக ஆழமாக பதிவு செய்துள்ளார். இங்கு வறுமை என்பது வெறும் பணமில்லாத நிலையை மட்டும் குறிக்கவில்லை; அது ஒரு மனிதனின் முக வசீகரம், செல்வம், மன உறுதி, நற்குணங்கள், குடும்பத்தின் நற்பெயர் மற்றும் சமூக அந்தஸ்து என அனைத்தையும் வேரோடு அழித்து விடக்கூடிய பேரழிவு சக்தி என்பதை தனது சொந்த வாழ்க்கை அனுபவத்தின் மூலம் விளக்குகிறார். அதனால்தான், வறுமையை “மிடி என்ற ஒரு பாவி” என்று உருவகப்படுத்தி, அது வெளிப்பட்டால் ஒரு மனிதனை எவ்வாறு பலவீனப்படுத்தி சமூகத்தில் தலைகுனிய வைக்கிறது என்பதை வேதனையுடன் சுட்டிக்காட்டுகிறார்.
உயர்ந்த குடியில் பிறந்து நற்குணங்களுடன் வாழ்ந்த அருணகிரிநாதர், ஆரம்ப காலத்தில் தவறான சிற்றின்ப ஆசைகளிலும் வழிகளிலும் திளைத்து, இறுதியில் வறுமையின் உச்சத்தை தொட்டார். எனினும், தனது கடந்த கால தவறுகளை மறைக்காமல், அந்த கசப்பான அனுபவங்களையே ஆன்மீக பாடங்களாக மாற்றி உலகிற்கு வழிகாட்டினார். எத்தகைய வறுமை சூழ்ந்தாலும் முதலும் முடிவும் இல்லாத வேலவனின் திருவருளை உறுதியாக பற்றிக்கொள்ள வேண்டும் என்பதை உணர்த்தும் இப்பாடலை தினமும் பாராயணம் செய்து வந்தால், தொழில் மற்றும் குடும்பத்தில் நிலவும் நிதி தடைகள் நீங்கி, வாழ்வில் வளம் பெருகும் என்பது அசைக்க முடியாத நம்பிக்கையாகும்.
Read More : வடகிழக்கு பருவமழை..!! முதல்வர் விஜய் அவசர ஆலோசனை..!! மாவட்ட ஆட்சியர்கள், அதிகாரிகளுக்கு அதிரடி உத்தரவு..!!
