பீகார் மாநிலம் ஜமுய் பகுதியில் சிறுமிக்கு பாலியல் தொல்லை அளித்த வழக்கில் தேடப்பட்டு வந்த முதன்மை குற்றவாளி நந்தன் யாதவை, காவல்துறையினர் என்கவுண்டர் செய்து பிடித்தனர். இச்சம்பவத்தில் காயமடைந்த அவர், தற்போது மருத்துவமனையில் அனுமதிக்கப்பட்டு சிகிச்சை பெற்று வருகிறார்.
இச்சம்பவம் கடந்த செப்டம்பர் 19 அன்று மாலை நடைபெற்றது. ஒரே பயிற்சி வகுப்பில் படிக்கும் நண்பர்களான சிறுவனும் சிறுமியும் வீட்டிற்குத் திரும்பும்போது, புகைப்படம் எடுப்பதற்காக வழியில் ஒரு இடத்தில் நின்றுள்ளனர். அப்போது அங்கு வந்த ஒரு கும்பல் அவர்களை வழிமறித்து, சிறுவனுக்கு அடி உதை கொடுத்ததோடு, சிறுமியிடம் மிக மோசமாக நடந்து கொண்டு பாலியல் தொல்லை அளித்துள்ளது.
பாதிக்கப்பட்ட சிறுவனும் சிறுமியும் இதுகுறித்து உடனடியாக காவல்துறையிடம் புகார் அளிக்கவில்லை. ஆனால், இந்த கொடூர சம்பவத்தை வீடியோ எடுத்த அக்கும்பல் அதை சமூக வலைதளங்களில் பதிவிட்டது. அந்த வீடியோ இணையத்தில் வைரலாகி, பொதுமக்களிடையேயும் அரசியல் தலைவர்களிடையேயும் பெரும் கொந்தளிப்பையும் கண்டனங்களையும் ஏற்படுத்திய பின்னரே இச்சம்பவம் வெளிச்சத்திற்கு வந்தது.
வீடியோ வைரலானதைத் தொடர்ந்து, அதில் தெரிந்த ஒரு வாகனத்தின் பதிவு எண்ணை வைத்து காவல்துறையினர் விசாரணையை தொடங்கினர். ஜமுய் மாவட்ட காவல்துறை உடனடியாக வழக்கைப் பதிவு செய்து, குற்றவாளிகளைப் பிடிக்க ஒரு பெண் அதிகாரி தலைமையில் சிறப்பு புலனாய்வுக் குழுவை (SIT) அமைத்தது. இக்குழுவினர் நடத்திய தீவிர சோதனையில் இதுவரை மூன்று சிறுவர்கள் கைது செய்யப்பட்டு காவலில் வைக்கப்பட்டுள்ளனர்.
தலைமறைவாக இருந்த முதன்மை குற்றவாளி நந்தன் யாதவை காவல்துறை தீவிரமாக தேடி வந்த நிலையில், அவரைப் பிடிக்கும் முயற்சியின் போது நடந்த துப்பாக்கிச் சூட்டில் அவர் காலில் சுடப்பட்டார். காவல்துறையின் தகவல்படி, நந்தன் யாதவ் மீது ஏற்கனவே சட்டவிரோத மணல் கடத்தல் மற்றும் மதுபான வியாபாரம் தொடர்பான பல்வேறு வழக்குகள் நிலுவையில் உள்ளது தெரியவந்துள்ளது.
கைது செய்யப்பட்ட இரண்டாவது குற்றவாளியையும் காவல்துறை மருத்துவமனைக்கு அழைத்து வந்து, நந்தன் யாதவ் சிகிச்சை பெற்று வரும் அதே அவசர சிகிச்சைப் பிரிவில் அனுமதித்துள்ளது. இந்த வழக்கு போக்ஸோ சட்டம் மற்றும் பாரதிய நியாய சன்ஹிதா (BNS) ஆகியவற்றின் கீழ் பதிவு செய்யப்பட்டுள்ளதுடன், இணையத்தில் பரவி வரும் அந்த வீடியோவை முழுமையாக அகற்றுவதற்கான நடவடிக்கைகளையும் காவல்துறையினர் மேற்கொண்டு வருகின்றனர்.
பெண்கள் மற்றும் சிறுமிகளின் பாதுகாப்பு குறித்து பாஜக தலைமையிலான மாநில அரசின் மீது கடுமையான விமர்சனங்கள் எழுந்துள்ள நிலையில், பீகார் மாநில மகளிர் ஆணையம் இச்சம்பவம் குறித்து மாவட்ட நிர்வாகத்திடம் இருந்து விரிவான அறிக்கையைக் கேட்டுள்ளது.
