உக்ரைன் மற்றும் ஈரான்-வளைகுடா பகுதிகளில் நிலவி வரும் மோதல்களால், தானியங்கள் மற்றும் உரங்களின் விநியோகம் கடுமையாக பாதிக்கப்பட்டுள்ளது. இதனால், வரும் மாதங்களில் உலகம் முழுவதும் ‘பெரும் உணவு நெருக்கடி’ ஏற்பட வாய்ப்புள்ளதாக வெளியுறவுத் துறை அமைச்சர் எஸ். ஜெய்சங்கர் எச்சரித்துள்ளார்.
திங்களன்று நியூயார்க்கில் உள்ள ‘ஆசியா சொசைட்டி’ (Asia Society) அமைப்பு நடத்திய உரையாடல் நிகழ்வில் பேசிய அவர், உக்ரைன் மற்றும் தற்போதைய ஈரான்-வளைகுடா மோதல்கள், வளரும் நாடுகளின் பொருளாதாரத்தில் மிக மோசமான தாக்கத்தை ஏற்படுத்தியுள்ளன. எரிசக்தி, உணவு, உரம் மற்றும் நிதி சார்ந்த அழுத்தங்கள் ஒன்றிணைந்து வளரும் நாடுகளுக்கு மிகப் பெரிய நெருக்கடியைக் கொடுத்து வருகின்றன.
சர்வதேச சந்தையில் எரிசக்தி விநியோகம் மிகவும் நெருக்கடியாக இருப்பது ஒரு முக்கியக் கவலையாக உள்ளது. எண்ணெய் விநியோகத்தைப் பாதிக்கக்கூடிய அரசியல் முடிவுகள் இந்த நிலைமையை மேலும் சிக்கலாக்கலாம். உலக நாடுகள் விலைவாசியைக் கட்டுப்படுத்த நினைக்கும் வேளையில், இத்தகைய முடிவுகள் எண்ணெய் விலையை மேலும் அதிகரிக்கச் செய்துவிடும்.
எண்ணெய் விநியோகப் பாதுகாப்பு ஒருபுறம் இருக்க, அதனைச் சார்ந்த அரசியலும் இதனுடன் கலக்கிறது. இவை இரண்டும் ஒன்றோடொன்று இணைந்து, தற்போதைய சூழலை ஒரு ‘இரட்டை நெருக்கடியாகவோ’ அல்லது ‘தீவிரமடைந்த நெருக்கடியாகவோ’ மாற்றியுள்ளன,” என்று அவர் கூறினார்.
உலகளாவிய மோதல்கள் காரணமாக முதலீடுகள் பாதுகாப்பான நாடுகளை நோக்கி நகர்வதால், வளரும் நாடுகள் நிதி நெருக்கடியையும் சேர்த்தே எதிர்கொள்ள வேண்டிய கட்டாயத்தில் உள்ளதாக சுட்டிக்காட்டிய அவர், எல் நினோ போன்ற காலநிலை மாற்றமும் பாதிப்பை ஏற்படுத்தி வருகிறது. ஏற்கனவே உரங்களுக்கு பெரும் தட்டுப்பாடு நிலவி வருகிறது. இவை விவசாயத்தில் கடுமையாக சிக்கல்களை ஏற்படுத்துகின்றன.
